កសិករដង្ហោយសុំប្រមុខរាជរដ្ឋាភិបាល ជួយអន្តរាគមន៍ឲ្យតម្លៃជ្រូករស់ ងើបឡើងវិញ
- 2017-12-04 06:54:03
- ចំនួនមតិ 0 | ចំនួនចែករំលែក 0
កសិករដង្ហោយសុំប្រមុខរាជរដ្ឋាភិបាល ជួយអន្តរាគមន៍ឲ្យតម្លៃជ្រូករស់ ងើបឡើងវិញ
ចន្លោះមិនឃើញ
រយៈពេលជាងមួយឆ្នាំមកនេះ តម្លៃជ្រូករស់បន្តធ្លាក់ថ្លៃមកជាង ៥ពាន់រៀលក្នុងមួយគីឡូក្រាម ដែលបណ្ដាលឲ្យម្ចាស់កសិដ្ឋានចិញ្ចឹមជ្រូកនៅតាមបណ្ដាខេត្តមួយចំនួនទ្រាំទ្រលែងរួច និងបានប្រមូលផ្ដុំគ្នាសុំឲ្យរាជរដ្ឋាភិបាលជួយឲ្យតម្លៃប្រសើរឡើងវិញ ដោយស្នើរត្រឹមតម្លៃ៨ ០០០រៀលក្នុងមួយគីឡូក្រាម ក៏ថាសមល្មមសម្រាបកសិករអាចបន្តរបរទៅមុខដែរ។
លោក ដេត ភិរម្យ អនុប្រធានៃសមាគមអ្នកចិញ្ចឹមសត្វកម្ពុជា ថ្លែងក្នុងសន្និសីទសារព័ត៌មាននាព្រឹកនេះថា វិបត្តិតម្លៃជ្រូករស់ដែលធ្លាក់ចុះជាងមួយឆ្នាំមកនេះ ដោយសារការនាំជ្រូកដោយអនាធិបតេយ្យពីប្រទេសជិតខាង ដោយពុំមានការត្រួតពិនិត្យបានត្រឹេមត្រូវ ។ លោកថាៈ«យ៉ាងហោចណាស់មានជ្រូកប្រមាណ ៣ពាន់ក្បាលត្រូវបាននាំចូលជារៀងរាល់ថ្ងៃ ខណៈរដ្ឋាភិបាលបានកំណត់កន្លងមកឲ្យនាំចូលត្រឹមតែ ១២៥០ក្បាលប៉ុណ្ណោះ ខណៈជ្រូក(ក្នុងស្រុក)មួយក្បាលលក់ខាត ប្រមាណពី ១០ទៅ ១៥ម៉ឺនរៀល»។
លោកបន្តថា ប្រការនេះ បានធ្វើឲ្យប៉ះពាល់ធ្ងន់ធ្ងរដល់វិស័យចិញ្ចឹមជ្រូកនៅកម្ពុជា នាំឲ្យកសិដ្ឋានចិញ្ចឹមជ្រូកខ្លះប្រឈមនឹងការដួលរលំបិទកសិដ្ឋាន ហើយប្រសិនបើពុំមានវិធានការមានប្រសិទ្ធភាព និងទាន់ពេលវេលាទេនោះ កសិដ្ឋានចិញ្ចឹមជ្រូកជាច្រើនទៀត ទាំងលក្ខណៈគ្រួសារ និង លក្ខណៈស្សាហកម្ម នឹងត្រូវបិទទ្វារជាបន្តបន្ទាប់ទៀតជាមិនខាន ។
ទន្ទឹមគ្នានេះ លោក ប៊ុន ហៀង សមាជិកនៃសមាគម និងជាម្ចាស់កសិកដ្ឋានមួយរូប លើកឡើងថាៈ«ខ្ញុំគិតថាតម្លៃប្រហាក់ប្រហែល ៨ពាន់រៀល កសិករអាចរស់បានហើយ បើទោះបីជាចំណេញតិចក៏ដោយ តែគាត់អាចលៃលកចំណីជ្រូកបានច្រើនយ៉ាង ...ប៉ុន្តែសម្រាប់កសិដ្ឋានធំៗគាត់ត្រូវចំណាយចំណីសត្វច្រើន ការចិញ្ចឹមបានផលច្រើន ហើយចំណេញក៏ច្រើនជាង»។
លោកបញ្ជាក់ថា ឈ្មួញបានទិញជ្រូកពីកសិករក្នុងតម្លៃ ៥៥០០រៀល ហើយយកទៅលក់លើទីផ្សារសព្វថ្ងៃបានតម្លៃ ១ម៉ឺន ២ពាន់រៀលមួយគីឡូឡើងទៅសម្រាប់សាច់កាប់រួចហើយ។
លោកស្រី មន ណារី ជាសមាជិកនៃសមាគម និងជាកសិករខ្នាតមធ្យមនៅស្រុកកៀនស្វាយ សង្ឃឹមថារដ្ឋាភិបាលនឹងជួយឲ្យតម្លៃជ្រូករស់ បានខ្ពស់ត្រឹមតម្លៃ ៨ពាន់រៀល។ រយៈពេលជាងមួយឆ្នាំមកនេះ លោកស្រីតស៊ូចិញ្ចឹមជ្រូកចំនួន ១០០ក្បាល និងខាតបង់មិនស្ទើរនោះទេ ដោយសារថាតម្លៃជ្រូករស់លក់ឲ្យឈ្មួញទាបជាងថ្លៃដើម ប៉ុន្តែយ៉ាងណាលោកស្រីនៅតែសង្ឃឹមថាសម្ដេចនាយករដ្ឋមន្ត្រីនឹងអាចជួយដោះស្រាយបញ្ហាកសិករបាន៕