កុំមើលរំលងការសំអាតមាត់ធ្មេញ! Trackback
ជំងឺធ្មេញអាចបណ្តាលអោយបាក់តេរីចូលទៅក្នុងលំហូរឈាមរបស់អ្នក ហើយនឹងបង្ករជាផលវិបាកនៅកន្លែងណាមួយនៃរាងកាយរបស់អ្នក។ ឬពេលខ្លះ សញ្ញានៃជំងឺអាចបង្ហាញជាដំបូងនៅក្នុងមាត់របស់អ្នក។
ទោះបីជាយ៉ាងណាភ្នែកអាចជាទ្វារវិញ្ញាណ មាត់ជាបង្អួចនៃសុខភាពរាងកាយរបស់អ្នក។ ស្ថានភាពនៃសុខភាពមាត់របស់អ្នកអាចផ្តល់តំរុយជាច្រើនពីសុខភាពរាងកាយរបស់អ្នកទាំងមូល។ សុខភាពមាត់និងសុខភាពរួមរបស់អ្នកអាចមានទំនាក់ទំនងនឹងគ្នាជាងការដែលអ្នកដឹង។
សុខភាពរួមរបស់មនុស្សមានទំនាក់ទំនងជាមួយស្ថានភាពសុខភាពផ្សេងទៀតលើសពីមាត់។ ពេលខ្លះសញ្ញាដំបូងរបស់ជំងឺបង្ហាញនៅក្នុងមាត់។ នៅក្នុងករណីផ្សេងទៀត កង្វល់នៅក្នុងមាត់របស់អ្នក ដូចជាជំងឺធ្មេញអាចបង្ករអោយមានបញ្ហានៅកន្លែងផ្សេងទៀតនៃរាងកាយរបស់អ្នក។ ស្វែងយល់ទាំងអស់គ្នាជាមួយសប្បាយទាក់ទិននឹងសុខភាពមាត់និងសុខភាពរួម។
ទំនាក់ទំនងរវាងសុខភាពមាត់និងសុខភាពរួម
ជាទូទៅមាត់ប្រមូលផ្តុំដោយបាក់តេរី។ ជាធម្មតាអ្នកអាចគ្រប់គ្រងបាក់តេរីទាំងនេះបានជាមួយនឹងការថែទាំសុខភាពមាត់អោយបានល្អ ដូចជាការដុសធ្មេញប្រចាំថ្ងៃនិងការខ្ពល់មាត់។ ទឹកមាត់ក៏ជាកូនសោសំខាន់សំរាប់ការប្រឆាំងនឹងបាក់តេរី និងវីរុសផងដែ។ ទឹកមាត់មានអង់ស៊ីមដែលអាចកំចាត់បាក់តេរីតាមវិធីជាច្រើន។ តែបាក់តេរីដែលមានគ្រោះថ្នាក់ខ្លាំងពេលខ្លះមិនអាចគ្រប់គ្រងបានទេ ដែលបណ្តាលអោយមានជំងឺធ្មេញធ្ងន់ធ្ងរ។
នៅពេលធ្មេញមានសុខភាពល្អ បាក់តេរីនៅក្នុងមាត់មិនចូលក្នុងលំហូរឈាមទេ។ ទោះយ៉ាងណាជំងឺធ្មេញអាចបណ្តាលអោយបាក់តេរីចូលទៅក្នុងលំហូរឈាមបាន។ ពេលខ្លះការព្យាបាលធ្មេញដែលខ្វះវិជ្ជាជីវៈក៏អាចបណ្តាលអោយបាក់តេរីចូលក្នុងលំហូរឈាមដែរ។ ហើយការប្រើប្រាស់ថ្នាំ ឬព្យាបាលដែលកាត់បន្ថយលំហូរទឹកមាត់ ឬធ្វើអោយខូចតុល្យភាពនៃបាក់តេរីក្នុងមាត់ ក៏អាចនាំទៅរកការផ្លាស់ប្តូរស្ថានភាពសុខភាពមាត់ ដែលធ្វើអោយបាក់តេរីកាន់តែងាយចូលទៅក្នុងលំហូរឈាម។ អ្នកស្រាវជ្រាវមួយចំនួនជឿថាបាក់តេរីទាំងនេះមានទំនាក់ទំនងជាមួយបញ្ហាផ្សេងទៀតនៃរាងកាយ។
សុខភាពមាត់និងស្ថានភាពសុខភាពផ្សេងទៀត
ទាំងនេះគឺជំងឺខ្លះៗដែលមានជាប់ពាក់ព័ន្ធនឹងសុខភាពមាត់៖
- ជំងឺសរសៃឈាមបេះដូង ការស្រាវជ្រាវបង្ហាញថាប្រភេទជាច្រើននៃជំងឺសរសៃឈាមបេះដូងមានជាប់ពាក់ព័ន្ធជាមួយនឹងសុខភាពមាត់។ ដែលរាប់បញ្ចូលទាំងជំងឺបេះដូង និង ការស្ទះសរសៃឈាម។
-ការមានផ្ទៃពោះ និង ការសម្រាល ជំងឺធ្មេញមានទំនាក់ទំនងនឹងការសម្រាលមិនគ្រប់ខែ។ ហេតុដូច្នេះហើយទើបស្ត្រីត្រូវរក្សាសុខភាពមាត់អោយបានល្អមុនពេលមានផ្ទៃពោះនិងក្រោយពេលសម្រាល។
-រោគទឹកនោមផ្អែម ជំងឺទឹកនោមផ្អែមបង្កើនអត្រាគ្រោះថ្នាក់នៃជំងឺធ្មេញ ដង្កូវស៊ីធ្មេញ បាក់ធ្មេញ ស្ងួតមាត់ និង ជំងឺឆ្លងក្នុងមាត់ជាច្រើន។ សុខភាពមាត់ធ្មេញមិនល្អធ្វើអោយជំងឺទឹកនោមផ្អែមកាន់តែពិបាកព្យាបាល។
- HIV/AIDS បញ្ហាមាត់គឺជារឿងមួយមានជាទូទៅចំពោះអ្នកមានជំងឺ HIV/AIDS។ រោគសញ្ញាដែលមានជាទូទៅគឺ ដំបៅមាត់ មាត់ស្ងួត និង ការឈឺចាប់ក្នុងមាត់ផ្សេងទៀត។
-ស្ថានភាពផ្សេងទៀត ស្ថានភាពផ្សេងទៀតជាច្រើនអាចមាននៅក្នុងមាត់មុនពេលអ្នកជំងឺដឹងថាមានបញ្ហា។ បញ្ហាទាំងនោះអាចរួមមាន៖ ជំងឺមហារីក បញ្ហាទទួលទានអាហារជាដើម។
តើយើងអាចធ្វើអ្វីខ្លះចំពោះសុខភាពមាត់!
ប្រសិនបើប្រិយមិត្តមិនទាន់មានហេតុផលគ្រប់គ្រាន់ក្នុងការថែរក្សាមាត់ និង ធ្មេញទេ ទំនាក់ទំនងសុខភាពមាត់និងសុខភាពរួមរបស់អ្នកនឹងកាន់តែមានខ្លាំងឡើង។ ត្រូវដោះស្រាយដោយសំអាតមាត់ធ្មេញជារៀងរាល់ថ្ងៃ។ ការថែរក្សាសុខភាពរួមរបស់ប្រិយមិត្តនៅថ្ងៃនេះមិនគ្រាន់តែសំរាប់ថ្ងៃនេះទេ តែក៏សំរាប់អនាគតផងដែរ។
បកប្រែៈ ស្រ៊ុន ម៉េងគាង
