មុនឲ្យលុយមិត្តភក្ដិខ្ចី ត្រូវគិតឲ្យច្បាស់ពី៥ចំណុចនេះ ប្រយ័ត្ននាំទុក្ខដាក់ខ្លួន
- 2017-11-23 04:05:10
- ចំនួនមតិ 0 | ចំនួនចែករំលែក 0
មុនឲ្យលុយមិត្តភក្ដិខ្ចី ត្រូវគិតឲ្យច្បាស់ពី៥ចំណុចនេះ ប្រយ័ត្ននាំទុក្ខដាក់ខ្លួន
ចន្លោះមិនឃើញ
រឿងទៅខ្ចីលុយគេ និងរឿងឲ្យគេខ្ចីលុយ គឺសុទ្ធតែគ្មានអ្នកណាចង់ធ្វើដូចគ្នា។ ប៉ុន្តែការរាប់គ្នា គឺជៀសមិនផុតករណីពីរយ៉ាងនេះ ហើយកន្លងមកតែងឃើញជារឿយៗនៅលើបណ្ដាញសង្គមឈ្លោះគ្នាបែកផ្សែងរឿងខ្ចីលុយអត់ព្រមសង។ ដូច្នេះសូមមកដឹងឲ្យកាន់តែច្បាស់ទៀតថា រឿងឲ្យគេខ្ចីលុយនេះ មានហានិភ័យអ្វីខ្លះ? ដើម្បីគ្រាន់បានជាគំនិតពិចារណាមុនដកលុយចេញពីហោប៉ៅឲ្យនរណាម្នាក់ខ្ចី។
១. ប្រឈមហានិភ័យរឿងហិរញ្ញវត្ថុផ្ទាល់ខ្លួន
តាមបទពិសោធន៍របស់កញ្ញារមនា បុគ្គលិកក្នុងក្រុមហ៊ុនឯកជនមួយ ធ្លាប់មានបញ្ហាដោយសារឲ្យលុយគេខ្ចីលើកឡើងថា បើមានប្រាក់ខែល្មមៗត្រឹមតែចិញ្ចឹមខ្លួនឯងមួយរស់ៗទេ មិនគួរឲ្យអ្នកណាខ្ចីលុយឡើយ ទោះម្នាក់នោះស្និទ្ធស្នាលប៉ុណ្ណាក៏ដោយ។ កញ្ញាបន្តថា ហេតុផលដ៏សំខាន់នោះ គឺថាប្រសិនបើកូនបំណុលក្រឡេចក្រឡុចម្ដងសងថ្ងៃនេះម្ដងសងថ្ងៃនោះ មិនគោរពទៅតាមការសន្យាដូចកាលពេលខ្ចីប្រាកដជាវីវររឿងខ្លួនឯងហើយ។
ដូច្នេះទោះចង់មិនចង់យើងខ្លួនឯងនឹងទៅខ្ចីលុយគេបន្ត ដើម្បីរង់ចាំថ្ងៃបើកប្រាក់ខែ។ ហេតុនេះហើយត្រូវវិភាគមើលលុយរបស់ខ្លួនឯងសិន មុននឹងដកឲ្យអ្នកណាខ្ចី ប្រយ័ត្នវេទនាខ្លួន។
២. បាត់បង់លុយ
រមនាបន្តមួយចំណុចទៀតថា អ្នកណាក៏អាចដឹងពីបញ្ហានេះដែរ គឺឱ្យលុយគេខ្ចីហើយខ្លាចគេមិនសង ជាពិសេសអ្នកឲ្យគេខ្ចីច្រើនវាល់លាន។ នេះគឺជាហានិភ័យងាយនឹងជួបប្រទះបំផុតសម្រាប់អ្នកឲ្យលុយគេខ្ចី នៅពេលដែលកូនបំណុលមិនសងគឺពិបាករកប្រព័ន្ធច្បាប់ក្នុងការដោះស្រាយបំផុត។
មានន័យថាការផ្ដល់កម្ចីនេះមិនមែនស្ថិតក្នុងច្បាប់ហិរញ្ញវត្ថុ ឬប្រព័ន្ធធនាគារឡើយ គ្មានអាជ្ញាធរដឹងឮ មិនបានពាក់ព័ន្ធក្នុងប្រព័ន្ធច្បាប់នៃការផ្ដល់កម្ចីក្នុងវិស័យធនាគារ។ ដូចនេះទោះបីម្ចាស់បំណុល ចង់ទាមទារលុយទាំងនោះមកវិញគឺនឹងប្រឈមមុខហានិភ័យ ប្រសិនបើកូនបំណុលនោះមិនសង។
៣. បាត់បង់ឱកាសប្រើប្រាស់លុយ
ដោយឡែកបើតាមការលើកឡើងពី វិសិដ្ឋ និស្សិតរៀននៅសាកលវិទ្យាល័យឯកជនមួយ និយាយថា អ្នកដែលឲ្យលុយគេខ្ចីច្រើនៗខ្ទង់ពាន់ដុល្លារ ឬមិនដល់ពាន់ក៏ដោយ នឹងបាត់បង់ថ្លៃឱកាសនៃការប្រើប្រាស់លុយ។ មានន័យថា ប្រសិនបើមានឱកាសល្អណាមួយកើតឡើង ហើយចាំបាច់ត្រូវមានលុយនោះដើម្បីប្រើការ ដូចជាការរកស៊ី ឬត្រូវការលុយជាបន្ទាន់ក្នុងករណីណាមួយ នោះនឹងត្រូវបាត់បង់ឱកាសក្នុងការប្រើលុយរបស់ខ្លួនឯង ដោយសារត្រូវកប់ចោលក្នុងដៃកូនបំណុល។
៤. អាចបង្រៀនមនុស្សចេះប្រែប្រួលអត្តចរិត
រឿងលុយសំខាន់បំផុតសម្រាប់មនុស្សម្នាក់ៗ ព្រោះសម័យនេះស្អីក៏ត្រូវការលុយដែរ។ ចុះបើឲ្យលុយគេខ្ចី ហើយគេមិនសងនោះនឹងបង្រៀនឲ្យយើងពីមនុស្សសុភាពស្លូតៗសោះ ស្រាប់តែចេះនិយាយពាក្យសម្ដីមិនសមរម្យដើម្បីទារលុយគេ។
ចំណុចនេះអាចថា ហ៊ានបង្ហោះជេរអ្នកជំពាក់លុយតាមហ្វេសប៊ុក និយាយពាក្យធ្ងន់ៗទៅកាន់អ្នកជំពាក់លុយ និងអាចឈានដល់ការឈ្លោះប្រកែកគ្នាទៀតផង។ ដូច្នេះហើយបើអាចជៀសបានក៏ល្អ សុខចិត្តឲ្យគេថាចិត្តអាក្រក់ចុះ តែរស់នៅស្ងប់សុខល្អជាង។ នេះបើតាមការលើកបន្ថែមទៀតរបស់ វិសិដ្ឋ។
៥. អាចបាត់បង់មិត្តភាព
មកជួបជាមូយកញ្ញា ធាវី ទើបប្រឡងជាប់នៅធនាគារជាតិថ្មីប្រាប់ថា ត្រូវចាំថា មនុស្សកើតចិត្តមួម៉ៅក្ដៅក្រហាយបំផុត ពេលដែលអស់លុយចាយ ហើយអ្នកជំពាក់លុយក៏មិនព្រមសងទៀត។ ដូច្នេះមិនថាអ្នកណាក៏ពិបាកទប់អារម្មណ៍ដែរ មានតែដាច់ចិត្តទៅទារមិនថា អ្នកនោះធ្លាប់ស្និទ្ធស្នាលប៉ុណ្ណាក៏ដោយ ធ្វើម៉េចឲ្យតែបានលុយមកវិញ។
ចំណែកម្ខាងទៀតទោះខ្លួនជំពាក់លុយគេក៏ដោយ តែបើមានអ្នកទៅជេរបញ្ចោររឿងអីមិនខឹង។ លទ្ធផលចុងក្រោយគឺឈ្លោះគ្នាបែកផ្សែង ហើយជួនកាលលុយនោះក៏មិនបានមកវិញ ចំណែកឯមិត្តភាពក៏បាត់បង់៕
ចុចអានអត្ថបទពាក់ព័ន្ធ៖
មិត្តភ័ក្ដិជំពាក់លុយមិនព្រមសង គួរប្រើវិធីសាស្ត្របែបណា?
មូលហេតុ ៥យ៉ាងនេះសោះ បានជាអ្នកជំពាក់លុយគេធ្វើមុខក្រាស់មិនព្រមសង
ជំពាក់លុយមិនសង នាំហានិភ័យច្រើនយ៉ាងដែលអ្នកគិតមិនដល់