ដើម្បីរក្សាកិត្តិនាម «ស្ករត្នោត» ការផលិតស្ករត្នោតចេញពីស្ករស ត្រូវហាមឃាត់ដាច់ខាត
- 2017-12-13 07:42:19
- ចំនួនមតិ 0 | ចំនួនចែករំលែក 0
ដើម្បីរក្សាកិត្តិនាម «ស្ករត្នោត» ការផលិតស្ករត្នោតចេញពីស្ករស ត្រូវហាមឃាត់ដាច់ខាត
ចន្លោះមិនឃើញ
ទោះបីលទ្ធផលនៃការពិសោធន៍ លើផលិតផលស្ករត្នោតធ្វើពីស្ករសនៅខេត្តតាកែវ បានបង្ហាញថា គ្មានសារធាតុប៉ះពាល់ដល់សុខភាពអ្នកបរិភោគ ក៏ដោយ ប៉ុន្តែក្រសួងឧស្សាហកម្ម និងសិប្បកម្មបានសម្រេចហាមឃាត់ការផលិត និងបិទទីតាំង ដែលផលិតស្ករត្នោតពីស្ករទាំងអស់ ដោយមិនឲ្យផលិតបន្តទៀតឡើយ ដើម្បីរក្សាកេរ្តិ៍ឈ្មោះស្ករត្នោត ដ៏ល្បីល្បាញរបស់ជាតិ។
លោក ហេង សោភណ្ឌ អគ្គនាយករងសហគ្រាសធុនតូច និងមធ្យម និងសិប្បកម្ម នៃក្រសួងឧស្សាហកម្ម និងសិប្បកម្មបានប្រាប់ sabay ឱ្យដឹងថា ក្រោយការពិសោធន៍សំណាកស្ករត្នោតធ្វើពីស្ករស នៅតាកែវ រកឃើញថា ពុំមានសារធាតុប៉ះពាល់សុខភាពអ្នកប្រើប្រាស់នោះទេ។ លទ្ធផលពិសោធន៍នេះធ្វើឡើងបន្ទាប់ពីក្រសួងយកសំណាកស្ករសទៅត្រួតពិនិត្យកាលពីសប្ដាហ៍មុន។ ទោះជាលទ្ធផលមិនប៉ះពាល់ដល់សុខភាពក្ដី ក៏ក្រសួងបានសម្រេចបិទជាផ្លូវការនៅទីតាំង ក្នុងខេត្តតាកែវ និង ការបិទទូទាំងប្រទេសនូវរាល់កន្លែងទាំងឡាយណា ដែលផលិតស្ករត្នោតក្លែងក្លាយនេះ។
“យើងកំពុងធ្វើការស្រាវជ្រាវរកមើលទីតាំងផ្សេងទៀតក្រែងមានការកែច្នៃបែបនេះ ហើយយើងក៏មិនបានដាក់ទោសទណ្ឌអ្វី ដល់អ្នកដែលផលិតស្ករក្លែងក្លាយទាំងនោះដែរ ពីព្រោះពួកគេក៏មិនរឹងទទឹង លើការអនុវត្តទាំងនេះដែរ”។ លោក ហេង សោភណ្ឌ បន្ថែម។
កាលពីសប្ដាហ៍មុន អាជ្ញាធរបានសម្រេចបិទទីតាំង ដែលផលិតស្ករត្នោតចេញពីស្ករស នៅស្រុកបាទី ខេត្តតាកែវ ចំនួន ៤៨ទីតាំង។
លោក ហេង សោភណ្ឌ បានឱ្យដឹងទៀតថា កន្លងមកអាជ្ញាធរធ្លាប់បានកោះប្រជុំ ជាមួយម្ចាស់សិប្បកម្មទាំងនេះ តាំងពីជាង១ឆ្នាំមុន និងបានណែនាំ ឱ្យសុំច្បាប់អនុញ្ញាត ក៏ដូចជាឱ្យបិទស្លាកសញ្ញាលើស្ករ ដែលបានកែច្នៃនោះថាជា «ស្ករក្រហមកែច្នៃពីស្ករស» ក៏ប៉ុន្តែម្ចាស់ទីតាំងមិនបានអនុវត្តតាមឡើយ ដូច្នេះវិធានការណ៍របស់ក្រសួងនាពេលនេះ គឺជាវិធានការណ៍ត្រឹមត្រូវ ព្រោះការផលិតនេះ គ្មានអនាម័យ គ្មានបច្ចេកទេស និងក្លែងបន្លំ ដោយយកស្ករស និងខ្លាញ់ កែច្នៃ ជាស្ករត្នោតទៅវិញ៕
របរត្បាញហូលរបស់អ្នកភូមិមួយ នៅខេត្តតាកែវ ប្រឈមនឹងការបាត់បង់
ក្រុមយុវជន និងបាល់ទាត់ស្ម័គ្រចិត្ត ដឹកនាំ ដោយ ឈិន ឈឿន ប្រកាសរកជំនួស ទៅជួយសាលាមួយ