គ្រូ Spurs នឹងចាក់ភ្លេងឮៗ បើយកឈ្នះ Man City បាន

2017-12-16 07:32:55
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Mauricio Pochettino គ្រូបង្វឹកក្រុម Tottenham Hotspur រំពឹងថា កូនក្រុមរបស់លោកនឹងអាចបញ្ចប់កំណត់ត្រារបស់ Manchester City ដោយរារាំងមិនឲ្យក្រុមមេឃខៀវឈ្នះ១៥ប្រកួតជាប់ៗគ្នា ក្នុងការប្រកួតនៅកីឡដ្ឋាន Etihad វេលាម៉ោង ០០:៣០ នាទីរំលងអាធ្រាត្រ ឈានចូលថ្ងៃទី១៧ ខែធ្នូ ឆ្នាំ២០១៧។ លើសពីនេះ លោកបានបញ្ជាក់ថា ប្រសិនបើក្រុមរបស់លោកឈ្នះ ក៏លោកមិនខ្លាចក្នុងការចាក់ភ្លេងឮៗ ដែរ។

ការបញ្ជាក់របស់លោក Pochettino ធ្វើឡើងបន្ទាប់ពី Manchester City បានចាក់ភ្លេងខ្លាំងៗ ក្នុងបន្ទប់ផ្លាស់សម្លៀកបំពាក់ ពេលប្រកួតឈ្នះក្រុមម្ចាស់ផ្ទះ Manchester United កាលពីសប្ដាហ៍មុន ដែលបានបង្កឲ្យមានការប៉ះទង្គិចពាក្យសម្ដី រួចឈានដល់ការវាយតប់គ្នារវាងក្រុមគ្រូបង្វឹក និងកីឡាកររបស់ក្រុមទាំងពីរថែមទៀតផង។

ក្រោយត្រូវបានសួរទាក់ទងការការចាក់ភ្លេងនៅបន្ទប់ផ្លាស់សម្លៀកបំពាក់ លោក Pochettino បានឆ្លើយថា៖ «ខ្ញុំចង់ធ្វើអ៊ីចឹង។ នៅពេលពួកយើងឈ្នះ Huddersfield ឬ Stoke កីឡាកររបស់យើងបានបើកសំឡេងឮៗ។ វាជារឿងធម្មតាទៅហើយ។ តែបើអ្នកចាញ់ អ្នកមិនអាចធ្វើដូច្នេះបានទេ។ ពេលអ្នកទៅដល់បន្ទប់ផ្លាស់សម្លៀកបំពាក់ អ្នកមានអារម្មណ៍ថា អ្នកចង់ទៅផ្ទះវិញតែម្ដង»។

យ៉ាងណាក៏ដោយ គ្រូបង្វឹក Spurs បានអះអាងថា ទោះបីជាក្រុមលោកចាញ់ ហើយត្រូវក្រុមម្ខាងទៀតចាក់ភ្លេងបញ្ឈឺ ក៏លោកមិនមានអារម្មណ៍ខឹងអ្វីឡើយ។ លោកថា វាជារឿងល្អ ហើយត្រូវចេះគោរពសិទ្ធិរបស់គេ។

Spurs កំពុងតាមពីក្រោយ Man City ចំនួន ១៨ពិន្ទុ ខណៈក្រុមមេឃខៀវបច្ចុប្បន្ន ឈរកំពូលតារាង មាន ៤៩ពិន្ទុ ក្នុង ១៧ប្រកួតកន្លងទៅ៕

ប្រភព៖ Kley Kley ប្រែសម្រួល៖ លាភ