បងប្អូនបង្កើតពីរនាក់ កើតជំងឺកម្រមួយក្នុងមួយលាន មិនចេះឈឺ មិនចេះយំ

2017-11-27 03:01:37
ចំនួនមតិ 0 | ចំនួនចែករំលែក 0

ចន្លោះមិនឃើញ

បងប្អូនស្រី ២នាក់ ត្រូវបានពិនិត្យឃើញថាមានរោគសញ្ញាខាងតំណពូជប្រភេទ២ ដ៏កម្រមានមួយក្នុងមួយលាន ដែលមានន័យថាពួកគេមិនអាចមានអារម្មណ៍ឈឺចាប់ និងមិនដែលយំនោះទេ។

កញ្ញា Isra Taleb អាយុ ១៨ឆ្នាំនិងប្អូនស្រី Naeala អាយុ ១៥ឆ្នាំ មិនអាចមានអារម្មណ៍ឈឺចាប់, ក្ដៅ និងត្រជាក់។ បងប្អូនស្រីទាំងពីរនាក់ដែលមកពី Victoria's Coburgបានកើតជំងឺផ្ដាសាយធ្ងន់ធ្ងរ, ហើមម្រាមដៃនិងជង្គង់, ឡើងកន្ទួលក្រហមនិងជំងឺសើស្បែកដែលអាចប្រើពេលរាប់ឆ្នាំដើម្បីឱ្យជាសះស្បើយ។ ដោយសារតែមិនអាចមានអារម្មណ៍ឈឺចាប់នៅលើដៃ ជង្គង់ និងម្រាមជើងបាន, បងប្អូនទាំង២នាក់អាចប្រឈមមុខនឹងគ្រោះថ្នាក់ធ្ងន់ធ្ងរប្រសិនបើពួកគេរងរបួស។

សញ្ញាដំបូងជំងឺនេះបានលេចឡើង នៅពេល Isra មានអាយុទើបតែ ៣ឆ្នាំ នៅពេលដែលនាងបានធ្វើឲ្យមុតម្រាមដៃ ប៉ុន្តែនាងមិនមានអារម្មណ៍ឈឺចាប់នឹងមិនបានយំនោះទេ។ នៅអាយុបីឆ្នាំ Isra ត្រូវបានធ្វើរោគវិនិច្ឆ័យឃើញថាមានជំងឺនេះ បន្ទាប់ពីស្នាមរបួសមួយនៅក្រោមម្រាមជើងរបស់នាងមិនអាចជាសះស្បើយបាន។ ចំណែកឯប្អូនស្រីឈ្មោះ Neala បានបាត់បង់ជើងរបស់នាងកាលពីអាយុ ៦ខែ ដោយសារតែមិនអាចព្យាបាលបាន។

Isra បាននិយាយថា "ជើងរបស់ខ្ញុំធ្លាប់បាក់ម្ដងកាលពីអាយុ១៣ឆ្នាំ នៅពេលវះកាត់គ្រូពេទ្យមិនបានចាក់ថ្នាំសន្លប់ឲ្យខ្ញុំទេ ដោយសារតែខ្ញុំមិនអាចមានអារម្មណ៍ចំពោះអ្វីដែលពេទ្យកំពុងធ្វើចំពោះខ្ញុំនោះទេ។ ប្រសិនបើជាអ្នកជំងឺធម្មតា ពួកគេប្រហែលជាស្រែកយំបាត់ទៅហើយ។ ឧបទ្ទវហេតុមួយទៀតជាមួយប្អូនស្រីខ្ញុំឈ្មោះ Neala នៅពេលដែលយើងញ៉ាំសាច់អាំង ហើយនាងបានចាប់ធ្យូងដែលធ្លាក់ចេញពីចង្ក្រានដោយដៃទទេ និងមិនមានអារម្មណ៍ថាក្ដៅនោះទេ។"

ដោយសារតែជួបជីវិតខុសគេបែបនេះ បងប្អូនទាំងពីរនាក់ចង់ចែករំលែកស្ថានភាពរបស់ពួកគេ។ Isra បានចាប់ផ្ដើមទំព័រ GoFundMe ដើម្បីរៃអង្គាសប្រាក់សម្រាប់រទេះដែលត្រូវបានកែប្រែពិសេសដើម្បីបំពេញតម្រូវការរបស់ប្អូនស្រីនាង បន្ទាប់ពីរទេះមុនបានខូច។ រហូតមកដល់ពេលនេះគ្រួសារសប្បុរសជន, មិត្តភ័ក្ដិនិងមនុស្សជាច្រើនបានបរិច្ចាគប្រាក់ដល់ពួកគេជាង ២២ ០០០ ដុល្លារហើយ៕