ថ្ងៃនេះកាលពី ៧៦ឆ្នាំមុន ជប៉ុនបានទាញអាមេរិកចូលសង្គ្រាមលោកលើកទី ២

2017-12-07 12:05:06
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពី ៧៦ឆ្នាំមុន ថ្ងៃនេះ យន្តហោះចម្បាំងជប៉ុនបានបើកប្រតិបត្តិការទម្លាក់គ្រាប់បែកលើ កំពង់ផែយោធា Pearl Habour របស់សហរដ្ឋអាមេរិក ដែលជាកត្តាមួយយ៉ាងសំខាន់ក្នុងការរុញច្រានអាមេរិកឲ្យប្រឡូកចូលក្នុងសង្គ្រាមលោកលើកទី ២ ដែលបានឆាបឆេះតាំងពីឆ្នាំ ១៩៣៩មក។

ក្នុងថ្ងៃអាទិត្យ ទី៧ ធ្នូ ឆ្នាំ ១៩៤១ វេលាពេលព្រឹក យន្តហោះចម្បាំងជប៉ុនចំនួន ៣៦០ គ្រឿងបានធ្វើការទម្លាក់គ្រាប់បែកផ្ទួនៗគ្នា ជាច្រើនគ្រាប់ ទៅលើផែយោធារបស់សហរដ្ឋអាមេរិក Pearl Habour ក្នុងទឹកដីហាវៃ។ ហេតុការណ៍នេះ បានធ្វើឲ្យទាហានអាមេរិកចំនួនជាង ២៤០០ នាក់បានស្លាប់ និង១២០០ នាក់ទៀតបានរងរបួស ខណៈយន្តហោះចម្បាំងចំនួនជាង ២០០ គ្រឿង និងនាវាចម្បាំងធំៗអាមេរិកជិត ២០គ្រឿងទៀត ត្រូវបានរងការខូចខាតយ៉ាងធ្ងន់ធ្ងរ។ អាមេរិកក៏បានតបតទៅនឹងការប្រយុទ្ធដែលមិនប្រកាសមុនរបស់ភាគីជប៉ុននេះដែរ ដោយបានបាញ់ធ្លាក់យន្តហោះជប៉ុនចំនួន ៣០ គ្រឿង ពន្លិចនាវាមុជទឹកចំនួន ៥ គ្រឿង ដែលនេះបានបណ្ដាលឲ្យទ័ពជប៉ុនជិត ១០០នាក់បានស្លាប់។

ការទម្លាក់គ្រាប់បែកនេះ កើតឡើងបន្ទាប់ពីមានការចរចាជាច្រើនដងរវាងភាគីទាំងពីរស្ដីពីការដកទណ្ឌកម្មសេដ្ឋកិច្ចពីសំណាក់អាមេរិកទៅលើជប៉ុន។ ក្នុងកំឡុងឆ្នាំ ១៩៣០ អាមេរិកបានធ្វើការចាត់វិធានការដាក់ទណ្ឌកម្មសេដ្ឋកិច្ចទៅលើជប៉ុន ដោយក្នុងនោះមានការបិទមិនឲ្យមានការលក់ប្រេងទៅកាន់ប្រទេសអាស៊ីមួយនេះ ដែលពេលនោះបានលើកទ័ពឈ្លានពានចិន។ ប្រេងជាធនធានសំខាន់សម្រាប់ជប៉ុនក្នុងការបន្តមហិច្ឆតាយោធារបស់ខ្លួន។ ដូច្នេះការបិទមិនលក់ប្រេងពីភាគីអាមេរិក ធ្វើឲ្យប៉ះពាល់យ៉ាងខ្លាំងដល់នយោបាយវាតទីរបស់ជប៉ុន។ ហេតុនេះ ដោយចរចាមិនត្រូវគ្នាជាច្រើនសាអំពីរឿងនេះ ជាកត្តាមួយធ្វើឲ្យជប៉ុនសម្រេចធ្វើសកម្មភាពវាយប្រហារបែបនេះតែម្ដង។

ការបើកប្រតិបត្តិការប្រយុទ្ធដ៏ភ្ញាក់ផ្អើលមួយនេះពីសំណាក់របបយោធាជប៉ុន បានធ្វើឲ្យសហរដ្ឋអាមេរិក សម្រេចប្រកាសសង្គ្រាមជាផ្លូវការជាមួយជប៉ុន នៅមួយថ្ងៃបន្ទាប់ពីហេតុការណ៍នេះ។ ក្រោយមក បន្ទាប់ពីអាល្លឺម៉ង់ និងអ៊ីតាលីដែលជាសម្ព័ន្ធមិត្តជប៉ុនបានប្រកាសសង្គ្រាមជាមួយខ្លួន អាមេរិកក៏តបតវិញតាមរយៈការប្រកាសសង្គ្រាមទៅវិញ ដែលនេះបានបើកផ្លូវឲ្យអាមេរិកចូលប្រឡូកក្នុងសង្គ្រាមលោកលើកទី ២ជាផ្លូវការ៕

ប្រភព៖ History អត្ថបទ៖ សេរី មង្គល