បទចម្រៀងទី១របស់កវី អ៊ុំ ដរ៉ា និយាយពីស្នេហាដំបូងរបស់ខ្លួន
- 2017-11-22 03:21:33
- ចំនួនមតិ 0 | ចំនួនចែករំលែក 0
បទចម្រៀងទី១របស់កវី អ៊ុំ ដរ៉ា និយាយពីស្នេហាដំបូងរបស់ខ្លួន
ចន្លោះមិនឃើញ
កវីពីសម័យមុនភាគច្រើនតែងបទចម្រៀងបង្ហាញពីអារម្មណ៍របស់ខ្លួន ឬរៀបរាប់ពីភូមិស្រុកនិងទេសភាពដែលខ្លួនបានប្រទះ ជាក់ស្ដែងលោក អ៊ុំ ដរ៉ា បានតែងបទចម្រៀងដំបូងរបស់ខ្លួន និយាយពីសេចក្ដីស្នេហាលើនារីម្នាក់នៅផ្ទះជិតគ្នា។
បទចម្រៀង១បទដែលមានចំណងជើងថា "រូបអូនហ្នឹងហើយ” គឺជាបទចម្រៀងដំបូងគេបង្អស់របស់កវី អ៊ុំ ដរ៉ា ក៏ជាបទចម្រៀងដែលនិយាយពីស្នេហាដំបូងរបស់លោកដែរ។
បើតាមលោក អ៊ុំ ភីរុន កូនប្រុសតន្ត្រីករវីយោឡុងដ៏ល្បីក្នុងទសវត្សឆ្នាំ ៦០ និង៧០រូបនេះ បានប្រាប់ Sabay ថា បទនេះឪពុកខ្លួននិពន្ធក្នុងអំឡុងឆ្នាំ១៩៦៦។ បទនេះជារឿងពិតរបស់លោក អ៊ុំ ដរ៉ា កាលលោកស្រលាញ់នារីម្នាក់នៅផ្ទះជិតលោក ក្រោយមកនារីម្នាក់នៅក៏ក្លាយជាប្រពន្ធទី១របស់លោក។ កវី អ៊ុំ ដរ៉ា បានរៀបការជាមួយប្រពន្ធទី១របស់ខ្លួន ក្នុងអំឡុងឆ្នាំ១៩៦៤ ក្រោយពីរៀបការបានប្រមាណ២ឆ្នាំ លោកនិងភរិយាបាននិពន្ធបទ "រូបអូនហ្នឹងហើយ” រួមគ្នា ពោលគឺនិពន្ធក្នុងអំឡុងឆ្នាំ១៩៦៦។ បទនេះនិពន្ធ បទចម្រៀងដោយលោក អ៊ុំ ដរ៉ា និងភរិយា ចំណែកនិពន្ធទំនុកច្រៀង បទភ្លេង សម្រួលតន្ត្រី ដោយលោក អ៊ុំ ដរ៉ា ច្រៀងដោយអធិរាជសំឡេងមាស ស៊ីន ស៊ីសាមុត ។
“គាត់លួងលោមសុំស្រលាញ់គេបានសម្រេច បានរៀបការពេញច្បាប់ ហើយក្រោយមកគាត់បាននិពន្ធបទនេះរួមគ្នា តាមពិតពេលនោះ គាត់នៅក្នុងវិស័យតែងនិពន្ធហើយ គ្រាន់តែថាគាត់មិនទាន់ចេញបទខ្លួនឯង បទខ្លះគាត់សម្រួលតន្ត្រី ខ្លះសរសេរប៉ារ៉ូលឱ្យគេអីចឹងណា តែបទនេះគាត់និពន្ធខ្លួនឯងទាំងអស់”។ លោក អ៊ុំ ភីរុណ បញ្ជាក់
ទស្សនាវីដេអូចម្រៀងខាងក្រោម៖
បើតាមការបញ្ជាក់ពីកូនប្រុសកវីរូបនេះ បានឱ្យដឹងថា ថ្វីត្បិតតែកវី អ៊ុំ ដរ៉ា បានរៀបការជាមួយប្រពន្ធរបស់ខ្លួនហើយក៏ពិតមែនតែតន្ត្រីករវីយោឡុងរូបនេះ និពន្ធបទនេះឡើងដើម្បីរម្លឹកពីអនុស្សាវរីយកាលពីលោកលួចស្រលាញ់ប្រពន្ធខ្លួនដំបូង។ លោក អ៊ុំ ភីរុណ បញ្ជាក់ថា លោកដឹងរឿងទាំងនេះដោយសារតែ ប៉ារបស់លោក គឺលោក អ៊ុំ ដរ៉ា បានប្រាប់លោក។
ចុចអាន៖
៨បទរបស់ករី អ៊ុំ ដរ៉ា ល្បីក្នុងឆ្នាំ១៩៧៥ ឆក់ចិត្តអ្នកស្ដាប់ដល់បច្ចុប្បន្ន មិនដឹងពីប្រវត្តិ និងអត្ថន័យដើម បទ "ឈប់ស្រលាញ់អូនទៅ" អាចគិតខុស