បច្ចុប្បន្ន​គេ​សង្កេត​ឃើញ​ថា​ យុវវ័យ​ខ្មែរ​ចំនួន​កាន់​តែ​កើន​ឡើង​​ដែល​មាន​ការ​ចាប់​អារម្មណ៍​លើ​វិស័យ ICT ដោយ​សារ​ពួកគេ​មើល​ឃើញ​ថា វិស័យ​នេះ​កំពុង​មាន​សន្ទុះ​រីកចម្រើន​យ៉ាង​ខ្លាំង​គួរ​ឲ្យ​កត់​សម្គាល់​នា​ពេល​បច្ចុប្បន្ន។ ជាក់ស្ដែង​កាល​ពី​ពេល​ថ្មីៗ​នេះ​នៅ​ក្នុង​វេទិកា​មួយ​មាន​ឈ្មោះ​ថា “កម្ពុជា​បើក​ទូលាយ ឬ Open Cambodia” ជា​វេទិកា​ដែល​ផ្ដោត​សំខាន់​លើ​ការ​ប្រើ​បច្ចេកវិទ្យា​ព័ត៌មាន​វិទ្យា គេសង្កេត​ឃើញ​មាន​យុវជន​យុវនារី​ខ្មែរ​ជាច្រើន​មក​ពី​ស្ថាប័ន​ផ្សេងៗ បាន​ចូលរួម​ក្នុង​សកម្មភាព​នេះ​យ៉ាង​ផុលផុស និង​យ៉ាង​សស្រាក់សស្រាំ​។ តើ​ការ​ចូលរួម​របស់​ពួកគេ​ក្នុង​វេទិកា​នេះ​ទទួល​បាន​អត្ថប្រយោជន៍ និង​ចំណេះ​ដឹង​អី​ខ្លះ​ទៅ?

ជួប​ជាមួយ​ធីម ច័ន្ទឬទ្ធី អ្នក​ដែល​បាន​បង្កើត Moon OS ខ្មែរ​ដំបូង​គេ​បាន​ឲ្យ​ដឹង​ថា វេទិកា​នេះ​មាន​អត្ថ​ប្រយោជន៍​ ព្រោះ​អាច​ឲ្យ​គេ​បាន​ដឹង​នូវ​រឿងរ៉ាវ​ជា​ច្រើន​ដែល​កំពុង​កើត​មាន​ទាក់ទិន​នឹង​បច្ចេកវិទ្យា​​ព័ត៌មានវិទ្យា​នា​ពេល​បច្ចុប្បន្ន។ “…ខ្ញុំ​អាច​ស្គាល់​បច្ចេកវិទ្យា​ថ្មីៗ​ដែល​គេ​កំពុង​តែ​អភិវឌ្ឍ ជាពិសេស​អាច​ឲ្យ​គេ​ទទួល​បាន​ចំណេះដឹង​ជា​គន្លឹះ​ពី​អ្នក​ជំនាញ​ដែល​មាន​បទ​ពិសោធន៍។

លើស​ពី​នេះ វេទិកា​នេះ​ជា​ការ​ចែក​រំលែក​នូវ​ចំណេះ​ដឹង ឬ​ការ​រក​ឃើញ​ថ្មី​ឲ្យ​គ្នា​ទៅ​វិញ​ទៅ​មក​សម្រាប់​ទុក​ជា​ប្រយោជន៍​ប្រើប្រាស់”។

ទោះ​បី​មាន​ការងារ​មមាញឹក​យ៉ាង​ណា​ប៉ុន្តែ មុនីរ៉េត នៅតែ​ឆ្លៀត​ឱកាស​មក​ចូលរួម​ជាមួយ​យុវវ័យ​ជា​ច្រើន​ទៀត​នា​ឱកាស​នោះ​ដែរ។ បុគ្គលិក​រូប​នេះ​បាន​ឲ្យ​ដឹង​ថា៖ “វេទិកា​នេះ​ធ្វើ​ឲ្យ​ខ្ញុំ​យល់​ដឹង​បាន​ច្រើន​ពាក់ព័ន្ធ​នឹង​ការ​ប្រើ​កម្មវិធី​ថ្មីៗ​លើ​ប្រព័ន្ធ​កុំព្យូទ័រ។ កម្មវិធី​មួយ​ចំនួន​អត់​សូវ​បាន​ស្គាល់ ហើយ​ពេល​ខ្លះ​ក៏​អត់​ដឹង​ពី​ប្រយោជន៍​ប្រើប្រាស់​របស់​វា​នោះ​ដែរ។ ដូច្នេះ​ការ​ចូលរួម​នេះ​អាច​ឲ្យ​ខ្ញុំ​ទទួល​បាន​គំនិត​ថ្មី​បន្ថែម​ដើម្បី​យក​មក​អភិវឌ្ឍ​ខ្លួន​ឯង​ឲ្យ​កាន់​តែ​មាន​ភាព​ល្អ​ប្រសើរ”។

និស្សិត​សិក្សា​ជំនាញ​សង្គមវិទ្យា​នៅ​សាកលវិទ្យាល័យ​ភូមិន្ទ​ភ្នំពេញ គីមហុង ទោះ​បី​មិន​សូវ​មាន​ចំណេះ​ដឹង​ជ្រៅជ្រះ​ផ្នែក​ព័ត៌មាន​វិទ្យា ប៉ុន្តែ​ក៏​បាន​បង្ហាញ​គំនិត​គាំទ្រ​ឲ្យ​មាន​វេទិកា​នេះ​ដែរ។ គីមហុង បាន​លើក​ឡើង​ថា វេទិកា​នេះ​បាន​ផ្ដល់​ឱកាស​ដ៏​ល្អ​ដល់​យុវវ័យ​អាច​យក​ស្នាដៃ និង​គំនិត​ដែល​ខ្លួន​មាន​យក​មក​សិក្សា​រួម​គ្នា​ក្នុង​គោលដៅ​ស្វែង​រក​ចំណុច​ខ្វះខាត និង​ធ្វើ​ការ​កែ​លម្អ​បន្ថែម​ទៀត។

កម្ពុជា​បើក​ទូលាយ ឬ Open Cambodia ជា​វេទិកា​ដែល​រៀបចំ​ឡើង​ដោយ​វិទ្យាស្ថាន​គ្រប់គ្រង​បូព៌ា​បស្ចិម ដោយ​សហការ​ជាមួយ​ដៃគូ​មក​ពី Mozillia/Aspiration និង​ក្រុម​ដើម្បី​ផ្លាស់​ប្ដូរ​សង្គម និង​បច្ចេកវិទ្យា​នៃ​សាកលវិទ្យាល័យ Washington ក្រោម​ការ​ឧបត្ថម្ភ​ពី USAID របស់​អាមេរិក។ វេទិកា​នេះ​ធ្វើ​ឡើង​ដើម្បី​ជួបជុំ​គ្នា​រវាង​អ្នក​បង្កើត​ Open Source នៅ​កម្ពុជា​ជាមួយ​អ្នក​ជំនាញ​មក​ពី​អាមេរិក​ក្នុង​កិច្ចការ​អភិវឌ្ឍ Open Web។

តើមិត្តយុវវ័យធ្លាប់​បាន​ចូលរួមវេទិកាបែបនេះ​ពី​មុន​ដែរ​ឬទេ? តើយល់​ឃើញ​យ៉ាង​ណា​ដែរ!

អត្ថបទ៖ ឌី ប៊ុណ្ណារ៉ា