ពីអ្នកដាំកញ្ឆែត មកជាអ្នកស៊ីឈ្នួលកាត់កញ្ឆែតវិញ ដោយហេតុផលទាំងនេះ

2017-12-12 08:43:44
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅជាយរាជធានីភ្នំពេញភាគខាងត្បូងអមសងខាងផ្លូវ៦០ម៉ែត្រ នៅលើផ្ទៃបឹងដ៏ធំល្វឹងល្វើយ កសិករជាច្រើនគ្រួសារបានជួលផ្ទៃបឹងនោះដើម្បីដាំត្រកួន ឬកញ្ឆែតដើម្បីលក់សម្រាប់ទីផ្សារក្នុងស្រុក។

ទោះយ៉ាងណា ការជួលផ្ទៃបឹងពីក្រុមហ៊ុនប្រហែលមួយលានរៀលក្នុងមួយហិកតាសម្រាប់រយៈពេលមួយឆ្នាំដើម្បីដាំបន្លែទាំងនេះមិនប្រាកដថាទទួលបានប្រាក់ចំណេញគ្រប់ពេលនោះទេ បើសិនជាកសិករមិនមានដើមទុនក្រាស់ក្រែលទុកសម្រាប់ទប់ពេលតម្លៃបន្លែចុះថ្លៃ ឬត្រូវសត្វល្អិតបំផ្លាញ។

(ប្រពន្ធលោក សួង ផល បោះដុំកញ្ឆែតឲ្យលោក សួស ផល ដើម្បីកាត់ឫស)

ជាក់ស្តែងលោក សួស ផល ជាកសិករម្នាក់ធ្លាប់បានសាកល្បងដាំបន្លែកញ្ឆែតនេះនៅលើផ្ទៃបឹងប្រហែលជាពីរហិចតាកាលពីជាងមួយឆ្នាំមុន ប៉ុន្តែលោកមិនបានទទួលផលជំនេញទេ ផ្ទុយមកវិញលោកខាតដើមយ៉ាងធ្ងន់ធ្ងរ។ ខាតដើមត្រង់ថាដំណាំកញ្ឆែតនៅពេលនោះធ្លាក់ថ្លៃទាបជាង១ ០០០រៀលក្នុងមួយគីឡូក្រាម។

លោកបន្ថែមថាៈ «កញ្ឆែតធ្លាក់ថ្លៃ លក់ខាត...យើងបោះឲ្យឈ្មួយកណ្តាល អត់មានកន្លែងលក់ដូចគេ...ម្យ៉ាងពេលហ្នឹងកញ្ឆេតនាំចូលក៏មានច្រើនហើយធូរថ្លៃជាងកញ្ឆេតផលិតក្នុងស្រុកផង»។

(លោក សួស ផល កំពុងកាត់ឫសកញ្ឆែត)

កំពុងតែញាប់ដៃកាត់ឫសកញ្ឆេតផង លោក សួង ផល ថ្លែងបន្តថាលោកបានបោះបង់ការដាំកញ្ឆែតនេះ ដោយថាមិនមានដើមទុនគ្រប់គ្រាន់ និងម្យ៉ាងលោកថាការខាតកាលលើកមុនធ្វើឲ្យលោកជំពាក់គេជាងមួយម៉ឺនដុល្លារ។

លោកបន្តថាៈ «យើងខ្ចីគេធ្វើដើម ដ៏លក់ខាតជំពាក់គេ បូកទាំងការទាំងដើម ជាងមួយម៉ឺនដុល្លារ»។ លោកអះអាងថាអ្នកដែលមានលទ្ធភាពនៅបន្តការដាំដុះនេះបានដោយសារអ្នកទាំងនោះមានទុនច្រើន និងម្យ៉ាងទៀតមានកន្លែងសម្រាប់លក់ដោយខ្លួនឯងផង។

(លោក សួស ផល និងកូនប្រុសកំពុងលើកញ្ឆែតចងជាដុំថ្លឹងគីឡូដើម្បីគិតជាសាច់ប្រាក់ ដោយមួួយគីឡូក្រាមបានថ្លៃឈ្នួល៤០០រៀល)

ម្យ៉ាងទៀតដំណាំកញ្ឆែតនេះក៏ប្រឈមខ្លាំងដែរពីការទន្រានពីសំណាក់សត្វខ្យង បើទោះបីជាកសិករបានយកសំណាញ់ព័ន្ធកសិដ្ឋានបន្លែរបស់ខ្លួនក៏ដោយក៏នៅតែសត្វខ្យងទាំងនេះអាចចូលស៊ីបំផ្លាញបានដែរ។ នេះបើតាមការរៀបរាប់របស់លោក សួស ផល។

បច្ចុប្បន្នលោក សួស ផល និងភរិយា រួមទាំងកូនប្រុសម្នាក់ផងបានងាកមកស៊ីឈ្មួលកាត់កញ្ឆេតឲ្យគេវិញម្តងដោយក្នុងមួយគីឡូក្រាមលោកបានទទួលកម្រៃ៤០០រៀល។ លោកបញ្ចាក់ថាកាត់ម្តងអាចបានជាង១០០គីឡូក្រាម ឬលើសពីនេះអាស្រ័យលើម្ចាស់ដំណាំកញ្ឆែតឲ្យកាត់តិចឬច្រើន។

(កសិករម្នាក់កំពុងជិះទូកកាត់កញ្ឆែតដែលលូតលាស់មិនសូវល្អ ដោយទំនងជាត្រូវសត្វខ្យងបំផ្លាញ)

ក្រៅពីរបរនេះ ប្រពន្ធលោក សួស ផល បានឆ្លៀតប្រកបរបរលក់ត្រីមួយមុខទៀតដើម្បីបានចំណូលផ្គត់ផ្គង់គ្រួសារ និងសង់បំណុលដែលនៅជំពាក់គេកាលពីដាំកញ្ឆែតដោយខ្លួនឯងកាលពីលើកមុន។

និយាយដល់រឿងដាំកញ្ឆែតនេះ ពេលសួរថាតើលោកចង់ដាំឡើងវិញទេ លោកបានសើចហើយនិយាយថាលោកសុខចិត្តនៅស៊ីឈ្នួលគេវិញល្អជាងព្រោះថាបានកម្រៃគ្រាន់បើ និងម្យ៉ាងមិនទាន់ចង់ប្រថុយទៀតនោះទេ ដោយថាបំណុលចាស់នៅមិនសងរួចនៅឡើយ។

បើតាមលោក សួស ផល តម្លៃកញ្ឆែតនៅលើទីផ្សារសព្វថ្ងៃប្រហែលជា២ ០០០រៀលក្នុងមួយគីឡូក្រាម ឬអាចប្រែប្រួលខុសនេះបន្តិចបន្តួច៕

អត្ថបទ៖ ទូច សុខា