បូព្រឹក្ស បញ្ជាក់ថាទំនាក់ទំនងរវាង G-Devith លើសពីដៃគូចម្រៀង
- 2017-12-18 04:00:00
- ចំនួនមតិ 0 | ចំនួនចែករំលែក 0
បូព្រឹក្ស បញ្ជាក់ថាទំនាក់ទំនងរវាង G-Devith លើសពីដៃគូចម្រៀង
ចន្លោះមិនឃើញ
ពីក្រុមការងារជ្រកក្រោមផលិតកម្មតែ១ ទំនាក់ទំនងរបស់ G-Devith និង ទេព បូព្រឹក្ស បានវិវឌ្ឍយ៉ាងរហ័ស ដោយអ្នកទាំង២បានចាប់ដៃគ្នាធ្វើជាដៃគូចម្រៀង ហើយទទួលបានភាពជោគជ័យ និងការគាំទ្រគួរឲ្យកត់សម្គាល់។ នៅពេលនេះ ភាគី ទេព បូព្រឹក្ស បានសង្កត់ន័យថា ទំនាក់ទំនងរបស់អ្នកទាំង២កំពុងឈានឡើង១កម្រិតទៀតហើយ។
ក្រោយភាពជោគជ័យដែលទទួលបានជាបន្តបន្ទាប់ ទំនាក់ទំនងរបស់ ទេព បូព្រឹក្ស និងតារារ៉េប ងួន ចាន់ដេវីត កាន់តែស្និទ្ធស្នាលឡើងៗ រហូតមានអ្នកគាំទ្រ១ចំនួនសង្ស័យថាពួកគេកំពុងបង្កាត់ភ្លើងស្នេហ៍ជាមួយគ្នាទៀត។ ជុំវិញរឿងរ៉ាវនេះ ត្រូវបានភាគីទាំងសងខាងបដិសេធ ថាមិនមែនជាការពិតនោះទេ។
ជាមួយគ្នានេះ បូព្រឹក្ស បានបញ្ជាក់ប្រាប់ Sabay ថា ដោយសារបច្ចុប្បន្នរូប នាង ដេវិត បានក្លាយជាអ្នកភូមិផងរបងជាមួយ ហើយតែងតែចេញចូលជួបគ្នាជាញឹកញាប់ ដូចបងប្អូនសាច់ញាតិអីចឹង។
"តាំងពីលក់ផ្ទះឲ្យគាត់មក ឥឡូវនៅជិតខាងគ្នា ពេលធ្វើម្ហូប ឬសាច់អាំងម្ដងៗ ហៅគាត់មកញ៉ាំជុំគ្នា យូរៗទៅដូចគ្រួសារតែ១ចឹង"។ ម្ចាស់បទ "My សង្សារ" ថ្លែង។
មិនទាន់ចប់ត្រឹមនេះទេ ស្រីស្អាតដដែលបញ្ជាក់ថា នាពេលឆាប់ៗខាងមុខ អ្នកទាំង២នឹងចាប់ដៃគ្នាបើកអាជីវកម្មខ្នាតតូច១រួមគ្នាទៀត។ "បងត្រៀមបើករកស៊ីបន្តិចបន្តួចជាមួយគាត់។ ឆាប់ៗហ្នឹង!!! ប្រហែលជាដើមឆ្នាំ២០១៨អីបើកហើយ តែសុំលាក់សិនថារកស៊ីអ្វី"។ ទេព បូព្រឹក្ស បញ្ជាក់៕