ស្រាយចម្ងល់ មហោ​ស្រព​ភាព​យន្ត​ជាតិលើកទី៥ មានរឿងផលិតដោយបរទេសចូលរួម

  • 2017-12-07 09:39:36
  • ចំនួនមតិ

ចន្លោះមិនឃើញ

ក្នុងចំណោមភាពយន្តទាំង ៨ ដែលជាប់ជម្រើសក្នុងមហោស្រពភាពយន្តជាតិលើកទី៥នេះ មាន៣រឿងដែលផលិតនៅក្នុងប្រទេសកម្ពុជាពិតមែន តែជាភាពយន្តដែលដឹកនាំផលិត និងថតដោយជនជាតិបរទេស ដូចជាភាពយន្តរឿង «Jailbreak» រឿង «មុនពេលដួលរលំ និង រឿង «តម្លៃសេ្នហ៌»។ ហេតុនេះបណ្តាលឱ្យមានផលិតករខ្មែរមួយចំនួនមានមតិថា មិនយុត្តិធម៌ ដោយទទួលស្គាល់ថាការផលិតរបស់បរទេសប្រសើរជាងខ្លួន ព្រោះមានទាំងបច្ចេកទេសល្អ និងដើមទុនចំណាយច្រើន។

Jailbreak ដឹកនាំរឿងដោយ លោក Jimmy Henderson
មុនពេលដួលរលំ ដឹកនាំរឿងដោយ លោក Ian White
តម្លៃសេ្នហ៌ ដឹកនាំរឿងដោយ លោក ម៉ាធ្យូ រ៉ូប៊ីនសុន

ឆ្លើយតបនឹងការលើកឡើងបែបនេះ លោក ប៉ុក បូរក្ស ប្រធានស្តីទីនាយកដ្ឋានសិល្បៈភាពយន្ត បានប្រាប់ Sabay ឱ្យដឹងថា ការប្រកួតប្រជែងនេះគឺធ្វើទៅតាមគោលការណ៍ប៉ុណ្ណោះ គឺភាពយន្តណាដែលផលិតនៅកម្ពុជា ដែលមានទិដ្ឋាការផលិតពីក្រសួង និងមានការចូលរួមសម្តែងដោយជនជាតិខ្មែរ មិនថាផលិតដោយជនបរទេសនោះទេ សុទ្ធតែមានសិទ្ធិដាក់ប្រកួតក្នុងមហោស្រពជាតិលើកទី៥នេះទាំងអស់។ លោកបន្ថែមថា៖ «ការពិតយើងធ្លាប់ប្រកាសម្តងហើយក្នុងការធ្វើសន្និសីទប្រកាសបើកមហោស្រពថា មហោស្រពភាពយន្តជាតិលើកទី៥នេះ ប្លែកពីពេលកន្លង ដោយយើងបើកទូលាយរាល់ភាពយន្តដែលបានផលិតក្នុងប្រទេសកម្ពុជាឱ្យចូលរួមប្រកួត ដើម្បីឱ្យការប្រកួតប្រជែងកាន់តែខ្លាំងជាងមុន»។

លោក ប៉ុក បូរក្ស ប្រធានស្តីទីនាយកដ្ឋានសិល្បភាពយន្ត

ខណៈភាពយន្តដែលផលិតដោយបរទេសដូចគ្នា និងផលិតនៅក្នុងប្រទេសកម្ពុជាដូចគ្នា តែមិនបានជាប់ក្នុងការប្រកួតមហោស្រពភាពយន្តជាតិ តួយ៉ាងរឿង «ដំបូងខ្មែរក្រហមសម្លាប់ប៉ារបស់ខ្ញុំ» ដែលដឹកនាំសម្តែងលោកស្រី Angelina Jolie លោកថា ដោយសារផលិតករគ្មានបំណងចង់ប្រកួតប្រជែងជាមួយផលិតករក្នុងស្រុក ហើយវាអាចមិនសមរម្យក្នុងការប្រៀបធៀបគុណភាពជាមួយផលិតកម្មក្នុងស្រុក បើនិយាយពីបច្ចេកទេស និងថវិកាផលិតនោះ។

ប្រធាននាយកដ្ឋានសិល្បៈភាពយន្តដដែលនេះសង្កត់ធ្ងន់ថា ពានរង្វន់មាសរបស់មហោស្រពភាពយន្តជាតិនេះ ក៏ផ្តល់ជូនទៅខ្សែភាពយន្តណាដែលមានស្នាដៃឆ្នើម យោងតាមគណៈកម្មការជម្រើសពិសេសៗ ដែលមានកិត្តនាម និងកេរ្តិ៍ឈ្មោះច្រើនឆ្នាំលើវិស័យភាពយន្តនេះ ដោយមិនរើសថាជារឿងដឹកនាំផលិតដោយជនជាតិបរទេស ឬខ្មែរនោះទេ ក៏ប៉ុន្តែពានរង្វាន់បុគ្គលឆ្នើមលើឯកទេសផលិតភាពយន្ត នឹងមានសម្រាប់តែជនជាតិខ្មែរប៉ុណ្ណោះ។

រឿងដែលដឹកនាំដោយជនបរទេសទាំង៣ខាងលើនេះនឹងប្រកួតប្រជែងជាមួយភាពយន្តដែលដឹកនាំដោយជនជាតិខ្មែរ៥រឿងទៀត ដូចជារឿង ទឹក​ចិត្ត​ម្តាយ​សម័យ​ថ្មី​ ស៊ុប​ភើរ​មាំ វិកល​ចរិត​ អ្នក​នាង​ម្ចាស់​ឡឺ​កឺ​ ខូច​ចិត្ត​អាជីព​៕

ចុចអាន

-ស្នាដៃ​ឆ្នើម​ប្រចាំ​មហោស្រព​ភាពយន្តជាតិលើកទី៥ នឹងទទួលបាន​ទឹកប្រាក់ ៣០លានរៀល​

-ភាព​យន្ត​ខ្មែរល្បីៗប្រចាំឆ្នាំ ២០១៧ ចាក់បញ្ចាំង​ដោយ​ឥត​គិត​ថ្លៃ​ចាប់​ពីថ្ងៃ​នេះហើយ​ (វីដេអូ)


អត្ថបទ៖ Sunny