ដី និងវិមានមហាសេដ្ឋីដាក់លក់ ២៥០លានដុល្លារ ប៉ុន្តែមានលក្ខខណ្ឌពិសេស១

2017-12-04 02:11:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ដីជាង ២ម៉ឺនហិកតារ និងវិមាននានារបស់មហាសេដ្ឋីប្រេង T. Boone Pickens បានប្រកាសដាក់លក់ក្នុងតម្លៃកប់ពពក ២៥០លានដុល្លារ ប៉ុន្តែអ្នកចង់ទិញកម្មសិទ្ធិអចលនទ្រព្យដ៏មហាសាលនោះ ត្រូវអភិរក្សធនធានធម្មជាតិ និងការពារជីវិតសត្វ។

កម្មសិទ្ធិរបស់មហាសេដ្ឋីប្រេងនេះមានឈ្មោះ Mesa Vista Ranch មានទំហំសរុប ៦៥០០០រ៉ៃ(ស្មើនឹង ២៦៣០៥ហិកតារ)ស្ថិតនៅរដ្ឋ Texas សហរដ្ឋអាមេរិក។ នៅលើផ្ទៃដីដ៏ធំនោះ មានវិមានស្កឹមស្កៃជាច្រើន បឹងសិប្បនិម្មិត ទន្លេ ជម្រកសត្វព្រៃ ព្រមទាំងព្រលានយន្តហោះ ដែលមានផ្លូវរត់យ៉ាងវែងផងដែរ។

ទោះបីដាក់លក់មែនពិត ប៉ុន្តែទាល់តែត្រូវតាមលក្ខខណ្ឌ ទើបមហាសេដ្ឋីវ័យ ៨៩ឆ្នាំ ព្រមព្រៀងលក់ឲ្យ។ លក្ខខណ្ឌនោះគឺ អ្នកទិញ ត្រូវធានាការពារធនធានធម្មជាតិ ព្រមទាំងរក្សាជីវិតសត្វព្រៃ ដូចដែលលោកបានធ្វើពីមុនមក។ មហាសេដ្ឋី T. Boone Pickens ជាមនុស្សស្រលាញ់ធម្មជាតិណាស់ ដូចនេះហើយទើបលោកព្យាយាមកែច្នៃដីនេះឲ្យមានសម្រស់ រួមទាំងដាំដើមឈើប្រមាណ ២ម៉ឺនដើមផងដែរ។

ក្រៅពីសម្រស់ធម្មជាតិ នៅលើកម្មសិទ្ធិអចលនទ្រព្យដ៏មហាសាលនេះ មានទីលានវាយកូនហ្គោល ទីលានវាយតេនីស ព្រមទាំងវិមានស្នាក់នៅដ៏ធំ ដែលមានទាំងរោងភាពយន្តអាចឲ្យមនុស្ស ៣០នាក់អង្គុយទស្សនាផងដែរ។ ចំណែកព្រលានយន្តហោះឯកជននោះ មានផ្លូវរត់ជិត ២គីឡូម៉ែត្រ។

តាមរបាយការណ៍បានបង្ហាញថា ដំបូងឡើយមហាសេដ្ឋី T. Boone Pickens មានទ្រព្យសរុបប្រមាណ ១ប៊ីលានដុល្លារ ប៉ុន្តែមួយរយៈចុងក្រោយ ជួបវិបត្តិខ្លះ ហើយធ្លាក់ទ្រព្យសម្បត្តិមកនៅត្រឹម ៥០០លានដុល្លារប៉ុណ្ណោះ៕