យុទ្ធនាការ"ភ្នំពេញស្អាត"នឹងបន្តធ្វើរៀងរាល់ឆ្នាំ រហូតដល់ទីក្រុងលែងមានសំរាមធ្លាក់ដល់ដី
- 2017-11-27 02:31:38
- ចំនួនមតិ 0 | ចំនួនចែករំលែក 0
យុទ្ធនាការ"ភ្នំពេញស្អាត"នឹងបន្តធ្វើរៀងរាល់ឆ្នាំ រហូតដល់ទីក្រុងលែងមានសំរាមធ្លាក់ដល់ដី
ចន្លោះមិនឃើញ
«ភ្នំពេញស្អាត» ដែលជាយុទ្ធនាការអប់រំផ្នែកបរិស្ថានទីក្រុងស្អាតនិងជាសកម្មភាពបន្ថែមលើយន្តការដែលរាជរដ្ឋាភិបាលមានស្រាប់បានប្រារព្ធទិវាស្អាតនៅថ្ងៃទី២៦ ខែវិច្ឆិកា ឆ្នាំ២០១៧ នៅពហុកីឡដ្ឋានជាតិអូឡាំពិកបានប្រមូលផ្តុំប្រជាពលរដ្ឋ និងស្ថាប័នរដ្ឋ និងឯកជន ក៏ដូចជាសមាគមក្នុងស្រុក និងអន្តរជាតិ រួមទាំងគ្រឹះស្ថានអប់រំ ឲ្យកាន់តែសកម្មខ្លាំងឡើងក្នុងការចូលរួមសំអាតទីក្រុង។
ក្នុងនាមយុទ្ធនាការ «ភ្នំពេញស្អាត» ស្ថាប័នរដ្ឋ-ឯកជន សមាគម និងអង្គការមិនមែនរដ្ឋាភិបាល បានចូលរួមជ្រោមជ្រែងការផ្សព្វផ្សាយ និងបញ្ជ្រាបការអប់រំឲ្យបានទូលំទូលាយ ស្តីពីការទុកដាក់សំរាមឲ្យបានត្រឹមត្រូវ ដោយផ្តោតលើពាក្យស្លោកមួយឃ្លាក្រោមអត្ថន័យថា៖«សំរាមមិនថ្លាក់ដល់ដី ភ្នំពេញកាន់តែប្រពៃ»។
ជាមួយគ្នានេះ លោក ជី សីលា អគ្គនាយកប្រតិបត្តិក្រុមហ៊ុន Sabay Group បានបញ្ជាក់ថា៖ «ភ្នំពេញស្អាតទទួលបានចំណាប់អារម្មណ៍ដ៏វិជ្ជមានពីគ្រប់ប្រព័ន្ធផ្សព្វផ្សាយ ក្រុមហ៊ុនឯកជន អង្គការជាតិនិង អន្តរជាតិព្រមទាំងក្រសួងនានា។ យុទ្ធនាការស្អាតនេះ ជាវេទិកាមួយដែលផ្តល់ឱកាសឲ្យយើងគ្រប់គ្នាបានរួបរួមកម្លាំងជាធ្លុងមួយដើម្បីចែករំលែកចំណេះដឹង បទពិសោធន៍ យុទ្ធសាស្ត្រក្នុងការការពារបរិស្ថាន សោភ័ណភាព និងសុខុមាលភាពរបស់យើងប្រកបដោយនិរន្តរភាព។»
លោកបានបន្តថា៖ «ក្រុមការងារយើងខ្ញុំមានមោទនភាពដែលយុទ្ធនាការនេះ បានជួយរំលែកបន្ទុកមួយក្នុងសង្គមរបស់យើង និងបង្កើនសហប្រតិបត្តិការអោយកាន់តែស្អិតរមួតរវាងរាជរដ្ឋាភិបាល វិស័យឯកជន សមាគម គ្រឹះស្ថានអប់រំ អង្គការ ក៏ដូចជាក្រុមយុវជន ដើម្បីរួមចំណែកដល់ការអភិវឌ្ឍប្រទេសកម្ពុជាទៅថ្ងៃអនាគត»។
រយៈពេលជាងបីសប្តាហ៍ "យុទ្ធនាការភ្នំពេញស្អាត" បានបញ្ចប់ ដោយបានការបញ្រ្ជាបការអប់រំ ដល់ប្រជាពលរដ្ឋតាមរយៈការចុះអប់រំផ្ទាល់ដោយក្រុមយុវជនសុឆន្ទៈស្អាត និងតាមប្រព័ន្ធផ្សព្វផ្សាយដូចជា ការសែត ទូរទស្សន៍ វិទ្យុ និងប្រព័ន្ធបណ្តាញសង្គមហើយមានកម្មវិធីមួយចំនួនទៀតដែលមានការចូលរួមយ៉ាងសកម្មពីសមាគមក្នុងស្រុក និងអន្តរជាតិ ក៏ដូចជាក្រុមហ៊ុនឯកជនផងដែរ។ សកម្មភាពរបស់ពួកគាត់រួមមានការសំអាតក្រុមហ៊ុន និងទីធ្លាជុំវិញក្រុមហ៊ុនរបស់គាត់ ក៏ដូចជាបង្កើតនូវគោលការណ៍ ឬបទបញ្ជាផ្ធៃក្នុងដោយផ្តោតលើគោលគំនិតនៃយុទ្ធនាការស្អាត។
ជាចុងក្រោយ លោក ឃុត ដារ៉ា អនុរដ្ឋលេខាធិការនៃក្រសួងបរិស្ថាន បានថ្លែងថា ការបូកសរុបជាលទ្ធផលរួមនៃយុទ្ធនាការរយៈពេលជិតមួយខែមកនេះ គឺទទួលបានភាពវិជ្ជមានដ៏ប្រសើរតាមរយៈការរំលឹកស្មារតីប្រជាពលរដ្ឋចូលរួមយ៉ាងសកម្មក្នុងការសំអាតបរិស្ថានជុំវិញខ្លួន។ លោកបានគូសបញ្ជាក់ថា ក្រសួងនឹងបន្តគាំទ្រនិងប្ដេជ្ញាជ្រោមជ្រែងយុទ្ធនាការនេះទៀតជារៀងរាល់ឆ្នាំ។
គួររំលឹកថា កម្មវិធីភ្នំពេញស្អាតត្រូវបានបង្កើតឡើងដោយ សហស្ថាបនិកចំនួន ០៦រូប ដែលមកពីស្ថាប័នផ្សេងៗគ្នា រួមមាន ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា លោក ជី សីលា អគ្គនាយប្រតិបត្តិក្រុមហ៊ុន Sabay Group លោកស្រី ជា សុផល្លា ប្រធានសភាយុវពាណិជ្ជករអន្តរជាតិកម្ពុជា និងអគ្គនាយប្រតិបត្តិក្រុមហ៊ុន Emerald Plus លោកស្រី ហេង ធីតា នាយកផ្នែកសេវាកម្មហិរញ្ញវត្ថុបុគ្គលនៃធនាគារ CIMB Cambodia PLC លោក ហៃ ភិរម្យ នាយកផ្នែកយុទ្ធសាស្រ្តជំនួញប្រចាំប្រទេសក្នុងតំបន់មេគង្គនៃក្រុមហ៊ុន Bosch និងលោកស្រី ទេព កុលាប នាយិកាសកលវិទ្យាល័យអន្តរជាតិភ្នំពេញ៕