រកឃើញសំបុកកន្ធាយក្បាលកង្កែបជិតផុតពូជ សម្រាប់រដូវកាលពងកូនឆ្នាំនេះ នៅទន្លេមេគង្គ
- 2017-12-19 07:52:06
- ចំនួនមតិ 0 | ចំនួនចែករំលែក 0
រកឃើញសំបុកកន្ធាយក្បាលកង្កែបជិតផុតពូជ សម្រាប់រដូវកាលពងកូនឆ្នាំនេះ នៅទន្លេមេគង្គ
ចន្លោះមិនឃើញ
សំបុកពងកូនសត្វកន្ធាយក្បាលកង្កែបចំនួន ០១សំបុក ត្រូវបានក្រុម អ្នកអភិរក្សនៃរដ្ឋបាលជលផល អង្គការសមាគមអភិរក្សសត្វព្រៃ និងប្រជាសហគមន៍ រកឃើញជាលើកដំបូងនៅក្នុងរដូវកាលពងកូនឆ្នាំនេះនៅឆ្នេរខ្សាច់ដងទន្លេមេគង្គចន្លោះខេត្តក្រចេះ និងស្ទឹងត្រែង ដែលជាទីកន្លែងពងកូនតែមួយគត់នៅក្នុងប្រទេសកម្ពុជានៅថ្ងៃទី១៩ ខែធ្នូ ឆ្នាំ២០១៧។ សំបុកកន្ធាយក្បាលកង្កែបនេះ ត្រូវបានប្រជាសហគមន៍ការពារ រហូតដល់ពងកន្ធាយទាំងអស់នោះញាស់ ហើយកូនកន្ធាយនឹង ត្រូវលែងឲ្យទៅរកនៅក្នុងទន្លេវិញ។
សត្វកន្ធាយក្បាលកង្កែប (ឬរមិច) ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតនៅលើសាកលលោក។ ពួកវាត្រូវបានគេគិតថាផុតពូជពីកម្ពុជាទៅហើយ រហូតដល់ឆ្នាំ ២០០៧ពួកវាត្រូវបានគេរកឃើញម្តងទៀតនៅក្នុងបរិវេណ ៤៨គីឡូម៉ែត្រ នៅដងទន្លេមេគង្គចន្លោះខេត្តក្រចេះ និងស្ទឹងត្រែង។ គម្រោង អភិរក្សសត្វកន្ធាយក្បាលកង្កែបនៅដងទន្លេមេគង្គ កន្លងមកអនុវត្តដោយអង្គការអភិរក្សអន្តរជាតិ ហើយបានផ្ទេរមកឲ្យអង្គការWCS សហការជាមួយរដ្ឋបាលជលផល និងសម្ព័ន្ធដើម្បីការរស់រានប្រភេទសត្វអណ្តើក។
កម្មវិធីការពារសំបុកលើកទឹកចិត្តឲ្យប្រជាសហគមន៍រស់នៅខេត្តក្រចេះ និងស្ទឹងត្រែង ចូលរួមការពារសត្វកន្ធាយក្បាលកង្កែប ដោយបានជ្រើសរើសអតីតអ្នកប្រមូលពង និងមេពូជកន្ធាយក្បាលកង្កែបឲ្យមកធ្វើការងារជាបុគ្គលិករបស់គម្រោងដើម្បីស្វែងរក និងការពារសំបុកសត្វកន្ធាយក្បាលកង្កែប ជំនួសឲ្យការប្រមូលយកពង និងមេពូជយកទៅហូប និងលក់។ រហូតមកដល់ពេលនេះ សំបុកពងចំនួន ៣៧៨ ត្រូវបានការពារ ហើយជាលទ្ធផលទទួលបានកូនញាស់ចំនួន ៨ ៥២៨កូន។
លោក សោម ស៊ីថា ទីប្រឹក្សាបច្ចេកទេសគម្រោងអភិរក្សសត្វអណ្តើក បាននិយាយថា៖ “ចាប់ពីឥឡូវនេះ រហូតដល់ខែមិថុនា គឺជាអំឡុងពេលសត្វកន្ធាយក្បាលកង្កែបពងកូន។ នេះគឺជាសំបុកទី ០១ដែលយើងបានរកឃើញនៅក្នុងឆ្នាំនេះ។ យើងនឹងធ្វើការរួមគ្នាជាមួយរដ្ឋបាលជលផល និងប្រជាសហគមន៍ដើម្បីស្វែងរកសំបុកបន្ថែមទៀតនៅតាមដងទន្លេមេគង្គ ដើម្បីការពារពួកវាពីការប្រមូលយកពងកូន ជាដើម”។
លោក សោម ស៊ីថា បានបន្តថា៖ “កន្ធាយក្បាលកង្កែប គឺជាប្រភេទដ៏កម្រដែលអាចនឹងផុតពូជនៅក្នុងពេលអនាគត ប្រសិនបើយើងមិនមានវិធានអភិរក្សពួកវាឲ្យបានសមស្របទេនោះ។ ពួកវាមិនមានច្រើនក្បាលទេ ដែលរស់នៅក្នុងធម្មជាតិ។ ប្រជាពលរដ្ឋគ្រប់រូបអាចចូលរួមការពារប្រភេទសត្វដ៏កម្រមួយនេះបាន ដោយបញ្ឈប់ការទិញ ឬក៏បរិភោគសាច់ ឬពងរបស់វា”។
ការងារអភិរក្សកន្ធាយក្បាលកង្កែបទទួលបានការគាំទ្រពីម្ចាស់ជំនួយដូចជា Critical Ecosystem Partnership Fund (CEPF) អង្គការអភិរក្សអន្តរជាតិ និងសម្ព័ន្ធដើម្បីការរស់រានប្រភេទសត្វអណ្តើក៕
កន្ធាយក្បាលកង្កែបទម្ងន់ជាង ១៨គីឡូ ត្រូវបានអភិរក្សជូនភ្ញៀវទេសចរទស្សនា (មានវីដេអូ)
កន្ធាយក្បាលកង្កែប សត្វកម្របំផុតលើពិភពលោក មាននៅកម្ពុជា ជិតផុតពូជហើយព្រោះ.....