បច្ចុប្បន្ន​មិន​ត្រឹម​តែ​បណ្ដាញ​ទំនាក់ទំនង​សង្គម​ប៉ុណ្ណោះ​ទេ ដែល​ទទួល​បាន​ការ​គាំទ្រ និង​ពេញ​និយម​ច្រើន សូម្បី​តែ​ការ​បង្កើត​ប្លក់​ផ្ទាល់​ខ្លួន​​ក៏​​រីកដុះដាល​ខ្លាំង​ណាស់​ដែរ​ពី​សំណាក់​មិត្តយុវវ័យ សិស្ស និស្សិត និង​បណ្ដា​អ្នក​ស្រលាញ់​ខាង​បច្ចេកវិទ្យា​​កម្ពុជា។ ថ្វី​ត្បិត​តែ​ប្លក់​​ជាប់​ក្នុង​បញ្ជី​ពេញ​និយម​ក៏​ពិត​មែន ប៉ុន្តែ​ជាក់​ស្ដែង​ប្លក់​មិន​មែន​មាន​តែ​មួយ​ប្រភេទ​ប៉ុណ្ណោះ​ទេ។

ក្នុង​ទំព័រ​នេះ​Sabay សូម​លើក​យក​ប្លក់​ចំនួន​ពីរ​ប្រភេទ​មក​បក​ស្រាយ​ពី​លក្ខណៈ​សម្បត្តិ​របស់​វា ពី​សំណាក់​ម្ចាស់​ប្លក់​មក​បង្ហាញ។ ចង់​ដឹង​ថា ក្នុង​ការ​បង្កើត​អាសយដ្ឋាន​ផ្ទាល់​ខ្លួន​ណា​មួយ ឈរ​លើ​អំណះអំណាង​ណា​ខ្លះ តោះ​ទៅ​ជួប​ជាមួយ​មតិ​ពួក​គេ​ជាមួយ​Sabayទាំង​អស់​គ្នា។

ឆ្លើយ​តប​ទៅ​នឹង​បញ្ហា​នេះ សំបូរ​បាន​បកស្រាយ​ថា សព្វ​ថ្ងៃ​នេះ​គេ​មាន​​អាសយដ្ឋាន​Blogger​ឥត​គិត​ថ្លៃ​ផ្ទាល់​ខ្លួន​ហើយ ប៉ុន្តែ​​​​គេ​ទទួល​បាន​ការ​ជ្រោមជ្រែង​ពី មិត្តភ័ក្ដិ​ទាំង​ស្រុង​​​ព្រោះ​គេ​​មិន​ដឹង​ ពី​របៀប​បង្កើត​ទេ ហើយ​រឹត​តែ​មិន​អាច​បែង​ចែក​ឲ្យ​ដាច់​ស្រេច​ថា​រវាង​ Blogger និង​Wordpress មួយ​ណា​ល្អ​ជាង​​ទៅ​ទៀត។ មូល​ហេតុ​ចម្បង​ក្នុង​ការ​បង្កើត​Blog ផ្ទាល់​ខ្លួន​នេះ និស្សិត​ឆ្នាំ​ទី​៤ មិន​មែន​ជំនាញ​IT រូប​នេះ​បញ្ជាក់​ថា ខ្លួន​គ្រាន់​តែ​ចង់​ចែក​រំលែក​ចំណេះដឹង បទពិសោធន៍ ឯកសារ ដែល​ខ្លួន​មាន ព្រម​ទាំង​ផ្ទុក​ព័ត៌មាន​ផ្ទាល់​ខ្លួន​មួយ​ចំនួន។

ទេព សុវិចិត្រ

ងាក​មក​ជួប​ជាមួយ​យុវសិស្ស ទេព សុវិចិត្រ កំពុង​សិក្សា​ថ្នាក់​ទី ១១ នៃ​វិទ្យាល័យ​សន្ធរម៉ុក បាន​លើក​ឡើង​ថា ថ្វី​ត្បិត​តែ​Blogger និង​Wordpress មាន​លក្ខណៈ​ស្រដៀង​គ្នា​ក្នុង​ការ​ផ្ដល់​លទ្ធភាព​បង្កើត​អាសយដ្ឋាន​ផ្ទាល់​ខ្លួន​ដោយ​ឥត​បង់​ថ្លៃ ប៉ុន្តែ​Wordpress ពិត​ជា​មាន​គុណ​សម្បត្តិ​ច្រើន​ជាង​Blogger ​ឆ្ងាយ​ណាស់។ យុវសិស្ស​កម្រិត​វិទ្យាល័យ​ ប៉ុន្តែ​មាន​​​ការ​យល់​ដឹង​ច្រើន​​មិន​ចាញ់ និស្សិត​សិក្សា​ថ្នាក់​បរិញ្ញាបត្រ​វិទ្យាសាស្ត្រ​កុំព្យូទ័រ​រូប​នេះ បន្ត​ថា គេ​​បាន​បង្កើត​Wordpress ផ្ទាល់​ខ្លួន​អស់​រយៈពេល ២ឆ្នាំ​ហើយ។ ប្លក់​របស់​គេ​និយាយ​ផ្ដោត​សំខាន់​គឺ ការ​ចែក​រំលែក​ចំណេះដឹង​ផ្នែក​បច្ចេកវិទ្យា​តែ​ម្ដង។

វិចិត្រ​បន្ថែម​ថា “ចំពោះ​អ្នក​ដែល​មិន​សូវ​ពូកែ Technical ឬ​កូដ គួរ​តែ​ប្រើWordpress”។

ហាក់​យល់​ស្រប​ទៅ​នឹង សំបូរ កញ្ញា​ វិច្ឆិកា ម្ចាស់​Blogspot ដែល​មាន​អ្នក​ចូល​មើល​ជា​ប្រចាំ​ច្រើន​គួរសម បាន​គូស​បង្ហាញ​​ថា សម្រាប់​ការ​ចាប់​យក​ពាក្យ​គន្លឹះ(Key Word) តាមរយៈ​Google Search គឺ​Blogger ល្អ​ជាង​ដាច់។ នេះ​ដោយ​សារ​តែ​ Blogger ជា​បច្ចេកវិទ្យា​ដែល​បាន​បង្កើត​ឡើង​ដោយ​Google ដូច្នេះ​​ចំណុចSEO ​នេះ​Wordpress ពិត​ជា​មិន​អាច​ប្រៀប​បាន​ទេ។

“សម្រាប់​ខ្ញុំ​វិញ មួយ​ណា​ក៏​ល្អ​ដែរ ព្រោះ​គេ​ឲ្យ​លេង និង​ស្វែងយល់​​ហ្វ្រី​ហើយ​នោះ ហើយ​បើ​ចង់​បាន​ល្អ​ឥត​ខ្ចោះ​ទាំង​Wordpress និង​Blogger សុទ្ធ​តែ​តម្រូវ​ឲ្យ​ចំណាយ​លុយ ហើយ​ម្យ៉ាង​ខ្ញុំ​មិន​ពូកែ​ខាង​IT ដូច​គេ​ផង”។ កឹត្យា​លើក​លើង​ដូច្នេះ។ បន្ថែម​ថា មិន​ត្រឹម​តែ Update និង​ចែករំលែក​ព័ត៌មាន​ និង​ឯកសារ​សព្វបែបយ៉ាង​នោះ​ទេ ប៉ុន្តែ​គេ​ក៏​អាច​ប្រើ​ប្លក់​ដើម្បី​រក្សា​ទុក​សកម្មភាព​​ប្រចាំ​ថ្ងៃ​(Diary) បាន​ថែម​ទៀត​ផង។

ការ​សម្រេច​ចិត្ត​ជ្រើស​រើស​Wordpress ដោយ​សារ​​តែ​គេហទំព័រ​ផ្ទាល់​ខ្លួន​មួយ​នេះ​ ផ្ដល់​ទំហំ​រក្សា​ទុក​ឯកសារ​បាន​រហូត​ដល់​ទៅ ៣GB ធំ​ជា​ង​Blogspot រហូត​ដល់​ទៅ​៣ដង ហើយ​ចំពោះ​ការ​Upload ប្រភេទ​ឯកសារ​ក៏​សម្បូរ​បែប​ជាង​ដែរ។ គុណសម្បត្តិ​មួយ​ផ្សេង​ទៀត ម្ចាស់​ប្លក់​ទាំង​អស់​អាច​update Blog របស់​ខ្លួន​តាមរយៈ​ទូរស័ព្ទ​ដៃ​ក៏​បាន។ នេះ​ជា​ការ​លើក​ឡើង​របស់​ណារិន និស្សិត​បញ្ចប់​ថ្នាក់​បរិញ្ញាបត្រ​វិទ្យាសាស្ត្រ​កុំព្យូទ័រ​ពី​សាកលវិទ្យាល័យ​ភូមិន្ទភ្នំពេញ។

“ខ្ញុំ​បង្កើត​ប្លក់ ដាក់​ចម្រៀង​ និង​វីដេអូ ឲ្យ​គេ​ដូនឡូត​ហ្វ្រី បើ​ទទួល​បាន​ការ​គាំទ្រ​ច្រើន ខ្ញុំ​និង​ពង្រីក​ខ្លួន​ទៅ​ជា​Website ពេញ​លេញ”។

ចុះ​មិត្ត​យុវវ័យ​វិញ​មាន​អាសយដ្ឋាន​ប្លក់​ផ្ទាល់​ខ្លួន​ហើយ​ឬ​នៅ? គិត​ថា​មួយ​ណា​ល្អ​ជាង? ហើយ​ក្នុង​មួយ​ថ្ងៃ​មាន​​អ្នក​ចូល​ទស្សនា​ប៉ុន្មាន​នាក់?

អត្ថបទ៖ សេង ណារិទ្ធ