គ្រាន់តែមើលពណ៌ថ្នាំ ក៏អាចដឹងថារថយន្តល្អឬមិនល្អដែរ

2017-12-22 00:11:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ចង់ទិញរថយន្តល្អមួយមិនងាយទេ បើអ្នកមិនមានជំនាញ ជាពិសេសបើទៅរកទិញរថយន្តប្រភេទមួយទឹកទៀត។ ធម្មតាទេ ដែលអ្នកទិញចង់បានរថយន្តល្អធូរថ្លៃ ឯអ្នកលក់ចង់លក់បានថ្លៃ។

តាមអ្នកមានបទពិសោធន៍មើលរថយន្តប្រាប់ថា ក្រៅពីការពិនិត្យគ្រឿងក្នុង ពណ៌ខាងក្រៅក៏ជាផ្នែកមួយដែលអាចវាយតម្លៃរថយន្តមួយល្អឬមិនល្អដែរ។

លោក ឡេង ឡាយ ជាងជួសជុលរថយន្ត និងជាអ្នកជំនាញមើលរថយន្តមួយទឹកបានប្រាប់ Sabay ថា អ្នកទៅទិញរថយន្ត ភាគច្រើនតែងចង់បានរថយន្តស្អាត ម៉ាស៊ីនល្អ និងមានគ្រឿងបង្គំរឹងមាំ។ ពួកគេតែងនាំអ្នកជំនាញឲ្យទៅជួយមើល ព្រោះខ្លាចមិនបានរថយន្តត្រូវចិត្ត រហូតទៅទិញនៅកន្លែងទម្លាក់ពីកុងតឺន័រផ្ទាល់ទៀតផង។

លោកប្រាប់ចំណុចមួយដែលអ្នកទិញរថយន្តមួយទឹកតែងមើលរំលង គឺពណ៌រថយន្ត។ រថយន្តដែលមានពណ៌ខុសប្លែកពីគេភាគច្រើនជារថយន្តដែលនៅស្អាត ល្អពុំសូវប្រើប្រាស់បានយូរ។

លោកបញ្ជាក់ថា អ្នកប្រើប្រាស់ភាគច្រើនតែងប្ដូរស៊េរី យកពណ៌ពេញនិយម។ ទោះបីជារថយន្តដែលមានពណ៌ខុសពីគេមិនសូវពេញនិយមប្រើប្រាស់ក៏ពិតមែន តែអ្នកដែលចង់បានរថយន្តនៅស្អាតប្រើបានយូរ គួរងាកមកចាប់អារម្មណ៍រថយន្តដែលមានពណ៌ខុសពីគេវិញ។

ងាកមកលោក សៅ រិទ្ធី ជាអ្នកជំនាញមើលរថយន្តបានប្រាប់ Sabay ថា ចង់ដឹងថារថយន្តនៅថ្នាំ ហ្ស៊ីន ឬ បាញ់ថ្នាំថ្មី គេអាចមើលដឹងដោយភ្នែកទទេបាន បើរថយន្តនេះត្រូវបានគេបាញ់ថ្នាំថ្មីអាចមើលនៅតាមចន្លោះទ្វារ ត្រចៀករថយន្ត និងមានពណ៌ខុសគ្នា ពណ៌ហ្ស៊ីន មានរាងស្រអាប់រលោង។

លោកថា ពណ៌ដែលគេបាញ់ថ្មីរាងភ្លឺចែកដាច់ពីគ្នា ឬអាចយកដៃស្ទាបនៅតាមគែមទ្វារនឹងមានស្នាមគ្រើម ទោះជាត្រូវបានគេប៊ូលាថ្មីក៏ដោយ ជាពិសេសមានឆ្នូតដែលគេយកស្គុតមកបិតតាមចន្លោះគែមទ្វារនេះដើម្បីបាញ់ថ្នាំថ្មី និងមានកម្ទេចថ្នាំដែលនៅជាប់ចន្លោះគែមទ្វារនេះដែលយើងអាចមើលឃើញ។