ក្រុមឈ្នះជើងឯក AFC Cup ទទួលបានប្រាក់រង្វាន់ច្រើនគួរសម

2017-12-19 02:00:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមដែលបានឈ្នះជើងឯកលីគកំពូលកម្ពុជា ឆ្នាំ២០១៧ នេះ នឹងបានលេងវគ្គសន្សំពិន្ទុតាមពូល (Group Stage) នៃពានរង្វាន់ទ្វីបអាស៊ី AFC Cup 2018 ដោយស្វ័យប្រវត្តិ ដោយមិនចាំបាច់ឆ្លងកាត់វគ្គជម្រុះ ឬវគ្គ Play Off នោះទេ។ នេះបើតាមការឲ្យដឹងពីគណៈកម្មការប្រកួតបាល់ទាត់ជាតិកម្ពុជា (CNCC) កាលពីម្សិលមិញ។ ប៉ុន្តែប្រិយមិត្តប្រហែលមិនទាន់ដឹងទេថា អ្នកដែលឈ្នះជើងឯកពានរង្វាន់នេះទទួលបានប្រាក់រង្វាន់ប៉ុន្មាន?

ការប្រកួតវគ្គ Group Stage ដំបូងរបស់ក្រុមជើងឯកកម្ពុជា នឹងប៉ះក្រុមរបស់ហ្វីលីពីននៅថ្ងៃទី១៣ ខែកុម្ភៈ ឆ្នាំ២០១៨ នៅប្រទេសហ្វីលីពីន។ ចំណែកក្រុមបឹងកេត ដែលជាជើងឯកលីគកំពូលកម្ពុជា ឆ្នាំ២០១៦ បានលេងនៅវគ្គ Group Stage នៃពានរង្វាន់ AFC Cup 2017 ។ ប៉ុន្តែមុនមកដល់វគ្គនេះ បឹងកេត ត្រូវលេងនៅវគ្គ Play Off ជាមួយក្រុមឡាវ Lao Toyota ដោយបានយកឈ្នះ ២-១ (សរុបទាំង២ជើង)។ ប៉ុន្តែដោយមើលទៅលើការប្រកាសរបស់ ( CNCC ) បានសេចក្ដីថា ក្រុមលីគកំពូលកម្ពុជាមិនបាច់ធ្វើការជម្រុះទៀតទេ។

ដោយឡែកសម្រាប់ប្រាក់រង្វាន់នៃការទទួលបានពីព្រឹត្តិការណ៍នេះវិញគឺ៖ ជើងឯកទទួលបាន ១,៥ លានដុល្លារអាមេរិក និងក្រុមឈ្នះជើងឯករងទទួលបាន ៧៥ ម៉ឺនដុល្លារអាមេរិក។ ក្រៅពីប្រាក់រង្វាន់ទាំងនេះក្រុមដែលបានចូលរួមទាំងអស់ទទួលបានប្រាក់ថ្លៃធ្វើដំណើរចំនួន ២ ម៉ឺនដុល្លារអាមេរិក ហើយក្រុមដែលឈ្នះជើងឯកនៅតាមតំបន់វិញទទួលបាន ១០ម៉ឺនដុល្លារអាមេរិកផងដែរ៕