PNN ប្រកាសបានសិទ្ធិផលិតប្រលោមលោកល្បីជាងគេរបស់ Sabay កាលឆ្នាំ២០១៤

2017-11-29 03:33:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រលោមលោក "ថ្ងៃមុនស្អប់ថ្ងៃនេះស្រលាញ់" របស់ Sabay ដែលទទួលបានការពេញនិយមខ្ពស់កាលពីឆ្នាំ ២០១៤ ពេលនេះកំពុងស្ថិតនៅក្នុងដៃក្រុមផលិតកម្មវិធីរបស់ទូរទស្សន៍ PNN ហើយ។

កញ្ញា ទូច បុប្ផា អ្នកគ្រប់គ្រងកម្មវិធីរបស់ស្ថានីយ៍ទូរទស្សន៍ ដែលនាំមុខគេផ្នែកភាពយន្តក្នុងស្រុកបានអះអាងថា រឿងភាគទូរទស្សន៍ថ្មីមួយនេះ គឺជាការបំបែកប្រវត្តិថ្មីមួយទៀតសម្រាប់ PNN ក៏ដូចជាវិស័យភាពយន្តវីដេអូទាំងមូលនៅឆ្នាំ២០១៨។

កញ្ញា ទូច បុប្ផា អ្នកគ្រប់គ្រងកម្មវិធីរបស់ស្ថានីយ៍ទូរទស្សន៍ PNN

"យើងបានសិក្សាច្បាស់លាស់ធ្វើអង្កេត សាកសួរ ស្ទង់មតិមុនពេលសម្រេចជ្រើសរើសរឿងប្រលោមលោកមកកម្លាយជារឿងភាគខ្នាតធំប្រចាំឆ្នាំ។ "ថ្ងៃមុនស្អប់ថ្ងៃនេះស្រលាញ់" ជាវណ្ណកម្មដ៏ពិសេសបង្ហាញពីការរស់នៅរបស់សង្គមអភិជន ទំនាស់រង្វង់ពាណិជ្ជកម្ម និងស្មោះត្រង់កម្ររកបាននៃមិត្តភាព ដែលជាវត្ថុដ៏មានតម្លៃសម្រាប់ជូនទស្សនិកជនសិក្សាពិចារណាផ្លាស់ប្តូរការប្រព្រឹតិ្តជាវិជ្ជមាន"។ នេះបើតាមការលើកឡើងពីកញ្ញា ទូច បុប្ផា។

អ្នកគ្រប់គ្រងកម្មវិធីរបស់ស្ថានីយ៍ទូរទស្សន៍ខាងលើ បញ្ជាក់បន្ថែមទៀតថា PNN កំពុងស្ថិតក្នុងដំណាក់កាលស្វែងរកអ្នកផលិតសក្តិសម ដែលអាចធ្វើយ៉ាងណាឆ្លើយតបទៅនឹងអ្នកគាំទ្ររាប់លាននាក់ ដែលអានជក់ចិត្តនឹងរឿងនេះកាលនៅជាប្រលោមលោក។ ក្នុងនោះកញ្ញាទូច បុប្ផា បន្ថែមថា មានផលិតករជាច្រើនបានអានរឿងនេះហើយទទួលស្គាល់ថា ជាការផលិតដ៏លំបាកត្រូវការក្រុមមនុស្សច្រើនហើយមានសមត្ថភាពខ្ពស់ ត្រូវការថវិកាធំ និងពេលវេលាវែង។

PNN គឺជាប្រភពសោតទស្សន៍ដែលមានកម្មវិធីកម្សាន្តសម្បូរបែបជាងគេមួយ ដែលដាក់ការវិនិយោគទ្រង់ទ្រាយធំ និងជាក់លាក់លើការលើកកម្ពស់ភាពយន្តវីដេអូខ្មែរ ក៏ដូចជាស្នាដៃរបស់អ្នកនិពន្ធខ្មែរពិតៗ។ ចំណែកប្រលោមលោក "ថ្ងៃមុនស្អប់ថ្ងៃនេះស្រលាញ់" គឺជាស្នាដៃរបស់អ្នកនិពន្ធ ម៉ីសន សុធារី ដែលក្នុងនោះមានភាពយន្តរឿង "ស្រទន់មន្តស្នេហ៍" ដ៏ល្បីត្រូវបានផលិតនៅឆ្នាំ ២០១៧។

អ្នកនិពន្ធភាពយន្តល្បី "ស្រទន់មន្តស្នេហ៍" បានឲ្យដឹងថា PNN គឺជាគោលដៅសម្រាប់ការសហការផលិតរឿង ហើយការផ្តល់សិទ្ធិទៅឲ្យទូរទស្សន៍នេះគឺជាមោទនភាពធំមួយសម្រាប់អ្នកនិពន្ធខ្មែរ។

អ្នកនិពន្ធ ម៉ីសន សុធារី

"ខ្ញុំតែងតែចង់ឃើញប្រលោមលោករបស់ខ្ញុំផលិតជាវីដេអូហើយចរាចរណ៍គ្រប់ប៉ុស្តិ៍ ព្រោះនេះជាការនាំស្នាដៃយើងទៅដល់ទស្សនិកជនគ្រប់មជ្ឈដ្ឋាន ក្នងចំណោមនោះ PNN ជាស្ថាប័នមួយ ឲ្យតម្លៃស្នាដៃអ្នកនិពន្ធក្នុងស្រុក ហើយមានឆន្ទៈក្នុងការលើកស្ទួយវិស័យនេះជាមួយនឹងទំហំវិនិយោគគួរឲ្យទុកចិត្ត។ យើងឆ្លងកាត់ការពិភាក្សាច្រើនលើកច្រើនសារទម្រាំសម្រេចថាត្រូវតែពុះពារគ្រប់ឧបសគ្គហើយធ្វើឲ្យរឿងដ៏ធំមួយថ្មីនេះចេញរូបរាងឡើងឲ្យខានតែបាន"។ អ្នកនិពន្ធ ម៉ីសន សុធារី បានឲ្យដឹងមុននេះ។

«ថ្ងៃមុនស្អប់ថ្ងៃនេះស្រលាញ់» មិនធ្លាប់បានបោះពុម្ពជាសៀវភៅម្តងណាឡើយ ប៉ុន្តែការអាននៅប្រលោមលោក Sabay មានកំណត់ត្រាជាង៣លានដង ហើយក៏ជារូបារម្មណ៍ពិសេសមិនធ្លាប់មានក្នុងចំណោមប្រលោមលោកក្នុងស្រុក។

ខ្សែរឿងនេះពណ៌នាអំពីសង្គមពាណិជ្ជកម្មនិងវិស័យធនាគារ ព្រមទាំងអាថ៌កំបាំងក្នុងក្រុមគ្រួសារអ្នកមានប្រាក់មានអំណាច ដែលបង្កើតឆាកល្ខោនគ្រប់បែបយ៉ាងព្រោះតែគម្រោងការផ្ទាល់ខ្លួន៕