ក្រុម Glory 5 ចង់គេចឲ្យផុតពីក្រុម IQ វគ្គសន្សំពិន្ទុជើងឯកជាតិចុងសប្ដាហ៍នេះ
- 2017-11-28 08:29:40
- ចំនួនមតិ 0 | ចំនួនចែករំលែក 0
ក្រុម Glory 5 ចង់គេចឲ្យផុតពីក្រុម IQ វគ្គសន្សំពិន្ទុជើងឯកជាតិចុងសប្ដាហ៍នេះ
ចន្លោះមិនឃើញ
ក្រុម Glory 5 ដែលជាអតីតក្រុម XP ចង់គេចឲ្យផុតពីក្រុមខ្លាំង Intelligent Quotient (IQ)នៅវគ្គសន្សំពិន្ទុក្នុងពូលសម្រាប់វិញ្ញាសា Dota 2 នៃការប្រកួតកីឡាអេឡិចត្រូនិកជ្រើសរើសជើងឯកជាតិឆ្នាំ២០១៧ដែលនឹងធ្វើចុងសប្តាហ៍នេះនៅសាលាតិចណូ។
ដួង សេរីរ័ត្ន សមាជិកក្រុម Golry 5 បានឲ្យដឹងថា សម្រាប់ការប្រកួតកីឡាអេឡិចត្រូនិកជ្រើសរើសជើងឯកជាតិឆ្នាំនេះពិតជាតឹងតែងខ្លាំងសម្រាប់វិញ្ញាសា Dota2 ពីសំបូរក្រុមខ្លាំងៗដូចជា IQ, Danger Gaming, និង Hell Boysជាដើម។ ជាពិសេសក្រុម IQ ដែលជាជើងខ្លាំង និងមានបទពិសោធច្រើនទាំងក្នុងស្រុក និងអន្តរជាតិ។
សេរីរ័ត្នបានពន្យល់ថា មែនទែនទៅ IQ ជាក្រុមអាជីពទៅហើយ និងមានបទពិសោធច្រើនលើឆាកជាតិ និងអន្តរជាតិ។ បើអាចក្រុមរបស់ខ្លួនមិនចង់ជួប IQ នៅវគ្គសន្សំពិន្ទុតាមពូល ឬចាញ់ធ្លាក់ ឈ្នះឡើងឡើយ ពីព្រោះក្តីប្រាថ្នារបស់ក្រុមខ្លួនឡើងឲ្យដល់វគ្គផ្តាច់ព្រ័ត្រ។
ទោះបីជាយ៉ាងណា សមាជិកក្រុម Glory 5 រូបនេះអាងថា ៖«ពួកខ្ញុំសង្ឃឹមឈានដល់វគ្គផ្តាច់ព្រ័ត្រ។ បើវាសនាចាប់ឆ្នោតជួបក្រុម IQ ពួកខ្ញុំនឹងប្រឹងប្រែងឲ្យអស់ពីសមត្ថភាពដើម្បីរកផ្លូវទៅដល់វគ្គផ្តាច់ព្រ័ត្រ។
តាមពិតទៅក្រុម Glory 5 ជាអតីតក្រុម XP ដែលទទួលបានចំណាត់ថ្នាក់លេខ២ក្នុងការប្រកួតជើងឯក E-Sports កាលពីឆ្នាំ២០១៦។ សមាជិកទាំង៥នាក់គឺមាន២នាក់ជាអតីតសមាជិកក្រុម XP និង៣នាក់ទៀតជាសមាជិកថ្មី។ ប៉ុន្តែសមាជិកទាំង៥នាក់សុទ្ធតែមានបទពិសោធច្រើនឆ្នាំដូចគ្នាពោលគឺអ្នកខ្លះមានបទពិសោធប្រហែល១០ឆ្នាំហើយ។
សូមបញ្ជាក់ក្រុមខ្លាំង IQ ឬIntelligent Quotient ជាជើងឯកជាតិ និងក្រុម Glory 5 ជាជើងឯករកកាលពីឆ្នាំ២០១៦។ កាលពីថ្ងៃអាទិត្យទី២៦ វិច្ឆិកា កន្លងទៅនេះ ក្រុមទាំងពីរបានជួបគ្នានៅវគ្គផ្តាច់ព្រ័ត្រនៃការប្រកួតជើងឯក Cyberfusion ហើយក្រុម IQ នៅតែឈ្នះជើងឯកទៀតទទួលបានប្រាក់រង្វាន់៥ពាន់ដុល្លារ និងក្រុម Glory 5 ទទួលបានត្រឹមជើងឯករងដែលមានប្រាក់រង្វាន់៣ពាន់ដុល្លារ។
វិញ្ញាសា Dota 2 សម្រាប់ការប្រកួតជើងឯកជាតិឆ្នាំ២០១៧នេះជុំផ្តាច់ព្រ័ត្រមាន៨ក្រុមដែលត្រូវបានជ្រើសរើសចេញពីការប្រកួតជម្រុះតំបន់ទាំង៥ក្នុង២៣ខេត្ត-ក្រុង។ ក្រុមទាំង៨គឺ eClipse, Awaesome, Neverwin, IQ, Glory5, Danger Gaming, Hell Boys និងHord Entertainment។
ការប្រកួតជ្រើសរើសជើងឯកកីឡាអេឡិចត្រូនិក(E-Sports)ប្រចាំឆ្នាំ២០១៧នឹងធ្វើនៅសាលាតិចណូ ថ្ងៃសៅរ៍-អាទិត្យ ទី២-៣ ខែធ្នូនេះ។ បងប្អូនអ្នកគាំទ្ររបស់ក្រុមនីមួយៗអាចចូលរួមទស្សនាដោយសេរី និងសប្បាយរីករាយជាមួយកម្មវិធីកម្សាន្តជាច្រើនទៀត។ ព្រឹត្តិការណ៍ឆ្នាំនេះរៀបចំដោយសហព័ន្ធកីឡាអេឡិចត្រូនិកកម្ពុជា និងគាំទ្រដោយគណៈកម្មាធិការជាតិអូឡាំពិកកម្ពុជា ព្រមទាំងចូលរួមឧបត្ថម្ភដោយកុំព្យូទ័រ ASUS ROG, ភេសជ្ជៈ Mountain Dew និងទូរទស្សន៍ MYTV ៕
អត្ថបទពាក់ព័ន្ធ
បង្ហាញឈ្មោះក្រុមទាំង២៤ឡើងជុំផ្ដាច់ព្រ័ត្រ E-Sports ថ្នាក់ជាតិ
ប្រកួត E-Sports តំបន់ចុងក្រោយរកបាន១១ក្រុមឡើងជុំផ្តាច់ព្រ័ត្រទូទាំងប្រទេស
៣ក្រុមនេះសុទ្ធតែខ្លាំងរំពឹងឈ្នះជើងឯកជាតិឆ្នាំនេះ