Hazard បង្ហើបពីមូលហេតុ Salah មិនជោគជ័យនៅ Chelsea

2017-11-24 13:39:40
ចំនួនមតិ 0 | ចំនួនចែករំលែក 0

ចន្លោះមិនឃើញ

Eden Hazard ក្នុងថ្ងៃនេះបាននិយាយថា ខ្សែប្រយុទ្ធ Mohamad Salah មិនមានឱកាសគ្រប់គ្រាន់ក្នុងការបញ្ចេញសមត្ថភាពខ្លួន ពេលលេងឲ្យ Chelsea ជាហេតុធ្វើឲ្យកីឡាករសញ្ជាតិអេហ្ស៊ីបមិនមានភាពជោគជ័យនៅទីនោះ។

ខ្សែប្រយុទ្ធបែលហ្ស៊ិក Hazard បាននិយាយថា៖ "គេគឺជាកីឡាករមួយដ៏ល្អ ល្អ ល្អខ្លាំងមែនទែន។ ប៉ុន្តែគួរឲ្យស្ដាយ គេមិនមានឱកាសគ្រប់គ្រាន់កាលពីពេលនៅលេងឲ្យ Chelsea។ ខ្ញុំមិនដឹងច្បាស់ទេ តើនេះបណ្ដាលមកពីគ្រូបង្វឹក ឬក៏បណ្ដាលមកពីកីឡាករផ្សេងឯទៀត"។ កីឡាកររូបនេះបានបន្តទៀតថា៖ "គេមានសមត្ថភាពខ្ពស់ណាស់ ប៉ុន្តែនៅពេលហ្នឹង ខ្ញុំចាំបានថា Chelsea មានខ្ញុំ, Willian ហើយ Oscar។ ដូច្នេះសម្រាប់រូបគេ វាមិនមានភាពងាយស្រួលទេ"។

ខ្សែប្រយុទ្ធ Mohamad Salah បានចាកចេញពីក្លឹបស្វីស Basel មកចូលរួមជាមួយ Chelsea កាលពីឆ្នាំ ២០១៤ ប៉ុន្តែលេងឲ្យក្លឹបបានតែ ១៩លើក ប៉ុណ្ណោះនៅទីនោះ មុនពេលត្រូវបានក្លឹបអ៊ីតាលី Fiorentina ខ្ចីជើង កាលពីដើមឆ្នាំ ២០១៥។

ចប់ពី Fiorentina ទៅ កីឡាករអេហ្ស៊ីបរូបនេះបានបន្តលេងនៅអ៊ីតាលីមួយរដូវកាលទៀត ដោយចូលរួមជាមួយក្លឹប AS Roma ក្នុងឋានៈជាកីឡាករខ្ចីជើង មុនពេលត្រូវបានក្លឹបមួយនេះទិញផ្ដាច់ពី Chelsea តែម្ដងកាលពីខែសីហា ឆ្នាំ២០១៦។ ជិតមួយឆ្នាំក្រោយមក Salah បានចាកចេញពីអ៊ីតាលី មកលេងឲ្យ Liverpool ហើយបានបង្ហាញទម្រង់លេងបានយ៉ាងល្អឲ្យក្លឹបហង្សក្រហម ដោយស៊ុតចូលបាន ៩ គ្រាប់ហើយនៅក្នុងលីគកំពូលអង់គ្លេស គិតមកទល់ពេលនេះ៕

ប្រភព៖ Sky Sports ប្រែសម្រួល៖ ហ៊ីម រស្មី