Smart ឲ្យអាហារូបករណ៍សិស្សឆ្នើម ២០ នាក់ ម្នាក់បាន ១៥ ០០០ ដុល្លារ

2017-12-19 07:44:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Smart Axiata បានប្រកាសបេក្ខភាពសិស្ស ២០រូបដែលនឹងទទួលបានអាហារូបករណ៍១០០% សម្រាប់ការសិក្សានៅតាមសាកលវិទ្យាល័យនានាតាមរយៈកម្មវិធីអាហារូបករណ៍ SmartEdu ដែលទទួលបានការគាំទ្រពីក្រសួងអប់រំ យុវជន និងកីឡា ព្រមទាំងក្រសួងប្រៃសណីយ៍ និងទូរគមនាគមន៍ ដោយក្នុងម្នាក់ទទួលបានស្មើនឹងទឹកប្រាក់ ១៥ ០០០ដុល្លារ។

ឯកឧត្ដមបណ្ឌិត ហង់ ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា បានថ្លែងថា៖ "កម្មវិធីអាហារូបករណ៍របស់ Smart ដើរតួនាទីសំខាន់ក្នុងការធានាថា និស្សិតឆ្លាតវៃ និងដែលមានសក្ដានុពលបំផុត អាចបន្តការសិក្សារបស់ខ្លួន ដោយមិនអាស្រ័យលើស្ថានភាពហិរញ្ញវត្ថុរបស់ខ្លួននោះទេ"។

ឯកឧត្ដមបណ្ឌិត ហង់ ជួន ណារ៉ុន (ឆ្វេង)

ឯកឧត្ដមបណ្ឌិត កាន ចាន់មេតា្ត រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានបន្ថែមថា៖ "ក្រសួងប្រៃសណីយ៍ និងទូរគមនាគមន៍ បានកំណត់អាទិភាពចម្បងនានា ដើម្បីអភិវឌ្ឍអ្នកមានទេពកោសល្យផ្នែក ICT និងកម្លាំងពលកម្មផ្នែកឌីជីថល ឲ្យបានកាន់តែច្រើនថែមទៀតក្នុងឆ្នាំខាងមុខ ដើម្បីបំពេញសេចក្ដីត្រូវការនៃសេដ្ឋកិច្ចបែបឌីជីថលរបស់កម្ពុជា"។

សិស្សដែលទទួលបានអាហារូបករណ៍ទាំង ២០នាក់ ត្រូវបានជ្រើសរើសក្នុងចំណោមបេក្ខជនជាង ១០០នាក់ទូទាំងប្រទេស ហើយក្រៅពីជំនួយហិរញ្ញវត្ថុ ពួកគេនឹងទទួលបានឱកាសផ្សេងៗ ដូចជាការចូលរួមកម្មវិធីអភិវឌ្ឍន៍ ក៏ដូចជាលទ្ធភាពទទួលបានការងារធ្វើនៅ Smart បន្ទាប់ពីបញ្ចប់ការសិក្សា។

លោក ថូម៉ាស ហ៊ុន នាយកប្រតិបត្តិ Smart Axiata បាននិយាយថា៖ " Smart មានកិត្តិយសដែលបានរួមចំណែកវិជ្ជមានសម្រាប់យុវជនជំនាន់ថ្មីរបស់កម្ពុជា ហើយបានគាំទ្រសិស្សទាំងនេះ ដើម្បីឲ្យពួកគេបានបន្តការសិក្សាខ្ពស់មួយកម្រិតទៀត"។

លោក រុន សីហា សិស្សទទួលបានអាហារូបករណ៍ SmartEdu សម្រាប់ឆ្នាំ២០១៧ បានលើកឡើងថា៖ "ខ្ញុំគិតថាអាហារូបករណ៍នេះជាឱកាសល្អបំផុតសម្រាប់សិស្ស ដែលជួបបញ្ហាផ្នែកហិរញ្ញវត្ថុ ចង់បន្តការសិក្សារបស់ខ្លួន"។

ព័ត៌មានបន្ថែម តាមដានលើផេកហ្វេសប៊ុក Smart for Cambodia ឬចូលវិបសាយ www.smart.com.kh ៕