ផល វិស័យ ឡើងឲ្យទឹកកីឡាករថៃ គ្រាន់បានលុយដោះស្រាយជីវភាពប្រចាំថ្ងៃ
- 2017-12-05 02:59:28
- ចំនួនមតិ 0 | ចំនួនចែករំលែក 0
ផល វិស័យ ឡើងឲ្យទឹកកីឡាករថៃ គ្រាន់បានលុយដោះស្រាយជីវភាពប្រចាំថ្ងៃ
ចន្លោះមិនឃើញ
ក្មេងប្រុស ផល វិស័យ ដែលអ្នកមើលប្រដាល់ផ្ទាល់នៅសង្វៀនបាយ័នស្ទឹងមានជ័យ ប្រហែលជាស្គាល់ហើយ ឃើញមុខស្ទើររាល់សប្ដាហ៍គេតែងឡើងទៅឲ្យទឹកកីឡាករថៃពេលដែលប្រកួតជាមួយកីឡាករកម្ពុជាបច្ចុប្បន្ន។
ផល វិស័យ បានឲ្យដឹងថា រូបគេឡើងឲ្យទឹកកីឡាករថៃប្រហែល៥ឆ្នាំមកហើយ ការងារមួយនេះជាចំណូលធំសម្រាប់គេដើម្បីបានថវិកាយកទៅប្រើប្រាស់ប្រចាំថ្ងៃ។ ដំបូងឡើយគេគ្រាន់តែទៅប្រកួត ឬទៅមើលការប្រកួតនៅសង្វៀនបាយ័នប៉ុណ្ណោះទេ យូរៗទៅស្គាល់គេច្រើនហើយអ្នកនាំកីឡាករថៃ គេខ្វះអ្នកឲ្យទឹកក៏ហៅខ្លួនឲ្យជួយរហូតដល់បច្ចុប្បន្ននេះតែម្ដង។
អ្នកប្រដាល់វ័យ ១៧ឆ្នាំរូបបន្ថែមថា ឲ្យទឹកកីឡាករថៃក្នុងមួយកម្មវិធីបានប្រាក់ ៥៥០០០រៀល ហើយក្នុងមួយសប្ដាហ៍គេឡើងឲ្យទឹកបាន២លើក គឺថ្ងៃសុក្រ និងអាទិត្យ បើសរុបទៅក្នុង១ខែអាចរកប្រាក់បានចន្លោះពី ៤០-៥០ ម៉ឺនរៀល។ ការងារមួយនេះក៏មិនសូវជាស្រួលប៉ុន្មានដែរ តែដោយចិត្តស្រឡាញ់ខាងប្រដាល់ ការងារខាងប្រដាល់ទើបជំរុញឲ្យគេនៅបន្តធ្វើរាល់ថ្ងៃ ណាមួយក៏បានលុយទាំងនោះមកដោះស្រាយជីវភាពប្រចាំថ្ងៃដូចជាទិញម្ហូបជាដើម។
ផល វិស័យ ជាកីឡាករមកពីក្លឹបប្រដាល់កុមារទេពមានរិទ្ធិ កំពុងហ្វឹកហាត់នៅឯស្តាអូឡាំពិក បច្ចុប្បន្នគេមានវ័យ១៧ឆ្នាំ។ ក្រៅពីឡើងសង្វៀនប្រដាល់គេក៏ឆ្លៀតឲ្យទឹកកីឡាករថៃផងដែរ ជាក់ស្ដែងថ្ងៃអាទិត្យសប្ដាហ៍មុនបានឡើងឲ្យទឹកកីឡាករថៃ Watchhailak ពេលប៉ះជាមួយ ឡុង សុភី ទៀតផង៕