តូតា ចូលហ៊ុនបើកហាងថ្មីជាមួយបុរសដែលសង្ស័យជាគូស្នេហ៍

2017-11-22 04:00:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ល្ងាចមិញនេះ គឺថ្ងៃពិសេសដែលតារាសម្ដែងរូបស្រស់ តូតា បានឡើងងារជាថៅកែស្រីលើជំនួញលក់គ្រឿងសមុទ្រ បោះដុំ និងរាយរបស់ខ្លួន។

ហាងថ្មីនេះមាន ឈ្មោះថា "ផែសមុទ្រ" ដែល ម៉ាក់ សែនសូនីតា បានឲ្យដឹងថា វាជាផ្សារលក់គ្រឿងសមុទ្រផង និងជាភោជនីយដ្ឋានអាហារសមុទ្រស្រស់ៗ ដែលយកមកពីសមុទ្រកម្ពុជា។ នាង ប្រាប់ថា បើគិតត្រួសៗ ហាងនេះនាងចំណាយទុនផ្ទាល់ខ្លួនប្រមាណ៥ទៅ ៦ម៉ឺនដុល្លារអាមេរិក។

"ផែសមុទ្រ" ដែលមានទីតាំងនៅខណ្ឌទួលគោក ត្រូវបានគេដឹងថា ជាហាង ឬផ្សារគ្រឿងសមុទ្រមួយដែល តារាស្រីបបូរមាត់មានមន្តស្នេហ៍បង្កើតឡើងដោយសហការជាមួយ ផលិតកររឿង "ចន្ទ្រា" លោក ប៉ុល វិបូ ដែលធ្លាប់ផ្ទុះព័ត៌មានមានស្នេហ៍លួចលាក់នាពេលកន្លងមក។

លោក ប៉ុល វិបូ និង តូតា

ជាមួយគ្នានោះ លោក ប៉ុល វិបូ បានបកស្រាយថា ហាងនេះលោកមានចំណែកទុនតិចតួចប៉ុណ្ណោះ ផ្ទុយទៅ កញ្ញា ម៉ាក់ សែនសូនីតា ទៅវិញទេដែលជាថៅកែស្រី។ លោកបន្ថែមថា គោលបំណងនៃការបើកហាងនេះ ព្រោះចង់ឲ្យមានកន្លែងផ្គត់ផ្គង់គ្រឿងសមុទ្រស្រស់ៗតាមតំបន់នៅរាជធានីភ្នំពេញ គម្រោងរបស់លោក គឺនឹងបើកសាខាផ្សេងទៀតនៅគ្រប់ខណ្ឌទាំងអស់។

ផលិតករបន្ថែមថា៖ "ដោយឃើញថា កញ្ញា ម៉ាក់ សែនសូនីតា គាត់មានគាត់មានជំនួញលក់គ្រឿងសមុទ្រតាម Online និងទទួលបានការគាំទ្រ ទើបយើងមានសម្រចចិត្តកន្លែងបោះដុំគ្រឿងសមុទ្រ ដោយលក់ក្នុងតម្លៃដើម តែបើអតិថិជនចង់ឲ្យចម្អិន យើងនឹងចម្អិនជូនដោយគិតសេវាទៅតាមនោះ"។

ងាកមកកាន់ទំនាក់ទំនងយ៉ាងជិតស្និទ្ធរវាងខ្លួន និងស្រីស្អាតញញឹមស្រស់នេះវិញ លោក ប៉ុល វិបូ បញ្ជាក់ថា លោកទទួលស្គាល់ថាកន្លងមក លោក និង តូតា ពិតជាមានភាពស្និទ្ធរវាងគ្នាមែន ថែមទាំងពេលនេះ ឈានដល់ការមានអាជីវកម្មរួមគ្នាទៀត ដែលនេះហាក់មើលទៅមិនធម្មតា តែលោកសុំមិនបញ្ជាក់ថានេះជាស្នេហា ឬយ៉ាងណាឡើយ ត្បិតកុំមានរឿងរ៉ាវវែងឆ្ងាយតទៅមុខទៀត។

សម្រាប់ការចាប់ដៃគ្នាធ្វើជាគូអនាគត ផលិតករខាងលើ រៀបរាប់ថា ការពិត តូតា គឺជាក្មេងស្រីពូកែម្នាក់ ដែលមានទាំងសមត្ថភាព និងរូបសម្រស់។ អ្វីដែលធ្វើឲ្យលោកស្ងើចសរសើរលើរូបនាងនោះ ក្នុងវ័យនេះ តូតា ដែលទទួលបានការគាំទ្រ និងមមាញឹកលើអាជីពផ្ទាល់ខ្លួនហើយ អាចគ្រប់គ្រងអាជីវកម្មបានយ៉ាងល្អទៀត។ សរុបមក នាងគឺជានារីម្នាក់ដែលសមយមកធ្វើជាគូអនាគត តែរឿងអនាគតនេះ មិនអាចសម្រេចតែលោកម្នាក់ទេ គឺត្រូវមើលលើចិត្តរបស់នាងដែរ។ ចំណែកឯភាគី តូតា សុំមិនបញ្ជាក់អ្វីឡើយជុំវិញរឿងរ៉ាវស្នេហានេះ៕

ទិដ្ឋភាពសម្ពោធហាងល្ងាចមិញ៖