ទស្សនីយភាពសិល្បៈបុរាណ៤ប្រភេទនឹងសម្ដែងជូនក្នុងពិធីបួងសួងមុខប្រាសាទអង្គរ

2017-12-01 11:03:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងវប្បធម៌នឹងបង្ហាញទស្សនីយភាពសិល្បៈបុរាណខ្មែរចំនួន៤ប្រភេទ នៅក្នុងពិធីបួងសួងចម្រើនសេចក្ដីសុខជូនដល់ព្រះរាជាណាចក្រកម្ពុជា និងរាប់បាតរព្រះសង្ឃ ៥០៥០អង្គ ដែលប្រារព្ធធ្វើនៅមុខប្រាសាទអង្គរ នៅថ្ងៃទី០២ និងទី០៣ ខែធ្នូ ឆ្នាំ២០១៧។ នេះបើតាមការឲ្យដឹងរបស់ឯកឧត្តម ម៉ៅ កេង ទីប្រឹក្សាក្រសួងវប្បធម៌ និងវិចិត្រសិល្បៈ។

ឯកឧត្តមបញ្ជាក់ឲ្យដឹងថា ទម្រង់សិល្បៈទាំង៤នេះរួមមាន របាំក្បាច់បុរាណ របាំប្រពៃណី ល្ខោនយីកេ និងល្ខោនបាសាក់ ដែលត្រូវសម្ដែងដោយសិល្បៈករ សិល្បៈការិនីរបស់ក្រសួងវប្បធម៌សរុបប្រមាណ១២០នាក់។ ឯកឧត្តមបញ្ជាក់ថា ទឹកដីអង្គរជាទីក្រុងបុរាណរបស់កម្ពុជា ដូច្នេះការបង្ហាញទម្រង់សិល្បៈបុរាណក៏ជាផ្នែកមួយបង្ហាញពីវប្បធម៌-អរិយធម៌របស់ខ្មែរផងដែរ។

កន្លងមកកម្ពុជាមិនធ្លាប់រៀបចំពិធីក្រុងពាលីបួងសួងសុំសេចក្ដីសុខដ៏ធំសម្បើមបែបដូច្នេះឡើយ ហើយការចូលរួមសម្ដែងទស្សនីយភាពសិល្បៈបុរាណខ្មែរក្នុងពិធីបួងសួងនេះ ក៏ជាបង្ហាញពីភាពអធិកអធម និងជាផ្នែកមួយដ៏សំខាន់ដើម្បីបង្ហាញថា កម្ពុជាមានភាពថ្លៃថ្នូរក្នុងសុខសន្ដិភាព ហើយប្រទេសយើងក៏កំពុងអភិវឌ្ឍន៍ធ្វើដំណើរទៅមុខដូចបណ្ដាប្រទេសដទៃទៀតផងដែរ។

ឯកឧត្តម ខៀវ កាញារីទ្ធ រដ្ឋមន្ដ្រីក្រសួងព័ត៌មាន និងជាមន្ដ្រីនាំពាក្យរាជរដ្ឋាភិបាលកម្ពុជា បានថ្លែងឲ្យដឹងថា បើគិតតាមផែនការ ការរៀបចំទីតាំងសម្រាប់ប្រារព្ធពិធីបួងសួងចម្រើនសេចក្ដីសុខជូនដល់ព្រះរាជាណាចក្រកម្ពុជា គឺសម្រេចបាន ៩០%ហើយ។ ដោយឡែកពាក់ព័ន្ធទៅនឹងការងារផ្សព្វផ្សាយវិញក៏សម្រេចបានប្រមាណ ៩០%ផងដែរ ដោយមានការសហការជាមួយនឹងស្ថានីយ៍ទូរទស្សន៍ និងវិទ្យុនានា។

កឧត្តមបញ្ជាក់ថា មានអ្នកសារព័ត៌មានជាតិនិងអន្ដរជាតិប្រមាណ ១៤០នាក់នឹងចូលរួមក្នុងពិធីនេះផងដែរ។ ឯកឧត្តមរដ្ឋមន្ដ្រីក្រសួងព័ត៌មានបានបញ្ជាក់ឲ្យដឹងថា កន្លងមកកម្ពុជាធ្លាប់រៀបចំពិធីបួងសួងច្រើនលើកមកហើយនៅបរិវេណប្រាសាទអង្គរវត្តជាក់ស្ដែងដូចជានៅពិធីបុណ្យមាឃបូជាជាដើម។ ប៉ុន្ដែសម្រាប់ការបួងសួងថ្នាក់រាជរដ្ឋាភិបាលដែលមានមន្ដ្រីគ្រប់ជាន់ថ្នាក់ចូលរួមបែបនេះ គឺជារៀបចំជាលើកទី១ប៉ុណ្ណោះ។ ឯកឧត្តមបន្ថែមថា ការរៀបចំពិធីបួងសួងនេះក្រៅតែសុំសេចក្ដីសុខ និងរំលឹកគុណដល់វត្ថុសក្ដិសិទ្ធ ម្ចាស់ទឹកម្ចាស់ក្ដី ក៏ជាការបង្ហាញពីភាពរឹងមាំរបស់ប្រជាជាតិខ្មែរផងដែរ។

អត្ថបទ៖ រស់ សុជាតិ