អតីតកីឡាករ Paris និង Dijon ថាមកកម្ពុជា ដើម្បីឈ្នះបឹងកេត
- 2017-12-12 06:17:05
- ចំនួនមតិ 0 | ចំនួនចែករំលែក 0
អតីតកីឡាករ Paris និង Dijon ថាមកកម្ពុជា ដើម្បីឈ្នះបឹងកេត
ចន្លោះមិនឃើញ
Chaher Zarour ខ្សែការពាររបស់ក្លឹប Sanna Khánh Hòa BVN F.C បញ្ជាក់ថាការមកកម្ពុជាលើកនេះគឺដើម្បីទទួលជ័យជម្នះត្រលប់ទៅវិញ ក្នុងការប្រកួតជាមួយបឹងកេត ពានរង្វាន់ Toyota Mekong Cup ស្អែកនេះ។
Zarour ជាកីឡាករបារាំងដែលធ្លាប់បានលេងឱ្យក្លឹប Paris , Cannes និង Dijon ជាដើម។ ខ្សែការពារមាឌធំម្នាក់នេះ ទើបតែចូលរួមជាមួយក្លឹបវៀតណាមកាលពីឆ្នាំ២០១៦កន្លងទៅ ហើយរកគ្រាប់បាល់បាន៥គ្រាប់ដែរ ក្នុងនាមជាខ្សែការពារ។ ស្ថិតក្នុងវ័យ៣៤ឆ្នាំ ប្រធានក្រុមរបស់ក្លឹប Sanna Khánh Hòa BVN F.C បានបញ្ជាក់ថារូបគេមកកម្ពុជាលើកនេះ គឺដើម្បីយកជ័យជម្នះត្រលប់ទៅវិញ ដើម្បីឡើងទៅវគ្គបន្ដ។
ស្រដៀងគ្នានេះដែរ លោក Võ Đình Tân គ្រូបង្វឹករបស់ក្លឹបវៀតណាមក៏រំពឹងលទ្ធផលល្អដូចគ្នាក្នុងការប្រកួតស្អែកនេះ ត្បិតអីលេងនៅទឹកដីកម្ពុជានឹងកាន់តែពិបាកសម្រាប់ក្រុមរបស់លោកក៏ដោយ។ គ្រូបង្វឹករូបនេះមើលឃើញថាបឹងកេតមានកីឡាករល្អៗច្រើន ជាពិសេសការប្រយុទ្ធរបស់ពួកគេក៏លឿនថែមទៀត ដូចដែលបានឃើញស្រាប់កាលពីជើងទី១កន្លងទៅ ដែលអាចស៊ុតគ្នាបានដល់ទៅ ៤-៤។
បឹងកេតនឹងស្វាគមន៍ក្រុមវៀតណាមខាងលើនេះ វេលាម៉ោង៧:០០ល្ងាចស្អែក ក្នុងការប្រកួតពានរង្វាន់ Toyota Mekong Cup ។ ដោយក្លឹបណាឈ្នះនឹងឡើងទៅវគ្គបន្ដ ខណៈដែលក្លឹបណាចាញ់គឺហាលអាវត្រឹមនេះ តែបានរង្វាន់១ម៉ឺនដុល្លារ៕