Ronaldo ត្រូវការ៣គ្រាប់នៅយប់នេះ ដើម្បីរក្សាកំណត់ត្រាអស្ចារ្យរបស់ខ្លួន

2017-12-06 06:59:28
ចំនួនមតិ 0 | ចំនួនចែករំលែក 0

ចន្លោះមិនឃើញ

Real Madrid នឹងត្រូវបើកកីឡដ្ឋានរបស់ខ្លួនស្វាគមន៍ក្រុមភ្ញៀវ Borussia Dortmund ក្នុងការប្រកួតបិទពូលនៃពានរង្វាន់ UEFA Champions League វេលាម៉ោង២:៤៥នាទី។

ការប្រកួតនេះដែរ គ្រាន់តែជាប្រកួតបង្គ្រប់កិច្ចប៉ុណ្ណោះ បើទោះជាឈ្នះ ចាញ់ឬស្មើ ក៏ក្រុមរបស់លោក Zidane នៅតែបានលេខ២ក្នុងពូលឡើងទៅវគ្គបន្ដដដែល។ រឿងមួយដែល Real Madrid ត្រូវការនោះ គឺខ្សែប្រយុទ្ធ Cristiano Ronaldo ចង់បាន៣គ្រាប់ជាចាំបាច់ ដើម្បីរក្សាកំណត់ត្រាចាស់របស់ខ្លួនដែលធ្លាប់ធ្វើបានកាលពីរដូវកាល២០១៥-១៦។

កាលពីរដូវកាល២០១៥-១៦ Ronaldo រកបាន១១គ្រាប់ក្នុងវគ្គសន្សំពិន្ទុតាមពូល ដែលធ្វើឱ្យរូបគេក្លាយជាកីឡាករអស្ចារ្យមួយរូបធ្វើបានដូច្នេះ។ ស្របពេលរដូវកាលនេះវិញ ខ្សែប្រយុទ្ធចាស់វស្សារូបនេះ រកបាន៨គ្រាប់ហើយ ឆ្លងកាត់៥ប្រកួតកន្លងមក។ នេះបញ្ជាក់ថារូបគេត្រូវការយក៣គ្រាប់ទៀតនៅយប់នេះ ដើម្បីរក្សាកំណត់ត្រារបស់ខ្លួន ឬរកឱ្យបានច្រើនជាងនេះ បំបែកកំណត់ត្រាឆ្នាំចាស់តែម្ដង។

កីឡាករដែលគេរំពឹងថានឹងឈ្នះពានBallon dÓr ជាលើកទី៥ខាងលើនេះ ទើបតែរកបាន២គ្រាប់ប៉ុណ្ណោះនៅលីគ La Liga របស់អេស្ប៉ាញ ស្របពេលដែលការរកគ្រាប់បាល់បានតិចនេះ ធ្វើឱ្យមានមតិរិះគន់យ៉ាងច្រើន។ ផ្ទុយទៅវិញ នៅ Champions League កីឡាករដែលមិនផឹកស្រាម្នាក់នេះ ហាក់ដូចជាធ្វើបានល្អទៅវិញ៕

ប្រភព៖ Marca ប្រែសម្រួល៖ មុន្នីរម្យ