លឿនដូចផ្លេកបន្ទោរ រ៉ូណាន ចាន់ណា បើកហាងកាហ្វេភ្លាម ក្រោយផ្អាកផលិតកុន

2017-12-07 03:50:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ទើបតែកន្លងទៅមិនដល់មួយខែផង ដែលផលិតករវ័យក្មេង រ៉ូណាន ចាន់ណា បានប្រកាសឈប់ផលិតកុនទៅធ្វើជំនួញផ្សេងវិញ។ ស្រាប់តែឥឡូវនេះ លោកបើករបររកស៊ីនោះបានបាត់ ជាជំនួញហាងកាហ្វេថ្មីមួយនៅតំបន់ខាងកើតរាជធានីភ្នំពេញ។

ហាងកាហ្វេផ្ទាល់ខ្លួនដែលជាជំនួញថ្មីបន្ទាប់ពីដកខ្លួនពីវិស័យសិល្បៈនេះ រ៉ូណាន បានដាក់ឈ្មោះថា “Artist Coffee” មានទីតាំងនៅជិតរង្វង់មូលព្រែកតាមាក់ ដែលទើបបើកដំណើរជាផ្លូវការនៅព្រឹកថ្ងៃនេះតែម្ដង បន្ទាប់ពីធ្វើពិធីសម្ពោធទ្រង់ទ្រាយតូចតាមទំនៀមទម្លាប់ប្រពៃណីកាលពីរសៀលថ្ងៃម្សិលមិញ។

ដំណើរការជំនួញដែលកំពុងពេញនិយមនេះ ម្ចាស់ហាង បញ្ជាក់ថា ពុំមានការអញ្ជើញមិត្តភ័ក្ដិក្នុងសិល្បៈណាចូលរួមឡើយ ដោយសារតែលោកយល់ថា ទីតាំងអាជីវកម្មរបស់ខ្លួន នៅឆ្ងាយពីរាជធានី និងត្រូវឆ្លងទឹកផង ទើបមិនចង់រំខានមិត្តភ័ក្ដិ។

ពាក់ព័ន្ធជំនួញនេះដដែល ផលិតករមកពីខេត្តបន្ទាយមានជ័យប្រាប់ថា លោកផ្ដើមមានគំនិតចង់រកស៊ីជាយូរមកហើយ តាំងពីលោកចាប់ផ្ដើមផលិតរឿង “សរសរកន្លោង” ម្ល៉េះ ផ្សំនឹងមានការនឿយណាយខ្លះៗក្នុងការងារផលិតកុនផង ទើបលោកដាក់ការផ្ដោតទៅលើមុខមួយនេះ និងឈានដល់ការបើកដំណើរការឆាប់រហ័សដូច្នេះ។ មុនពេលបើក លោកបាន យកពេលសល់ពីការងារផលិតកុន ធ្វើការសិក្សាលើរូបមន្ត និងជ្រើសរើសទីតាំង ហើយចុងក្រោយ ក៏សម្រេចយកព្រែកតាមាក់នេះតែម្ដង។

“ខ្ញុំសម្រេចយកទីតាំងនៅទីនេះ ដោយសារតែនៅទីនេះ នៅជិតសាលារៀន ធានាគារ មន្ទីរពេទ្យ និយាយទៅវាប្រជុំជនធំមួយ ហើយសំខាន់ជាងនេះ អត់ទាន់មានហាងកាហ្វេផ្សេងបើកផង”។ រ៉ូណាន ថ្លែង។

ខុសពីអាជីវកម្មផ្សេងៗ រ៉ូណាន បានចាប់យកទីតាំងក្រៅទីតាំងក្រៅក្រុង គឺព្រែកតាមាក់ ធ្វើជាទីយុទ្ធសាស្រ្ត។ តាមចក្ខុវិស័យរបស់លោក គឺលោកនឹងពង្រីកខ្លួនពីតំបន់ក្រៅក្រុងនេះ ឆ្ពោះទៅទីក្រុងវិញ ហើយនៅពេលខាងមុខ លោកនឹងដំណើរការសាខាមួយបន្ថែមទៀត។ ប៉ុន្តែក៏នឹងប្រើពេលវេលា រង់ចាំមើលពីដំណើរការ ក៏ដូចជាការគាំទ្រចំពោះសាខាដំបូងនេះសិនដែរ។

វិលមករូបមន្តរបស់ “Artist Coffee” ម្ចាស់ហាងបង្ហើបថា លោកសម្រេចប្រើគ្រាប់កាហ្វេមកពីបរទេស មិនប្រើគ្រាប់កាហ្វេក្នុងស្រុកទេ។ លោកមិនបានពន្យល់ពីបញ្ហានេះឡើយ ប៉ុន្តែលោកថា ត្បិតគ្រាប់កាហ្វេនាំចូលពីបរទេស តែលោកបានប្រើរូបមន្តកែប្រែតិចតួចដើម្បីឲ្យមានរសជាតិ សមស្របសម្រាប់ទីផ្សារក្នុងស្រុកទទួលយកបាន។

“Artist Coffee” បានបើកដំណើរការក្រោមទឹកប្រាក់វិនិយោគប្រមាណជាង ២ម៉ឺនដុល្លារអាមេរិក។ រ៉ូណាន ចាន់ណា អះអាងថា មិនមែនជាម្ចាស់ដាច់តែម្នាក់ឯងទេ គឺលោកបានចូលហ៊ុនជាមួយប្អូនប្រុសម្នាក់ ដែលជាតារាសម្ដែងម្នាក់ ហើយលោកបានប្រគល់ការងារមើលការខុសត្រូវលើម្ចាស់ភាគហ៊ុននេះតែម្ដង៕

អត្ថបទៈ ប៊ុនណា សភា