កូនភ្លោះក្បាលជាប់គ្នា គ្រោងវះកាត់បំបែក ទោះមានហានិភ័យ អាចដល់ថ្នាក់ស្លាប់ទាំង២

2017-11-22 02:56:10
ចំនួនមតិ 0 | ចំនួនចែករំលែក 0

ចន្លោះមិនឃើញ

កូនភ្លោះមានក្បាលជាប់គ្នា ត្រូវបានធ្វើតេស្តដើម្បីចាប់ផ្ដើមដំណើរការវះកាត់បំបែកចេញពីគ្នា ទោះបីជាមានហានិភ័យខ្លាំង រហូតអាចស្លាប់ ក្នុងអំឡុងពេលនៃការវះកាត់ក៏ដោយ។

កុមារីភ្លោះដ៏កម្សត់ទាំង២នាក់នេះ មានឈ្មោះថា Joy និង Joyce Magsino អាយុ១០ឆ្នាំ មកពីប្រទេសហ្វីលីពីន មានក្បាលជាប់គ្នាបែបនេះពីកំណើត ខណៈក្រុមគ្រួសាររបស់ពួកគេ បានត្រៀមខ្លួនទទួលយកហានិភ័យ នៃការបាត់បង់កូនម្នាក់ ឬទាំង២នាក់។

ទោះបីជាយ៉ាងណា ពួកគេត្រូវការលុយ ជិត១០ម៉ឺនដុល្លារ ដើម្បីបង់ថ្លៃវះកាត់ផ្លាស់ប្ដូរជីវិតពួកគេ ប៉ុន្តែលោក Patrick Magsino អាយុ៣០ឆ្នាំ ដែលជាឪពុក រកប្រាក់បានត្រឹម ៨ដុល្លារក្នុងមួយថ្ងៃ និងម្ដាយឈ្មោះ Jomarie ជាជនអន្តោប្រវេសន៍ទៅធ្វើការនៅក្រៅប្រទេស មិនលទ្ធភាពរកប្រាក់ច្រើនបែបនេះ ដោយខ្លួនឯងឡើយ។

ឪពុកម្ដាយរបស់កុមារីទាំង២ បានប្រាប់ថា នៅពេល Joy និង Joyce Magsino កើតមក សប្បុរសធម៌មួយក្នុងតំបន់ បានផ្ដល់ការបង់ថ្លៃព្យាបាលសម្រាប់កុមារីទាំង២ ប៉ុន្តែបានបញ្ឈប់ជំនួយ នៅក្នុងឆ្នាំ២០១៤ នៅពេលដឹងថា ការវះកាត់អាចសម្លាប់ពួកគេបាន។

ឥឡូវនេះរូបថតថ្មី នៃកូនភ្លោះត្រូវបានគេបង្ហាញឲ្យឃើញ នៅក្នុងមន្ទីរពេទ្យមួយ នៅរាជធានីម៉ានីល នៅពេលពួកគេធ្វើតេស្ត ដើម្បីរៀបចំការវះកាត់បំបែកគ្នា។ យ៉ាងណាមិញ គេនៅមិនទាន់ដឹងច្បាស់ឡើយថា តើឪពុកម្ដាយខាងលើ អាចរកប្រាក់ពីណាបាន ដើម្បីបង់ថ្លៃវះកាត់នេះ៕