កក្រើកសាលាចរនា! សិល្បករខ្មែររួមគ្នាសម្ដែងសិល្បៈមិនយកកម្រៃ ដើម្បីវប្បធម៌
- 2017-12-15 10:36:00
- ចំនួនមតិ 0 | ចំនួនចែករំលែក 0
កក្រើកសាលាចរនា! សិល្បករខ្មែររួមគ្នាសម្ដែងសិល្បៈមិនយកកម្រៃ ដើម្បីវប្បធម៌
ចន្លោះមិនឃើញ
កម្មវិធី ព្រះគុណគ្រូល្ខោនខោលក្នុងឆ្នាំនេះពិតជាអស្ចារ្យ ព្រោះមានសិល្បករសិល្បការិនីបុរាណសម័យ ជិត២០០នាក់ ចូលរួមសម្ដែងនូវទម្រង់សិល្បៈជាច្រើនប្រភេទ ដោយមិនយកកម្រៃនោះទេ។
លោក នួន ឆៃឡូតអ្នករៀបចំកម្មវិធីបាន Sabay ថា ក្នុងកម្មវិធីព្រះគុណគ្រូល្ខោនខោលលើកទី២នេះ ធ្វើឡើង កនុងគោលបំណង ដើម្បីរក្សាវប្បធម៌ខ្មែរ ការដឹងគុណដល់ គ្រូអាចារ្យ និង ដើម្បីផ្សព្វផ្សាយឲ្យភ្ញៀវជាតិ-អន្តរជាតិ បានស្គាល់ ខឿនសិល្បៈដ៏ចំណាស់របស់ជាតិខ្មែរផងដែរ។
ពេញមួយថ្ងៃ ទី១៤ តាំងពីម៉ោង ៨ព្រឹកមក ដោយមានពិធី សំពះគ្រូ និង តាំងពិព័រណ៍សម្ភារៈ និង ស្នាដៃសិល្បៈ ស្រាវជ្រាវផ្សេងៗ ។ លុះ ល្ងាចឡើង ការសម្ដែងនូវទម្រង់សិល្បៈជាច្រើនទម្រង់ ទាំងបុរាណ និងសម័យ ក្នុងនោះមានការសម្ដែងរបាំបួងសួង ការបង្ហាញម៉ូដ ក្នុងសម័យព្រះបាទស៊ីសុវត្ថិ និងទស្សនីយភាពក្បួនដង្ហែ សម័យព្រះបាទស៊ីសុវត្ថិ ដែលធ្វើឲ្យកម្មវិធីកាន់តែមានភាពសប្បាយរីករាយ។
ក្នុងបរិយាកាសអ៊ូអរ និងសប្បាយរីករាយនោះ អ្នកនាង សារ៉ាយ សក្ខិណា តារាសម្តែង កូនមួយប្រាប់ថា នាងសប្បាយចិត្តចំពោះការចូលរួម សម្ដែងសិល្បៈ នេះដើម្បីបង្ហាញពីវប្បធម៌បុរាណខ្មែរ។ « ខ្ញុំសប្បាយចិត្តដែលបានចូលរួម នេះមិនមែនជាលើកទីមួយទេ កាលពីលើកមុនខ្ញុំក៏ធ្លាប់ ចូលរួមជួយកម្មវិធីនៅទីនេះដែរ។»
ចំណែកលោក ម៉េង ប៊ុនឡូ ជាតារាចម្រៀង និងតារាសម្ដែង ក៏មានវត្តមាននៅក្នុងកម្មវិធីនោះដែរ លោកបានប្រាប់ Sabay ថា លោកមកជួយរៀបចំឆាក និងភ្លើង។ ម្ចាស់ក្រុមហ៊ុន រៀបចំឆាក និងភ្លើង បន្តថា ការជួយឆាក និងភ្លើងនេះលោកមិនគិតកម្រៃទេ សុំត្រឹមបាយទឹកកម្មកររៀបចំប៉ុណ្ណោះ។លោក ម៉េង ប៉ុនឡូថា « យើងស្រលាញ់ យើងចេះថែ និងជួយគ្នា រក្សាវប្បធម៌ បងមកទីនេះ៣ថ្ងៃដើម្បីរៀបចំឆាក និងភ្លើង ធម្មតាបើកម្មវិធីផ្សេងៗ បងយកពីគេមិនក្រោម ១ ៨០០ដុល្លា ទេ! តែទីនេះបងសប្បាយចិត្តនឹងជួយ»។
ទីប្រឹក្សាក្រសួងវប្បធម៌និងវិចិត្រសិល្បៈ លោក ព្រឿង ឈាង មានប្រសាសន៍ ការរៀបកម្មវិធីបែបនេះ ជាកាយវិការដ៏ល្អរបស់សិស្សគុណទាំងឡាយចំពោះលោកគ្រូអ្នកគ្រូ បុព្វបុរស ហើយវាក៏ជាការ ថែរក្សាប្រពៃណីដ៏បវររបស់ជាតិខ្លួន និងបង្កើនសាមគ្គី ក្នុងសង្គមសិល្បៈផងដែរ។ លើសពីនេះ សម្តេច ព្រះរាម បុប្ផាទេវី ទ្រង់ក៏សព្វព្រះទ័យ យាងចូលរួមជាគណៈអធិបតិ ដ៏ខ្ពង់ខ្ពស់ ក្នុងកម្មវិធី ដែលមានអមការយាង ដោយលោកគ្រូ អ្នកគ្រូសាស្ត្រាចារ្យ ជាច្រើនរូប និង ប្រធានសមាគមន៍សិល្បករខ្មែរ អ្នក នាង ចន ចន្ទលក្ខិណាផងដែរ៕