ពេជ្រ ម្ទេសខ្មាំង ប្រកាន់គោលជំហរមួយពេល ឡើងសង្វៀនប្រកួត

2017-12-07 03:43:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់មេដាយសំរឹទ្ធស៊ីហ្គេម ឆ្នាំ២០១៧ ពេជ្រ ម្ទេសខ្មាំង ប្រកាន់គោលជំហរមួយនៅពេលឡើងសង្វៀននោះគឺ មិនអាណិត ឬវ៉ៃឡំៗ នោះទេទោះកម្មវិធីប្រកួតធំឬតូចក៏ដោយ។

ពេជ្រ ម្ទេសខ្មាំង

កីឡាករ ពេជ្រ ម្ទេសខ្មាំង បានឲ្យដឹងថា នៅពេលឡើងប្រកួតតាមសង្វៀននានា ឬការប្រកួតនៅក្រៅប្រទេសក្ដី រូបគេមិនអាណិតដៃគូនោះទេ ឡើងទៅគឺដឹងតែវ៉ៃតែម្ដង បើទោះជាដៃគូខ្លាំង ឬខ្សោយយ៉ាងណាក៏ដោយបើអាចវ៉ៃឲ្យសន្លប់គឺផ្ដាច់ហើយ។

ពេជ្រ ម្ទេសខ្មាំង ឈ្នះមេដាយមាសជើងឯកជាតិ

ម្ចាស់មេដាយមាសជើងឯកជាតិឆ្នាំ២០១៧ បន្តថា មានពេលខ្លះដៃគូសុំឲ្យរូបគេវ៉ៃល្មមៗក៏ដោយ តែខ្លួនមិនអាណិតនោះទេ ហើយជាពិសេសទៀតនោះគឺប៉ះបរទេសដូចជាថៃជាដើម វាជំរុញទឹកចិត្តខ្លួនឲ្យរឹតតែខំវ៉ៃថែមទៀត។ ម្ទេសខ្មាំង ប្រាប់ទៀតថា មិនចង់ទម្លាប់ខ្លួនវ៉ៃត្រឹមតែឈ្នះពិន្ទុហើយឈប់វ៉ៃនោះទេ គឺអត់ល្អហើយក៏មិនចង់ឲ្យអ្នកទស្សនាមិនពេញទៅនិងការវ៉ៃមិនអស់របស់ខ្លួនដែរ យ៉ាងច្រើនពេលចុះពីសង្វៀនវិញសុំទោសគ្នាទៅបានហើយ។«ខ្ញុំវ៉ៃគឺអត់ចេះអាណិតដៃគូនោះទេ វ៉ៃរហូតទល់តែទស្សនិជននិយាយថា វ៉ៃច្រើនដូចនេះបើចាញ់ក៏អស់ចិត្តដែរ» សម្ដី ពេជ្រ ម្ទេសខ្មាំង។

ពេជ្រ ម្ទេសខ្មាំង ពេលឈ្នះនៅ Khmer-Thai Fight

ពេជ្រ ម្ទេសខ្មាំង ជាកីឡាករជើងខ្លាំងមួយរូបរបស់ប្រទេសកម្ពុជា ហើយគេក៏ជាម្ចាស់មេដាយសំរឹទ្ធស៊ីហ្គេមឆ្នាំ២០១៧ នៅឯប្រទេសម៉ាឡេស៊ីទៀតផង។ រាល់ការប្រកួតរបស់គេតែងតែជក់ចិត្តនិងភាគច្រើនមិនដល់ទឹកទី៥នោះឡើយ ជាក់ស្ដែង២ប្រកួតចុងក្រោយនេះផ្ដួលដៃគូឲ្យសន្លប់ទឹកទី១ដូចគ្នា មួយនៅកម្មវិធី Khmer-Thai Fight និងទី២ កម្មវិធីជ្រើសរើសជើងឯកថ្នាក់ជាតិប្រដាល់សកលឆ្នាំ២០១៧។ នៅថ្ងៃសុក្រ ទី៨ ស្អែកនេះគេនឹងត្រូវប៉ះជាមួយកីឡាករថៃ នៅសង្វៀនបាយ័នស្ទឹងមានជ័យចាប់ពីម៉ោង ៧យប់តទៅ៕

អត្ថបទ៖ នួន ស៊ីណា