បទថ្មីរបស់ ចេន សាយចៃ រងការរិះគន់១ទំហឹង ក្រោមហេតុផលតិះដៀលគ្រូបង្រៀន

2017-12-15 03:54:39
ចំនួនមតិ 0 | ចំនួនចែករំលែក 0

ចន្លោះមិនឃើញ

"គ្រូបង្រៀនស្រវឹងស្រា" ជាចំណងជើងបទថ្មី១របស់តារាចម្រៀងខ្មែរ-សុរិន្ទ ចេន សាយចៃ ដែលទើបតែចេញជាផ្លូវការកាលពីប៉ុន្មានថ្ងៃមុននេះប៉ុណ្ណោះ។ ក្រោយមានការចែករំលែកជាបន្តបន្ទាប់បទនេះត្រូវបានអ្នកស្ដាប់រិះគន់ទៅលើអត្ថន័យ និងពិសេសចំណងជើងបទនេះ ប៉ះពាល់ខ្លាំង ព្រោះបានត្មះដៀលចំៗដល់បុគ្គលដែលមានអាជីពគ្រូបង្រៀនទាំងឡាយ។

ជាក់ស្ដែងនៅព្រឹកនេះ ម្ចាស់ផលិតកម្មឥន្ទ្រានិម្មិត អ្នកនាង ចាន់ណា សុខឃីម ដែលមានអាជីពជាគ្រូបង្រៀនផង បានបង្ហោះសាររិះគន់ខ្លឹមសារចម្រៀងខាងលើថា៖ "ក្នុងនាមជាគ្រូបង្រៀនម្នាក់ នាងខ្ញុំមិនអាចទទួលយកបាន នូវការផលិតបទចម្រៀង បែបដៀលត្មះដល់អាជីព ជាគ្រូបង្រៀន" ។

អ្នកស្រីបន្តថា អត្ថន័យបទចម្រៀងបានរៀបរាប់ពីលោកគ្រូម្នាក់ដែលស្រវឹងពី២ ទៅ៣ថ្ងៃក្នុងមួយសប្ដាហ៍ ដូច្នេះហេតុម្ដេចមិនលើកយកចំណុចល្អនៅថ្ងៃគ្រូរូបនោះមិនស្រវឹង។ ម៉្យាងអ្នកស្រីយល់ថា ចំណងជើងដូចនេះ គឺសំដៅទៅលើអ្នកដែលមានអាជីពជាគ្រូបង្រៀនជារួម។

ខាងស្ដាំទី២ អ្នកនាង ចាន់ណា សុខឃីម

មួយវិញទៀត គ្រូបង្រៀនស្ថិតនៅក្រោមស្ថាប័នអប់រំ ដែលមានក្រុមអធិការកិច្ច និង ក្រុមការងារពាក់ព័ន្ធ ជាអ្នកត្រួតពិនិត្យ បើលោកគ្រូអ្នកគ្រូ ប្រព្រឹត្តខុសក្រមសីលធម៌ វិជ្ជាជីវៈ ជាគ្រូបង្រៀន ស្ថាប័នពាក់ព័ន្ធមានសិទ្ធិក្នុងការបញ្ឈប់ ឬ ដោះស្រាយក្នុងលក្ខខណ្ឌសមស្របណាមួយ តែអ្នកនិពន្ធ ហាក់ចង់បង្ហាញពីចំណុចអាក្រក់តូចមួយ មកជាធំ ដោយព្យាយាមផលិតចម្រៀងក្នុងអត្ថន័យមើលងាយជាសាធារណៈ។

អ្នកនាងរំលឹកទៀតថា គ្រូតាមជនបទមួយចំនួន តស៊ូបង្រៀន២ពេល ដោយមិនខ្វល់ខ្វាយពីប្រាក់កម្រៃ ដោយសារចង់ឲ្យក្មេងៗចេះអានចេះសរសេរ បង្រៀនទាំងអត់បន្ទប់ផង ហេតុអ្វីមិនសរសេរចម្រៀងលើកសរសើរខ្លះ?

ស្រដៀងគ្នានេះដែរ អ្នកគាំទ្រសុំមិនបញ្ចេញឈ្មោះម្នាក់លើកឡើងថា ខ្លឹមសារចម្រៀងនេះ ពិតជាមិនសមប្រកបមែន ត្បិតអីគ្រូគឺជាអ្នកអប់រំគេ ហើយកំហុសបែបនេះកើតមានទៅលើគ្រូមួយចំនួនត្រូវប៉ុណ្ណោះ មិនគួរណាយកមកធ្វើជាបញ្ហាធំ ដាក់បន្ទុកលើស្ថាប័នគ្រូបង្រៀនឡើយ។

ផ្ទុយទៅវិញ យុវជនទើបបញ្ចប់បរិញ្ញាបត្រ២រូប ប្រាប់ពីគំនិតផ្ទាល់ខ្លួនថា បទនេះមានអត្ថន័យល្អ ប្រកបដោយខ្លឹមសារអប់រំ ដោយបង្ហាញពីតថភាពពិតក្នុងសង្គមខ្មែរ។ ជាមួយអត្ថន័យលួងលោម អមដោយសំឡេងដ៏គ្រលួចរបស់អ្នកនាង ចេន សាយចៃ យុវជនខាងលើយល់ថា សារដែលផ្ញើតាមចម្រៀងនេះ នឹងធ្វើឲ្យគ្រូបង្រៀនមួយក្ដាប់តូចនោះ អាចស្ដាប់យល់ និងងាកមកប្រកាន់ខ្ជាប់សីលធម៌គ្រូបង្រៀនវិញ។

អ្នកនិពន្ធ យឹម តាស្រង់

ក្នុងនោះ លោក យឹម តាស្រង់ ដែលជាអ្នកនិពន្ធចម្រៀងខាងលើ ធ្លាប់បកស្រាយក្នុងវីដេអូផលិតបទនេះថា "គ្រូបង្រៀនស្រវឹងស្រា" មិនមែនជាចម្រៀងដែលវាយប្រហារទៅគ្រូបង្រៀនទាំងអស់នៅប្រទេសកម្ពុជានោះទេ។ លោកនិងក្រុមការងារគ្រាន់តែចង់រំលេចពីរឿងរ៉ាវពិតខ្លះៗរបស់គ្រូបង្រៀនមួយចំនួនតូច ដែលពិតជាធ្លាប់ធ្វើទង្វើបែបនេះមែន ហើយលោកគ្មានបំណងរិះគន់ដល់គ្រូណាម្នាក់ឡើយ៕