កូនខ្មែរមួយរូបចាយលុយរាប់ពាន់ដុល្លារ បង្កើតសៀវភៅទ្រឹស្ដីអ្នកប្រាជ្ញល្បីៗលើលោក
- 2017-11-29 05:18:41
- ចំនួនមតិ 0 | ចំនួនចែករំលែក 0
កូនខ្មែរមួយរូបចាយលុយរាប់ពាន់ដុល្លារ បង្កើតសៀវភៅទ្រឹស្ដីអ្នកប្រាជ្ញល្បីៗលើលោក
ចន្លោះមិនឃើញ
ជារឿងគួរកោតសរសើរដែលយុវជនខ្មែរម្នាក់ បានសិក្សាស្រាវជ្រាវអំពីទ្រឹស្ដីរបស់អ្នកប្រាជ្ញល្បីៗនៅលើពិភពលោក ដើម្បីចងក្រងធ្វើជាសៀវភៅចែករំលែកចំណេះដឹងដល់ក្មេងជំនាន់ក្រោយ។
រៀបរាប់មកកាន់ Sabay យុវជន ឈុន សំណាង មានស្រុកកំណើតមកពីខេត្តកំពង់ធំ ប្រាប់ថាខ្លួនបានបញ្ចប់ការសិក្សា នៅពុទ្ធិកសាកលវិទ្យាល័យព្រះសីហនុរាជ ជំនាញទស្សនៈវិទ្យា និងព្រះពុទ្ធសាសនា ព្រមទាំងបញ្ចប់ការសិក្សា នៅវិទ្យាស្ថានភាសាបរទេសផ្នែកទំនាក់ទំនងអន្តរជាតិ និងបញ្ចប់ថ្នាក់អនុបណ្ឌិតមកពីប្រទេសឥណ្ឌា ផ្នែកទស្សនវិទ្យា។
មូលហេតុដែលជំរុញឲ្យលោកលះបង់ពេលវេលា និងប្រាក់ផ្ទាល់ខ្លួន ដើម្បីចងក្រងសៀវភៅមួយក្បាលឈ្មោះថា ប្រជុំទ្រឹស្ដីទស្សនវិទូល្បីៗ ដោយសាររូបលោកស្រឡាញ់ផ្នែកទស្សនៈវិទ្យា និងចង់ចែករំលែកចំណេះដឹងរបស់អ្នកប្រាជ្ញល្បីៗនៅលើពិភពលោកទៅកាន់ក្មេងជំនាន់ក្រោយ។ សំណាងបន្តទៀតថា ទស្សនៈវិទ្យា គឺសំខាន់បំផុតសម្រាប់ជីវិតរស់នៅប្រចាំថ្ងៃរបស់មនុស្សម្នាក់ៗ ប្រសិនបើខ្វះមូលដ្ឋានគ្រឹះផ្នែកនេះ នោះមនុស្សម្នាក់ៗមិនអាចគិតពិចារណាបានស៊ីជម្រៅនោះទេ។
មូលហេតុចម្បងមួយទៀតនោះ ដោយសារលោកឃើញថា សៀវភៅទស្សនៈវិទ្យាដែលមានបច្ចុប្បន្នគឺ សុទ្ធតែជាសៀវភៅចាស់ៗសល់ពីជំនាន់មុនៗ អក្សរក៏ពិបាកមើល ពាក្យពេចន៍ប្រើប្រាស់សុទ្ធតែពាក្យពិបាកយល់ ព្រោះជាទស្សនៈសុទ្ធសាធមិនមានការសម្រាយអ្វីឡើយ។ ដូច្នេះហើយបានជាសំណាងចង់បង្កើតសៀវភៅថ្មី ដើម្បីងាយស្រួលសិក្សា ដោយព្យាយាមសម្រាយអត្ថន័យងាយយល់ មានលម្អដោយរូបភាពស្អាតៗពណ៌ធម្មជាតិ និងពាក្យពេចន៍ប្រើប្រាស់តាមបែបសម័យកាលបច្ចុប្បន្នមិនពិបាកយល់នោះទេ។
ទម្រាំចងក្រងបានជាសៀវភៅមួយក្បាលយុវជនវ័យក្មេងរួបនេះប្រាប់ថា ត្រូវទិញសៀវភៅច្បាប់ដើមរបស់អ្នកប្រាជ្ញល្បីៗជាភាសាអង់គ្លេស ដើម្បីយកមកប្រែសម្រួលដូចជា ទ្រឹស្ដីព្រះពុទ្ធ ខុងជឺ ស៊ុង ស្សឺ ហេរ៉ាលីទូស សូក្រាត ផ្លាតូ អារីស្តូត ចាន់ណាខ្យាជាដើម។ បើសរុបជាចំនួនវិញគឺរហូតជាង ៣០ក្បាលឯណោះ ដោយទិញនៅប្រទេសឥណ្ឌាពេលលោកសិក្សានៅទីនោះ។
ចំណែកការចំណាយវិញ សំណាងប្រាប់ថា អស់ប្រមាណជាង ៥ ០០០ ដុល្លារក្នុងនោះត្រូវចំណាយលើថ្លៃអាហារ និងកាហ្វេឲ្យអ្នកឌីហ្សាញសៀវភៅជាប្រចាំថ្ងៃ ថ្លៃទិញសៀវភៅទស្សនៈវិទ្យាជាច្រើនក្បាល និងថ្លៃបោះពុម្ពសៀវភៅចំនួន ១ ០០០ក្បាល និងត្រូវចំណាយពេលវេលារហូតទៅដល់ ៨ខែឯណោះ គិតចាប់ពីខែមីនាមក។
យុវជនរូបនេះរំពឹងថា នៅពេលសៀវភៅនេះចេញលក់ជាផ្លូវការនឹងមានការគាំទ្រច្រើនពីអ្នកសិក្សា ទាំងឡាយ។ ដោយហេតុថា អ្នកអាននឹងទទួលបានចំណេះដឹងជាច្រើនដូចជា ទស្សនៈអ្នកប្រាជ្ញល្បីៗដើម្បីផ្ដល់ជាគំនិតពិចារណា ចំណេះដឹងផ្នែកសាសនា វិទ្យាសាស្ត្រ សេដ្ឋកិច្ច ជាដើម៕