ចម្រៀង១បទត្រឹម៣នាទី ដឹង កញ្ចនា ចំណាយពេលប៉ុន្មានដើម្បីផលិត?(វីដេអូ)
- 2017-11-29 04:20:37
- ចំនួនមតិ 0 | ចំនួនចែករំលែក 0
ចម្រៀង១បទត្រឹម៣នាទី ដឹង កញ្ចនា ចំណាយពេលប៉ុន្មានដើម្បីផលិត?(វីដេអូ)
ចន្លោះមិនឃើញ
ចិត្ត កញ្ចនា ត្រូវបានអ្នកនិយមចូលចិត្តវិស័យសិល្បៈស្គាល់ថា ជាសិល្បការិនីលេចធ្លោម្នាក់ក្នុងរង្វង់អ្នកចម្រៀងតែងនិពន្ធថ្មីជាច្រើន។ យុវតីរូបនេះមានទឹកដៃល្អក្នុងការនិពន្ធបទចម្រៀងយ៉ាងពីរោះ និងពោរពេញដោយអត្ថន័យផ្សេងៗ ធ្វើឲ្យអារម្មណ៍ និងបេះដូងអ្នកស្ដាប់ទោទន់ទៅតាមបទចម្រៀងគ្រប់ៗគ្នា។
ជាទូទៅ ប្រិយមិត្តចំណាយពេលត្រឹម៣នាទី ឬលើសពីនេះបន្តិចបន្តួចប៉ុណ្ណោះ ដើម្បីស្ដាប់ចម្រៀង១បទរបស់តារាស្រីខាងលើ។ ដូច្នេះតើចង់ដឹងទេថា មុនសម្រេចចេញជាចម្រៀងដែលមានគុណភាពមួយបទ តើអ្នកនិពន្ធ និងចម្រៀងរូបនេះ ចំណាយពេលយូរប៉ុណ្ណាដើម្បីសម្រិតសម្រាំងឡើង?
ជំនួបជាមួយ Sabay ម្ចាស់បទ "អ្នកដទៃ" ប្រាប់ថា ចម្រៀង១បទ គឺតម្រូវឲ្យកញ្ញាចំណាយពេលវេលា និងចិត្តគំនិតច្រើនក្នុងការផលិត ត្បិតនាងចង់ឲ្យស្នាដៃនីមួយៗចេញទៅមានគុណភាព និងមិនធ្វើឲ្យអ្នកគាំទ្រខ្លួនខកបំណង។ "បើយើងធ្វើលេងៗ វាអត់ជាបញ្ហាទេ តែបើយើងចង់ឲ្យចម្រៀងយើងចេញមកមានទាំងគុណភាព ហើយពីរោះ វាត្រូវឲ្យយើងចំណាយពេលច្រើនមែនទែន" កញ្ចនា រៀបរាប់។
នាង លម្អិតថា មុនចម្រៀង១បទលេចចេញជារូបរាង ជំហានដំបូងគឺត្រូវមានប្រធានបទ ដោយត្រូវសម្រេចចិត្តថាគួរសរសេរចម្រៀងបែបណាដូចជា ស្នេហា កម្សត់ ឬរីករាយ បន្ទាប់មកទើបចាប់ផ្ដើមរៀបរៀងទំនុកច្រៀង និងទំនុកភ្លេង ដោយប្រើជាមួយឧបករណ៍តន្រ្តីហ្គីតា។
ក្រោយចងក្រង ទំនុកច្រៀង និងទំនុកភ្លេងរួច នាងត្រូវបន្តហាត់សមបន្ថែមជាមួយហ្គីតា ហើយថតទុកធ្វើជាសេចក្ដីព្រាងទី១ ឬ 1st Draft។ ពេលយល់ថាសេចក្ដីព្រាងនោះ មានភាពល្អគ្រប់គ្រាន់ ទើបនាងបន្តបញ្ជូនសំឡេងដែលថតរួចទៅឲ្យអ្នកផលិត និងសម្រួលតន្ត្រីក្នុងស្ទូឌីយោស្ដាប់ និងប្រាប់ពីទម្រង់សាច់ភ្លេងដែលខ្លួនចង់បាន។
ទោះសម្រេចបានទំនុកច្រៀង និងសាច់ភ្លេងក្ដី កវីវ័យក្មេងរូបនេះថា នៅតែមានការលំបាក ព្រោះជាទូទៅ ភ្លេងដែលលេងជាមួយតែហ្គីតា១មុខ និងភ្លេងពេញដែលបូកផ្សំពីឧបករណ៍តន្ត្រីជាច្រើនមានភាពខុសគ្នា ដូច្នេះទើបតម្រូវឲ្យនាងព្យាយាមហាត់សមម្ដងទៀតឲ្យស្ទាត់សិន មុនទៅថតសំឡេងជាផ្លូវការ។ ដំណើរការដែលបានរៀបរាប់នេះ អាចចំណាយពេល២ ទៅ៣សប្ដាហ៍ទើបរួចរាល់។
"បើប្រញាប់ខ្លាំងអាចប្រើពេល១០ថ្ងៃ ដើម្បីឲ្យយើងចេះស្ទាត់ មុនយកទៅថត ហើយទម្រាំគេបញ្ចូលសំឡេងយើង(Mastering) ជាមួយភ្លេង គឺត្រូវចំណាយពេលខ្លះទៀត។ និយាយទៅ សរុបជិត១ខែដែរ ដើម្បីបានចម្រៀង១បទ ត្រឹម៣ទៅ៤នាទីហ្នឹង"។ ម្ចាស់បទ "Forgive Me" បញ្ជាក់។
កញ្ចនា ងាកមកបន្ថែមទៀតថា សម្រាប់ 1st Draft ដែលបានរៀបរាប់ខាងលើ អាចចំណាយពេលខ្លីជាងនេះ បើរូបនាងមានអារម្មណ៍សរសេរស្រាប់ ពោលគឺធ្វើត្រឹម១ ឬ២ថ្ងៃគឺរួចរាល់។ ជាមួយគ្នានេះ នាងសង្កត់ន័យទៀតថា ដំណើរការផលិតក្នុងស្ទូឌីយោ គឺនៅតែយូរ ព្រោះត្រូវគិតឲ្យលម្អិតមែនទែនថាគួរដាក់ស្គរបែបណា ភ្លេងបែបណា ឲ្យត្រូវតាមអារម្មណ៍នៃបទចម្រៀង មិនអាចចេះតែចេញទៅដោយមិនបានព្រាងទុកនោះទេ៕