មិនធម្មតា! អ្នកចូលរួមពិព័រណ៍សៀវភៅ ៥ម៉ឺននាក់ ទិញសៀវភៅគ្រប់ៗគ្នា

2017-12-12 09:25:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិព័រណ៍សៀវភៅកម្ពុជាលើកទី ៦ ក្នុងឆ្នាំ២០១៧ បានបញ្ចប់ទៅដោយរលូននឹងទទួលបានជោគជ័យដ៏សម្បើម។ កាន់តែពិសេសអ្នកចូលរួមកើនឡើងរហូតទៅជិត ៤ម៉ឺននាក់ឯណោះ ហើយម្នាក់ៗត្រឡប់ទៅវិញមានយួរសៀវភៅសំពីងសំពោងសឹងតែគ្រប់ដៃ។ នេះបើតាមការបញ្ជាក់របស់អ្នកស្រី ខ្លូត វិបុលឡា នាយិកាបណ្ណាល័យជាតិ។

អ្នកស្រី ខ្លូត វិបុលឡា

អ្នកស្រីបានឲ្យដឹងទៀតថា កំណើនអ្នកចូលរួមកើនឡើងជារៀងរាល់ឆ្នាំ។ ជាក់ស្ដែងកាលពីឆ្នាំ ២០១៦ មានចំនួនប្រមាណតែជាង ២ម៉ឺននាក់ប៉ុណ្ណោះ ប៉ុន្តែក្នុងឆ្នាំ២០១៧នេះមានការចូលរួមច្រើនលើសពីការរំពឹងទុកទៅទៀត។ កំណើនរបស់អ្នកចូលរួមនេះ គឺឆ្លុះបញ្ចាំងឲ្យឃើញថា យុវជនកម្ពុជា ប្រជាពលរដ្ឋទាំងអស់ចាប់ផ្ដើមមានទម្លាប់ក្នុងការអានសៀវភៅ ហើយក៏ស្របទៅនឹងគោលបំណងនៃការកម្មវិធី ដែលចង់ឲ្យប្រជាជនកម្ពុជាមានទម្លាប់ក្នុងការអានសៀវភៅ ក្រៅពីទម្លាប់ចំណាយពេលលើប្រព័ន្ធអេឡិចត្រូនិក។

អ្នកស្រីនាយិកាបណ្ណាល័យជាតិ លើកឡើងថា បើកាលណាប្រជាជនមានទម្លាប់អានសៀវភៅ នោះកម្ពុជានឹងមានធនធានមនុស្សកាន់តែច្រើនពោរពេញដោយចំណេះដឹង ព្រោះគ្មានចំណេះដឹងណាបានមកដោយមិនបានអានទេ។ ជាពិសេសនោះ ក៏ជាការចូលរួមចំណែកដ៏សំខាន់ក្នុងការលើកស្ទួយដល់ស្នាដៃរបស់អ្នកនិពន្ធអក្សរសិល្ប៍ ក៏ដូចជាអ្នករៀបរៀងទាំងអស់ឲ្យមានកម្លាំងចិត្តធ្វើកិច្ចការដ៏មានប្រយោជន៍ជូនជាតិនេះបន្តទៀត។

ពិព័រណ៍សៀវភៅកម្ពុជាលើកទី៦ បានប្រព្រឹត្តទៅកាលពីថ្ងៃទី ៨ រហូតដល់ថ្ងៃទី ១០ ខែធ្នូ នៅបណ្ណាល័យជាតិ និងទទួលបានជោគជ័យគួរជាទីមោទនបំផុត៕