Buffon អាចមិនទាន់ចូលនិវត្តន៍ទេ នៅចុងរដូវកាលនេះ

2017-12-13 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាំទីចាស់វស្សា Gianluigi Buffon បាននិយាយថា ខ្លួនអាចនឹងនៅជួយអ៊ីតាលីលេងក្នុងកម្មវិធី Euro ឆ្នាំ ២០២០។ ការថ្លែងបែបនេះ មានន័យថាអ្នកចាំទី Buffon អាចនឹងមិនទាន់ចូលនិវត្តន៍ទេនៅចុងរដូវកាល ២០១៧/២០១៨។

Buffon បានថ្លែងប្រាប់អ្នកសារព័ត៌មានថា៖ "បន្ទាប់ពីអ៊ីតាលីត្រូវបានទម្លាក់ដោយស៊ុយអែតមក ខ្ញុំទទួលបានក្ដីស្រលាញ់ច្រើនពីមនុស្សគ្រប់គ្នា។ ខ្ញុំសប្បាយចិត្តណាស់ ដែលពួកគេទទួលស្គាល់ពីការខិតខំប្រឹងប្រែងកន្លងមករបស់ខ្ញុំ"។

ពេលសួរថា តើខ្លួនអាចនៅជួយក្រុមជម្រើសជាតិអ៊ីតាលីលេងក្នុង Euro ឆ្នាំ ២០២០ ទេ អ្នកចាំទីក្លឹប Juventus បាននិយាយថា៖ "ខ្ញុំរស់មួយថ្ងៃគិតមួយថ្ងៃ ជម្រើសអី ក៏ខ្ញុំមិនផាត់ចេញដែរ"។ កីឡាករសញ្ជាតិអ៊ីតាលីបានបន្តទៀតថា៖ "ដរាបណានៅមានជីវិត គឺត្រូវតែមានក្ដីសង្ឃឹមជានិច្ច"។

សូមបញ្ជាក់ផងដែរថា អ្នកចាំទីវ័យ ៣៩ឆ្នាំ Buffon កាលពីពាក់កណ្ដាលឆ្នាំបានប្រកាសថា ខ្លួននឹងចូលនិវត្តន៍ពីបាល់ទាត់ ពេលរដូវកាល ២០១៧/២០១៨ បានបញ្ចប់។ ទោះជាយ៉ាងណា ការសម្រេចចិត្តនេះ អាចនឹងត្រូវផ្លាស់ប្ដូរ បន្ទាប់ពីអ៊ីតាលីបានខកខានលេង World Cup នៅឆ្នាំ ២០១៨ ក្រោយត្រូវបានស៊ុយអែតទម្លាក់កាលពីខែមុន៕

ប្រភព៖ Goal ប្រែសម្រួល៖ ហ៊ីម រស្មី