សំរាមទម្លាក់សម្រស់ឆ្នេរខ្សាច់មួយកន្លែង នៅព្រះសីហនុ
- 2017-12-17 03:30:01
- ចំនួនមតិ 0 | ចំនួនចែករំលែក 0
សំរាមទម្លាក់សម្រស់ឆ្នេរខ្សាច់មួយកន្លែង នៅព្រះសីហនុ
ចន្លោះមិនឃើញ
ខ្សាច់សម៉ត់ លាតសន្ធឹងប្រហែលពីរគីឡូម៉ែត្រតាមមាត់សមុទ្រ ហាក់ជ្រុះបាត់នូវសោភណភាព និងសម្រស់របស់ខ្លួនដោយសារការបោះចោលសំរាមគ្មានសណ្ដាប់ធ្នាប់ និងការថែរក្សាអនាម័យឲ្យបានត្រឹមត្រូវ។ ទៅហួសឆ្នេរអូឈើទាលបន្តិច ឆ្នេរខ្សាច់នេះត្រូវបានអ្នកខេត្តព្រះសីហនុហៅថា “ឆ្នេរអារីស្តុន” ។ កាលពីប៉ុន្មានឆ្នាំមុនទីតាំងនេះមានការហ៊ុមព័ទ្ធមិនឱ្យអ្នកដំណើរឆ្លងកាត់ ស្រូបយកខ្យល់អាកាសបានទេ។ ប៉ុន្តែរយៈពេលចុងក្រោយនេះ បានបើកឱ្យអ្នកទេសចរជាតិ និងអន្តរជាតិទៅលំហែរកម្សាន្តបាន។
“ពេលមកដល់សមុទ្រដំបូង ខ្ញុំឃើញទឹកសមុទ្រធំល្វឹងល្វើយដូចជាមានអារម្មណ៍ស្រស់ស្រាយ ប៉ុន្តែត្រលប់មកវិញពេលឃើញសំរាមបោះចោលពាសវាលពាសកាលបែបនេះមានអារម្មណ៍សោកស្តាយខ្លាំងណាស់”។ នេះបើតាមការរៀបរាប់របស់យុវជន ម៉ា សុភ័ក្រ និស្សិតសាកលវិទ្យាល័យភូមិន្ទភ្នំពេញ ដែលបានទៅកម្សាន្តនៅខេត្តព្រះសីហនុកាលពីពេលថ្មីៗនេះ។
សុភ័ក្រ ឱ្យដឹងទៀតថា គ្រប់ដំណើរកម្សាន្តអ្នកទេសចររមែងចង់ទៅទីកន្លែងដែលមានបរិស្ថានល្អស្អាត។ ប៉ុន្តែបើមានការបោះចោលសំរាម គ្មានអនាម័យ និងសណ្តាប់នោះ នឹងលែងក្លាយជាទីចាប់អារម្មណ៍របស់អ្នកទេសចរទៀតហើយ។ សុភ័ក្រ បន្ថែមទៀតថា ការរក្សាបាននូវបរិស្ថានស្អាតមិនត្រឹមតែទាក់ទាញភ្ញៀវទេសចរជាតិ និងអន្តរជាតិមកកម្សាន្តទេ។ ប៉ុន្តែទីតាំងនេះក៏អាចដណ្ដើមបាននូវកេរ្តិ៍ឈ្មោះជាឆ្នេរខ្សាច់ល្អស្អាត ដាច់គេនៅតំបន់អាស៊ីផងដែរ។ ដូច្នេះដើម្បីរក្សាបាននូវបរិស្ថានស្អាតនៅតំបន់ឆ្នេរ គ្រប់គ្នាត្រូវមានវិធានការទុកដាក់សំរាមឱ្យបានត្រឹមត្រូវ និងត្រូវប្រកាន់ភ្ជាប់ពេលមានសំរាមនៅជាប់ដៃត្រូវបោះចូលក្នុងធុងសំរាម។
ចំណែកយុវជន អៀង សុភក្តី និស្សិតរៀននៅវិទ្យាស្ថានបច្ចេកវិទ្យាកម្ពុជា បានបង្ហាញអារម្មណ៍សោកស្តាយនៅពេលឃើញសំរាម និងកម្ទេចកំទីជាច្រើនត្រូវបានបោះចោលពាសវាលពាសកាលនៅលើឆ្នេរខ្សាច់សក្បុសបែបនេះ។
សុភក្តី ឱ្យដឹងថា ដើម្បីឱ្យឆ្នេរស្អាត មានបរិស្ថានល្អគឺត្រូវផ្តើមពីយើងទាំងអស់គ្នា ដោយការបរិភោគអាហារ ហើយចេះវេចខ្ចប់ និងយកទៅបោះចោលក្នុងធុងសំរាមដោយខ្លួនឯង។ “វាគួរឱ្យខ្មាសអៀន ដែលអ្នកខ្លះ ចង់ស្អាត ចង់ល្អ ប៉ុន្តែរូបភាពជាក់ស្តែងពេលញ៉ាំ រួច បែរជាបោះចោលឆ្វេងស្តាំមិនគិតដល់បរិស្ថាន និងអារម្មណ៍អ្នកដទៃ”។
កញ្ញា ដានី និស្សិតវិទ្យាស្ថានបច្ចេកវិទ្យាកម្ពុជា យល់ថា មូលហេតុដែលសំរាមត្រូវបានបោះចោលអាចមកពីការយល់ដឹងរបស់ជាពលរដ្ឋនៅមានកម្រិត។ កញ្ញាថា ក្រៅពីបង្កផលប៉ះពាល់ដល់សោភណភាព និងអនាម័យ សំរាមក៏អាច ប៉ះពាល់ដល់លំហូរភ្ញៀវទេសចរផងដែរ។ កញ្ញាស្នើទៅអាជ្ញាធរពាក់ព័ន្ធ គួរបង្កើនការយកចិត្តទុកដាក់ទៅបញ្ហាបរិស្ថាន។ “មិនថាភ្ញៀវខ្មែរ ឬបរទេសទេ គ្រប់គ្នាគេចង់ទៅស្រូបខ្យល់អាកាស លេងទឹកសមុទ្រ និងឆ្នេរខ្សាច់ ប៉ុន្តែកាលណាមើលទៅសុទ្ធតែសំរាម គឺច្បាស់ជាលែងចង់ទៅហើយ”។
អ្នកស្រី គង់ រឿន អាជីវករលក់ដូរភេសជ្ជនៅម្ដុំ ឆ្នេរអារីស្តុន ឱ្យដឹងថា តំបន់ឆ្នេរនេះហាក់មិនត្រូវបានថែរក្សា និងយកចិត្តទុកដាក់សំអាតបរិស្ថានពីអាជ្ញាធរដូចនៅម្ដុំឆ្នេរអូឈើទាលទេ។ បន្ថែមលើនេះ យុវជនមួយចំនួនថែមទាំងផឹកស៊ីស្រវឹងនៅពេលយប់វាយកម្ទេចសម្ភារៈសាធារណៈមួយចំនួនដូចជា កៅអី ឆ័ត្រ និងបង់អង្គុយលេង ដែលទទួលបានការឧត្ថម្ភពីក្រុមហ៊ុនស្រាបៀរមួយទៀតផង។ “គួរឱ្យស្ដាយយើងមានឆ្នេរខ្សាច់ស្អាត និងកន្លែងអង្គុយលេងត្រឹមត្រូវ ដែលក្រុមហ៊ុនគេជួយធ្វើ ប៉ុន្តែបែរមិននាំគ្នាថែរក្សាបរិស្ថាន ទៅជាបោះចោលពាសវាលពាសកាល ថែមទាំងស្រវឹងវាយកម្ទេចកៅអី និងបង់អង្គុយលេងថែមទៀត”។
ឆ្នេរសមុទ្រប្រទេសកម្ពុជា មានប្រវែងសរុប ៤៤០គីឡូម៉ែត្រ។ ខេត្តមានមូលដ្ឋានជាប់ឆ្នេរសមុទ្ររួមមាន ខេត្តកោះកុង ខេត្តព្រះសីហនុ ខេត្តកំពត និងខេត្តកែប។ ខេត្តទាំង៤ នេះ ត្រូវបានដាក់បញ្ចូលជាសមាជិកពេញសិទ្ធិរបស់ក្លឹបឆ្នេរសមុទ្រ ដែលស្អាតបំផុតលើសកលលោក កាលពីថ្ងៃទី២៦ ខែឧសភា ឆ្នាំ២០១១ នៅប្រទេសសេណេហ្គាល់ (Senegal)៕