បុគ្គលិកថ្មី ចៀសឲ្យបានដាច់ខាតកំហុស ៩យ៉ាង បើចង់ជាប់ពេញសិទ្ធិ

2017-12-18 03:39:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាគច្រើន ពេលចូលធ្វើការភ្លាមអ្នកមិនអាចក្លាយជាបុគ្គលិកពេញសិទ្ធិទេ គឺត្រូវឆ្លងកាត់ការងារសាកល្បងរយៈពេលចន្លោះពី ៣ ទៅ ៦ ខែ។ ប៉ុន្មានខែដំបូងនៃការងារនេះ គឺជាការរៀនសូត្រពីកន្លែងការងារ និងបញ្ចេញសមត្ថភាពរបស់អ្នក ដើម្បីអាចឲ្យគេសម្រេចបានថានឹងយកធ្វើជាបុគ្គលិកពេញសិទ្ធិ ឬអត់។ ក្នុងរយៈពេលនេះ ក្រុមហ៊ុននឹងធ្វើការវាយតម្លៃលើគ្រប់ចំណុចទាំងអស់។ ដូចនេះហើយ មិនត្រូវធ្វើអ្វីដែលអាចឲ្យគេចាត់ថ្នាក់បាននោះទេ។ ខាងក្រោមនេះ គឺជាកំហុសមួយចំនួនដែលអ្នកគួរជៀសវាង៖

១. សុំឈប់សម្រាកក្នុងពេលប៉ុន្មានខែដំបូង

ទង្វើបែបនេះ អាចនឹងនាំឲ្យអ្នកគ្រប់គ្រងរបស់អ្នកគិតថា៖ "ម្នាក់នេះទើបតែចូលមក ហើយនៅក្នុងពេលសាកល្បងការងារសោះ សុំឈប់ម្ល៉ឹងៗហើយ ចុះទម្រាំបានធ្វើការងារស៊ប់ទៀត តើឈប់យ៉ាងណាទៅ"។ មិនមែនថាមិនអាចឈប់សោះនោះទេ ប្រសិនបើមានបញ្ហាបន្ទាន់ និងមានមូលហេតុជាក់លាក់ អ្នកអាចសុំឈប់បាន។ ម្យ៉ាងវិញទៀត បើអ្នកមានការងារអ្វីផ្សេងដែលតម្រូវឲ្យអ្នកត្រូវឈប់ក្នុងអំឡុងពេលការងារដំបូងនេះ គួរប្រាប់អ្នកសម្ភាសន៍ឲ្យបានច្បាស់ជាមុន។

២. ទៅធ្វើការយឺត

ការទៅធ្វើការយឺត គឺជាទម្លាប់អាក្រក់មួយរបស់មនុស្សគ្រប់រូប ប៉ុន្តែអ្នកត្រូវព្យាយាមកែខៃឲ្យបានតាំងពីដំបូង។ ចំពោះអ្នកជាបុគ្គលិកថ្មី គួរជៀសវាងភាពយឺតយ៉ាវដាច់ខាតក្នុងរយៈពេលប៉ុន្មានខែដំបូងនៃការងារ។ ការយឺតយ៉ាវ អាចឲ្យគេគិតថាអ្នកជាមនុស្សមិនគោរពពេលវេលា ហើយក៏អាចជាមូលហេតុមួយដែលធ្វើឲ្យអ្នកមិនជាប់ការងារសាកល្បងដែរ។ ប្រសិនបើមានធុរៈបន្ទាន់ គួរប្រាប់ដល់កន្លែងការងារឲ្យបានច្បាស់ និងគោរពតាមពេលវេលាដែលអ្នកសន្យាថានឹងទៅដល់។

៣. រិះគន់មេថ្មី ប្រាប់អ្នករួមការងារ

ជាការពិតណាស់ ទោះជាអ្នកធ្វើការយូរមកហើយក៏ដោយ ក៏មិនត្រូវរិះគន់មេមុខអ្នករួមការងារដែរ។ បើអ្នកទើបតែទទួលបានការងារទៀត រឹតតែមិនគួរនិយាយពីរឿងនេះ ព្រោះអាចធ្វើអ្នកដទៃគិតថាអ្នកចាំតែចាប់កំហុស។ ប្រសិនបើអ្នកមានបញ្ហាជាមួយមេ គួរតែនិយាយផ្ទាល់ជាលក្ខណៈទ្វេភាគីជាមួយតែម្ដង ជៀសវាងយកបញ្ហានោះទៅរអ៊ូក្រោយខ្នងដាក់អ្នកដទៃ។

៤. បង្ហើបពីចំណុចអាក្រក់នៅកន្លែងការងារចាស់

នៅពេលដែលអ្នកចូលធ្វើការភ្លាម មិត្តរួមការងារប្រាកដជាចង់ដឹងថា តើហេតុអ្វីបានជាអ្នកលាឈប់ពីកន្លែងចាស់មករកការងារថ្មី។ ទោះយ៉ាងណាក៏ដោយ សូមកុំរីករាយនិយាយប្រាប់គេឲ្យសោះ បើទោះការងារចាស់នោះមានចំណុចអាក្រក់ប៉ុណ្ណាក៏ដោយ។ ការរៀបរាប់ពីចំណុចអាក្រក់នៅកន្លែងការងារចាស់ អាចនឹងធ្វើឲ្យគេម៉ៃថាអ្នកជាមនុស្សមាត់អត់គ្រប ថ្ងៃនេះនិយាយដើមកន្លែងចាស់ ថ្ងៃក្រោយប្រាកដជានិយាយដើមកន្លែងនេះ ប្រាប់ទៅកន្លែងថ្មីទៀត។ មុននឹងចែករំលែករឿងអស់នេះ គួររង់ចាំពេលណាមួយដែលអ្នកមានមិត្តរួមការងារអាចទុកចិត្តបាន និងយល់ចិត្តគ្នាច្បាស់ជាមុន។

៥. ធ្វើរឿងខុសគេក្នុងពេលទទួលទានអាហារនៅកន្លែងការងារ

ជាការពិតណាស់ ពីកន្លែងមួយទៅកន្លែងមួយ វប្បធម៌នៃការទទួលទានអាហារមានលក្ខណៈខុសគ្នាទៅតាមកន្លែងការងារ។ កន្លែងខ្លះគេចំណាយពេលដល់ទៅកន្លះម៉ោង ដើម្បីទទួលទានអាហារបណ្ដើរជជែកគ្នាបណ្ដើរ ឯកន្លែងខ្លះទៀតញ៉ាំអាហាររៀងៗខ្លួនប្រញាប់រួសរាន់ធ្វើការវិញ។ ប្រសិនបើអ្នកជាមនុស្សឆ្លាត គួរចំណាយពេលប៉ុន្មានថ្ងៃដំបូង សិក្សាពីវប្បធម៌នៅកន្លែងការងារថ្មី ដើម្បីដឹងថាគេប្រើពេលប៉ុន្មានទទួលទានអាហារ ហើយចូលចិត្តធ្វើអ្វីក្នុងពេលនេះ កុំឲ្យឆ្គងខុសគេ។

៦. មិនជួយសន្សំសំចៃក្រុមហ៊ុន

ពេលចូលធ្វើការ អ្នកគួរជួយបន្ថយការចំណាយរបស់ក្រុមហ៊ុន មិនគួររិះគន់ទៅលើកការត្បិតត្បៀតនៅកន្លែងការងារទេ។ ប្រសិនបើត្រូវទៅបំពេញការងារឆ្ងាយ មិនគួរគេងសណ្ឋាគារថ្លៃៗ ហើយជិះឡានល្អៗនោះទេ ត្រូវកាត់បន្ថយតាមដែលអាចធ្វើទៅបាន។ ឯនៅកន្លែងការងារវិញ គួរចេះមានចិត្ត ជួយបិទភ្លើង បិទកុំព្យូទ័រ នៅម៉ោងសម្រាក ជៀសវាងបើកចោលនាំឲ្យខ្ជះខ្ជាយភ្លើង។ ប្រការនេះអាចមានប្រយោជន៍ច្រើនដល់អ្នក ជាពិសេសពេលអ្នកទើបតែចាប់ផ្ដើមការងារ។ នៅពេលក្រុមហ៊ុនចំណាយតិច ហើយឡើងចំណូល នោះប្រាក់ខែអាចនឹងឡើងលឿនតាមនោះដែរ។

៧. ប្រើពាក្យមិនគួរសម ឬលេងសើចច្រើន

អ្នកចូលធ្វើការថ្មីៗ មិនគួរប្រើពាក្យលេងសើចច្រើនពេកទេ ព្រោះអាចធ្វើឲ្យប៉ះពាល់អារម្មណ៍អ្នកដទៃ ក្នុងពេលដែលអ្នកជាសមាជិកថ្មីនោះ។ គួរប្រើពេលយូរបន្តិច ដើម្បីស្វែងយល់ពីអ្នករួមការងារ ថាគេចូលចិត្តលេងសើចឬអត់ មុនពេលដែលអ្នកបង្កើតបរិយាកាសនេះឡើង។

៨. ចំណាយពេលធ្វើអ្វីផ្សេងក្រៅពីការងារ

ពេលអ្នកទើបចូលធ្វើការថ្មីៗ ពិសេសបីខែដំបូងនៃការងារសាកល្បង គួរបញ្ចេញឲ្យអស់នូវសមត្ថភាពដែលអ្នកមាន ជៀសវាងចំណាយពេលលេង Facebook ឬបណ្ដាញទំនាក់ទំនងសង្គមផ្សេងទៀត។ ការធ្វើសកម្មភាពផ្សេងក្នុងពេលការងារការងារដំបូង អាចធ្វើឲ្យអ្នករួមការងារគិតថា អ្នកជាមនុស្សមិនរវល់នឹងការងារ និងមិនខ្ជះខ្ជាយពេលវេលាអត់ប្រយោជន៍។

៩. ជជីកសួរបុគ្គលិកចាស់រឿងប្រាក់ខែ

វាជារឿងមិនសមទាល់តែសោះ ដែលអ្នកសួរបុគ្គលិកចាស់ៗរឿងប្រាក់ខែ។ ការសួរនិយាយរឿងប្រាក់នៅកន្លែងការងារ នឹងធ្វើអ្នកធ្វើការជាមួយ ក៏ដូចជាមេកើយរបស់អ្នកគិតថា អ្នកគ្មានឆន្ទៈក្នុងការងារទេ ធ្វើការដើម្បីតែប្រាក់ខែតែប៉ុណ្ណោះ។ ម្យ៉ាងវិញទៀត រឿងប្រាក់ខែគឺជាការសម្ងាត់របស់ក្រុមហ៊ុននីមួយៗ ដើម្បីកុំឲ្យមានការច្រណែនគ្នា។ ប្រសិនបើអ្នកមានសមត្ថភាពខ្ពស់ ប្រាក់ខែក៏ឡើងច្រើនតាមហ្នឹងដែរ៕

ចុចអានអត្ថបទ៖

ប្រភព៖ Sellick Partnership ប្រែសម្រួល៖ គង់ វិសាល