៤ជំហាន ជួយឲ្យផែនការឆ្នាំថ្មីទទួលបានជោគជ័យទាំងវ័យក្មេង
- 2017-12-13 22:30:00
- ចំនួនមតិ 0 | ចំនួនចែករំលែក 0
៤ជំហាន ជួយឲ្យផែនការឆ្នាំថ្មីទទួលបានជោគជ័យទាំងវ័យក្មេង
ចន្លោះមិនឃើញ
ការរស់នៅក្នុងជីវិតដដែលពិតជាធ្វើឲ្យមនុស្សកាន់តែគ្មានភាពក្លាហានក្នុងការចាប់ផ្ដើមធ្វើអ្វីថ្មីៗនោះទេ។ មនុស្សម្នាក់ៗត្រូវមានគោលដៅផ្ទាល់ខ្លួន ហើយគោលដៅនីមួយៗដាច់ខាតត្រូវតែមានផែនការជាមុន ទើបអាចសម្រេចបាន។ ផែនការជារឿងដែលលោកអ្នកត្រូវគិតទុកជាមុននូវរឿងដែលចង់សម្រេចនៅពេលណាមួយ ប៉ុន្តែកុំយូរពេក វាអាចឲ្យអ្នកមានលេសមិនធ្វើវា ឬបន្លាយពេលវេលាអត់បានការ។
ទន្ទឹមនឹងនេះ លោកស្រី ប៉ែន បុប្ផា គ្រូបណ្ដុះបណ្ដាលជម្រុញលើកទឹកចិត្តនិងភាពជាអ្នកដឹកនាំ បានថ្លែងថា៖ «គោលដៅយើងគួរកំណត់ឲ្យវែងបំផុតត្រឹម ៤ ទៅ ៥ ឆ្នាំ យើងត្រូវសម្រេចអ្វី ហើយក្នុងគោលដៅនោះ យើងត្រូវគិតពីផែនការមួយឆ្នាំៗឲ្យច្បាស់ ហើយត្រូវកំណត់វិន័យឲ្យខ្លួនឯងផងដែរ»។ ឧទារហណ៍ បើអ្នកចង់ក្លាយជាមនុស្សជោគជ័យទាំងវ័យក្មេង គួរណាស់ត្រូវមានផែនការជាក់លាក់ ដើម្បីធ្វើវាឲ្យក្លាយជាការពិត។
លោកស្រីថា ដើម្បីសម្រេចផែនការរយៈមួយឆ្នាំ គួររៀនដើរជាជំហានៗដូចជា៖
នៅត្រីមាសទី១. រៀនស្គាល់គេ
មានវិធីច្រើនយ៉ាងដែលយើងអាចបង្កើតទំនាក់ទំនងទៅកាន់អ្នកដទៃ ប៉ុន្តែមិនមែនទាក់ទងគ្រប់ប្រភេទមនុស្សទាំងអស់នោះទេ។ លោកអ្នកអាចស្វែងយល់ពីមជ្ឈដ្ឋានមនុស្ស ដែលត្រូវនឹងអ្វីដែលអ្នកចង់បាន តួយ៉ាងគោលដៅរបស់អ្នកគឺចង់រកស៊ី មិនគួរចំណាយពេលនឹងមនុស្សចូលចិត្តដើរលេងសប្បាយទេ។ ហេតុដូច្នេះ មនុស្សដែលគួរស្គាល់ លោកអ្នកអាចស្វែងរកនៅតាមសិក្ខាសាលា ឬកម្មវិធីជួបជុំណាដែលមានប្រយោជន៍ និងស្ដាប់បទពិសោធពីអ្នកជោគជ័យឲ្យច្រើន។
នៅត្រីមាសទី២. រៀនពីគេ
ត្រង់ចំនុចនេះ លោកអ្នកត្រូវពីការងារដែលកំពុងធ្វើ កុំមានលេស កុំបោះបង់ និងរៀនសូត្រដោះស្រាយរឿងលំបាកៗ។ អ្វីដែលសំខាន់នោះ ក្រុមហ៊ុនដែលធ្វើការ មិនតម្រូវឲ្យធំឬ តូចទេ តែជាក្រុមហ៊ុនដែលអ្នកអាចរៀនសូត្របានថ្មីៗ និងពង្រីកសមត្ថភាពបានលឿនរហ័ស។ ចំណុចនេះសំខាន់ណាស់ ព្រោះវាជាជំហាននៃកាំជណ្ដើរ ដើម្បីឆ្ពោះទៅមុខថែមទៀត។
ត្រីមាសទី៣. រៀនធ្វើអ្វីថ្មីៗ
រៀនសាកល្បងធ្វើអ្វីថ្មី កុំខ្លាចខុសច្រើនពេក ព្រោះថាមនុស្សគ្រប់គ្នា មិនអាចធ្វើអ្វីដោយជោគជ័យមួយរយភាគរយឡើយ ហើយក៏គ្មានអ្នកណាជោគជ័យដែរ បើមិនសាងកំហុសមុននោះ។
ត្រីមាសទី៤. រៀនមើលឡើងវិញ
នេះជាដំណាក់វិសោធនកម្ម ឬត្រួតពិនិត្យលើគម្រោងដែលអ្នកបានអនុវត្ត។ យ៉ាងណាមិញ ប្រសិនបើមានគ្រូបង្គោលណាម្នាក់ សម្រាប់ផ្ដល់ប្រឹក្សា និងកំណត់ចំណាំទង្វើទាំងអស់របស់អ្នក នោះអាចជាកញ្ជក់ឆ្លុះយ៉ាងច្បាស់ថា អ្នកនឹងមិនងាយធ្វើរឿងមានកំហុសឡើយ។