មកស្គាល់ជើងខ្លាំងថតរូបចាស់វស្សា ៥ រូប ជាអ្នកឲ្យពិន្ទុក្នុងកម្មវិធីថតរូបធំប្រចាំឆ្នាំនៅកម្ពុជា

2017-12-03 04:54:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតថតរូបធំប្រចាំឆ្នាំ Canon PhotoMarathon Cambodia លើកទី៧ កំពុងចាប់ផ្ដើមនៅថ្ងៃអាទិត្យនេះ នៅកោះពេជ្រ ដោយចែកជា ២ ផ្នែក៖ Open Category (ចាប់ពី ១៨ ឆ្នាំឡើង) និង Student Category (ក្រោម ១៨ ឆ្នាំ)។ ខណៈការប្រកួតកំពុងចាប់ផ្ដើម Sabay សូមបង្ហាញគណៈកម្មការឲ្យពិន្ទុ ៦ រូប ក្នុងនោះ ៥ រូបជាជើងខ្លាំងថតរូបចាស់វស្សានៅកម្ពុជា៖

១. លោក Jerry Thai មានឈ្មោះដើម Thai Vantha ជាស្ថាបនិកក្រុមហ៊ុនថតរូបលេចធ្លោនៅកម្ពុជា @homePhotography ។ ស្នាដៃថតរូបរបស់លោក ត្រូវបានដាក់បង្ហាញនៅក្នុងស្រុក និងក្រៅស្រុកផងដែរ ខណៈដែលចំណង់ចំណូលចិត្តរបស់លោក គឺរូបថតបែបទេសភាព (Landscape) អាហារ (Food) និង Macro។ ក្រៅពីមានក្រុមហ៊ុនផ្ទាល់ខ្លួន លោកក៏ជាគ្រូបង្រៀននៅ Canon Imaging Academy។

២. លោក Miller មានឈ្មោះពេញថា Phan Phearith គឺជាអ្នកថតរូបដ៏ល្បីឈ្មោះនៅក្នុងសហគមន៍ក្នុងស្រុក។ លោកបានបញ្ចប់វគ្គសិក្សាថតរូបនៅវិទ្យាស្ថានបារាំងកាលពីឆ្នាំ២០១២។ លោកជាប់ជាជយលាភីក្នុងកម្មវិធី Photo Marathon 2011 និង Canon Photo Shootout 2012 ហើយជាអ្នកតំណាងឲ្យប្រេន Canon នៅកម្ពុជាដំបូងគេផងដែរ។

៣. លោក Moni មានឈ្មោះពេញ Md. Monirul ចាប់ផ្ដើមថតរូបតាំងពីអាយុ ១២ ឆ្នាំម្ល៉េះ។ Moni ធ្វើការងារជា Freelance ថតរូបមង្គលការ ព្រឹត្តិការណ៍កីឡា ព្រមទាំងថតរូបឲ្យក្រុមហ៊ុនស្ថាបត្យកម្ម និងក្រុមហ៊ុនផ្សព្វផ្សាយពាណិជ្ជកម្មផងដែរ។ បច្ចុប្បន្ន លោកមានការងារមួយទៀត គឺគ្រប់គ្រងមហាវិទ្យាល័យព័ត៌មាន និងបច្ចេកវិទ្យា និងពាណិជ្ជកម្ម និងសាលា Limkokwing។ បុរសជនជាតិបង់ក្លាដេសរូបនេះ បើកថ្នាក់បង្រៀនថតរូបជាប្រចាំ ដើម្បីចែករំលែកចំណេះដឹង។

៤. លោក Khvay Samang ជាខេត្តស្វាយរៀង ហើយរៀនចប់នៅដេប៉ាតឺម៉ង់គំនូរនៅសាកលវិទ្យាល័យភូមិន្ទវិចិត្រសិល្បៈ។ ស្នាដៃរូបថតរបស់លោកផ្ដោតលើផលប៉ះពាល់លើមនុស្ស និងបរិស្ថានដោយនឹមអាណានិគម និងសកលភាវូបនីយកម្ម។ ការធ្វើដំណើរច្រើន ជាបច្ចេកទេសដើម្បីបានរូបទាំងអស់ និងផ្សារភ្ជាប់ខ្លួនលោកទៅនឹងសហគមន៍មូលដ្ឋាន។ ស្នាដៃធំៗរបស់លោក ត្រូវបានដាក់តាំងពិព័រណ៍នៅតាមប្រទេសធំៗលើពិភពលោក មាន អាមេរិក បារាំង អាល្លឺម៉ង់ ជប៉ុន កាណាដា អូស្ត្រាលី ក្រិក សិង្ហបុរី ថៃ ជាដើម។

បុរសវ័យ ៣៦ ឆ្នាំរូបនេះ សហស្ថាបនិកគម្រោង Sa Sa Art ហើយលោកបង្រៀនសិល្បៈបែបសហសម័យ ដល់អ្នកសិល្បៈកម្ពុជានៅទីនោះផងដែរ។

៥. លោក Tang Chhin Sothy ត្រូវគេចាត់ទុកថាជាអ្នកថតរូបដ៏ជោគជ័យម្នាក់នៅសម័យនេះ។ បច្ចុប្បន្ន លោកជាអ្នកថតរូបបែបព័ត៌មានឲ្យទីភ្នាក់ងារសារព័ត៌មានបារាំង AFP ជាង ១០ ឆ្នាំមកហើយ។ បុរសពេញដោយបទពិសោធថតរូបផ្នែកសារព័ត៌មានរូបនេះ បានឆ្លងកាត់ការបណ្ដុះបណ្ដាលផ្នែកថតរូបនៅសាកលវិទ្យាល័យវិចិត្រសិល្បៈកាលឆ្នាំ ១៩៩៦ និងឆ្លងកាត់វគ្គថតរូបផ្នែកសារព័ត៌មាននៅថៃ។

លោកមានស្នាដៃតាំងពិព័រណ៍ច្រើន ជាពិសេសចន្លោះឆ្នាំ ១៩៩៨ និង ២០០៥។ ឆ្នាំ២០១៦ លោកជាប់លេខផ្នែក Cambodia Sport 2015 របស់គណៈកម្មាធិការជាតិអូឡាំពិកកម្ពុជា។ ២០១១ លោកជាប់លេខ១ ក្នុងការប្រកួតរបស់ UNFPA និង CCIM។ ២០០១ និង ២០០២ លោកឈ្នះពាន "Excellent Prize" ពីមជ្ឈមណ្ឌលវប្បធម៌អាស៊ី-ប៉ាស៊ីហ្វិកសម្រាប់ UNESCO នៅជប៉ុន។

៦. លោក Ngoun Serath ជាអ្នកកាសែតជើងចាស់តាំងពីឆ្នាំ១៩៩៧ មកម្ល៉េះ និងធ្លាប់ជានាយកប្រតិបត្តិក្លឹបអ្នកកាសែតកម្ពុជាដែលទើបតែលាឈប់កាលពីឆ្នាំ២០១៦។ បុរសជោកជាំដោយបទពិសោធសារព័ត៌មានរូបនេះ រៀនចប់អនុបណ្ឌិតផ្នែកសារព័ត៌មាននៅហ្វីលីពីន ហើយក៏ជាស្ថាបនិកវិបសាយសុខភាព Health.com.kh។ បច្ចុប្បន្ន លោកក៏ជាសាស្ត្រាចារ្យផ្នែកទំនាក់ទំនងសាធារណៈនៅដេប៉ាតឺម៉ង់ប្រព័ន្ធផ្សព្វផ្សាយ និងទំនាក់ទំនងនៅសាកលវិទ្យាល័យភូមិន្ទភ្នំពេញ៕

អត្ថបទ៖ សុផាត