មានកីឡាករ Liverpool ណាស៊ុតលឿនជាង Salah ទេ?

2017-12-18 12:22:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាមួយនឹងការស៊ុតចូលមួយគ្រាប់យប់មិញនេះ ខ្សែប្រយុទ្ធរត់លឿន Mohamad Salah បានបំប៉ោងសំណាញ់ទីបានចំនួន ២០លើកហើយ ឲ្យក្លឹប Liverpool។ ប៉ុន្តែអ្វីដែលគួរឲ្យកត់សម្គាល់ កីឡាករអេហ្ស៊ីបរូបនេះ បានប្រើពេលតែ ២៦ប្រកួតដំបូងរបស់ខ្លួនប៉ុណ្ណោះ ដើម្បីសម្រេចបានចំនួនគ្រាប់បាល់រហូតដល់ប៉ុណ្ណឹង។ ក្នុងន័យនេះ អត្ថបទនឹងលើកឡើងពីកីឡាករហង្សក្រហមចំនួន ៦រូបទៀតដែលស៊ុតបាន២០គ្រាប់ ដោយប្រើចំនួនប្រកួតដំបូងតិច ដើម្បីយកមកប្រៀបធៀបជាមួយស្ថិតិរបស់ Salah មានដូចតទៅ៖

៦. Luis Suarez៖ ខ្សែប្រយុទ្ធអ៊ុយរុយហ្គាយរូបនេះ ត្រូវការពេលចំនួន ៥១ប្រកួតដំបូងរបស់ខ្លួន ដើម្បីសម្រេចគ្រាប់បាល់ចំនួន ២០ ឲ្យក្លឹបហង្សក្រហម។

៥. Michael Owen៖ អតីតខ្សែប្រយុទ្ធមុតស្រួច Owen ប្រើត្រឹមតែ ៣៨ប្រកួតដំបូងប៉ុណ្ណោះ ដើម្បីស៊ុតចូល ២០គ្រាប់ឲ្យក្លឹបមួយនេះ។

៤.Robbie Fowler៖ វីរបុរសក្លឹបហង្សក្រហមរូបនេះ បានធ្វើការស៊ុតចូលទីបានចំនួន ២០គ្រាប់ ក្រោយបង្ហាញខ្លួនឲ្យក្លឹបត្រឹមតែ ៣៦លើកដំបូង។

៣.Fernando Torres៖ ខ្សែប្រយុទ្ធរូបនេះ ត្រូវការពេល ៣១ ប្រកួត ដើម្បីស៊ុតចូល ២០គ្រាប់ដំបូងឲ្យក្លឹប។

២.Daniel Sturridge៖ មុនពេលរបួសរាំរៃ ខ្សែប្រយុទ្ធ Sturridge បង្ហាញទម្រង់លេងមុខទីល្អណាស់ ឲ្យក្លឹបហង្សក្រហម ក្រោយផ្ទេរពី Chelsea កាលពីឆ្នាំ ២០១៣។ ដូច Salah ដែរ កីឡាករអង់គ្លេសរូបនេះ ប្រើពេលតែ ២៦ប្រកួតដំបូងប៉ុណ្ណោះ ដើម្បីស៊ុតចូលចំនួន ២០គ្រាប់ឲ្យក្លឹប។

១.George Allan៖ ខ្សែប្រយុទ្ធសញ្ជាតិស្កុតឡែនរូបនេះ ត្រូវការពេលតែ ១៩ប្រកួតប៉ុណ្ណោះ ដើម្បីស៊ុតបញ្ចូលទី ២០គ្រាប់ដំបូងឲ្យក្លឹបហង្សក្រហម នៅក្នុងរដូវកាល ១៨៩៥/១៨៩៦ ពោលគឺជាង ១សតវត្សមុន។

សរុបមក មានតែ George Allan ប៉ុណ្ណោះ ដែលស៊ុតចូល ២០ គ្រាប់ដំបូងឲ្យហង្សក្រហម លឿនជាង Salah ហើយមានតែ Sturridge ទេដែលមានកំណត់ត្រាស៊ុតលឿនស្មើនឹងកីឡាករអេហ្ស៊ីបរូបនេះ (ដោយគិតចំនួនប្រកួតដំបូង)៕