អ្នកណាឧបត្ថម្ភឈឿន ឧត្តម? Trackback
រយៈពេលចុងក្រោយនេះជីវិតឯកជនតារាចម្រៀងឈឿន ឧត្តមត្រូវបានគឃើញមានភាពហ៊ឺហា បន្ទាប់ពីស្គាល់ជិតស្និទ្ធជាមួយកូនស្រីថៅកែសាំងធំម្នាក់ដែលជាប់សែឧកញ៉ាបើទោះជាកំលោះវ័យ៣១ឆ្នាំរូបនេះមិនទាន់ទទួលស្គាល់ថាពិតក្តី។
តារាសិល្បៈជាច្រើនអះអាងនឹង”សប្បាយ”ថាម្ចាស់បទ”រនោចខែប្រាំង”កំពុងត្រូវបានកូនស្រីថៅកែសាំងធំមួយផ្ដល់ការឧបត្ថម្ភអោយរស់ក្នុងជីវភាពដែលមិនសូវខ្វល់នឹងការចេញច្រៀងបន្ទាប់ពីនារីនោះបានចងសម្ព័ន្ធស្នេហ៍ជាមួយលោកមួយរយៈមកហើយ។អ្នកនិយមដើរហូបចុកជាមួយតារារូបនេះអះអាងដូចគ្នាថាឈឿនឧត្តមមានគូកំណាន់យូរមកហើយដោយនារីនោះមិនអោយលោករាប់អាននារីផ្សេងឬទទួលចេញច្រៀងក្រៅស្រុកដូចមុនទៀតផង។
ប្រភពជិតស្និទ្ធផ្សេងទៀតលើកឡើងប្រហាក់ប្រហែលគ្នាថា «ឈឿន ឧត្តមមិនរៀបការទេព្រោះកំពុងតែជាប់ដៃជាមួយកូនស្រីថៅកែសាំងម្នាក់ទើបឥឡូវគេឡូយជាងមុន»។ប្រភពដែលគួរអោយទុកចិត្តទាំងនោះបន្តថានារីដែលស្រឡាញ់ឈឿនឧត្តមក៏មិនមែនមានវ័យក្មេងនិងស្អាតប៉ុន្មានដែរទេប៉ុន្តែនាងជានារីស៊ីវីល័យហើយបានទាំងផ្ដល់ប្រាក់កាសអោយតារាចម្រៀងរូបនេះរំលែកចិញ្ចឹមបងប្អូនមួយចំនួនអោយធូរធារជាងមុនផង។ ពួកគេនិយាយថា«សង្សារឈឿនឧត្តមជួយជ្រោមជ្រែងណាស់បង់ទាំងលុយអោយបងប្អូនបានរៀនសូត្រនិងផ្ដល់ប្រាក់កម្រៃដល់ម្ដាយតារាចំរៀងរូបនេះទៀតព្រោះមិនចង់អោយគូស្នេហ៍ពិបាកចិត្តជាមួយបន្ទុកគ្រួសារអញ្ចឹងហើយទើបតារាចំរៀងរូបនេះសុខចិត្តស្រឡាញ់នាងនិងតាមនាងគ្រប់ម៉ាត់»។
ម្ចាស់ Sponsorម្នាក់បានថ្លែងក្នុងរបៀបសង្ស័យដូចគ្នាដែរថាមួយរយៈនេះឈឿនឧត្តមមិនព្រមទទួលយកការអញ្ជើញចេញទៅច្រៀងក្រៅស្រុកសោះដោយថ្មីៗនេះបានបដិសេធមិនទៅច្រៀងនៅអាមេរិកទៀតផង។លោកបញ្ជាក់ថា«ខ្ញុំមិនដឹងថាគេមិនទៅព្រោះរឿងអីទេប៉ុន្តែឮអ្នកដើរផឹកស៊ីជាមួយគេប្រាប់ថាគេមានប្រពន្ធហើយឯត្រង់មានមែនឬអត់ខ្ញុំក៏មិនច្បាស់ដែរ!»។
ឆ្លើយតបនឹងពាក្យសាយភាយនេះ ឈឿន ឧត្តម លើកឡើងរបៀបស្ទាក់ស្ទើរថាជារឿងបំផ្លើសទេ លោកគ្មានអ្នកស្រឡាញ់ ឬមានអ្នកចិញ្ចឹមអីទេ ហើយលោកក៏មិនស្គាល់កូនស្រីថៅកែសាំងណាដែរ។ តារារូបនេះ និយាយថា «ព័ត៌មានទាំងនោះ គេចេះតែចុះទេ ខ្ញុំឯណា ទៅស្គាល់កូនអ្នកមានម្ល៉ឹងៗ បើមានគេចិញ្ចឹមមែន ឈប់ពីសិល្បៈបាត់ហើយ ហើយខ្ញុំក៏មិនយកប្រពន្ធលួចលាក់ដែរ»។ ជាមួយនឹងសំនួរថាហេតុអ្វីបានជាលោកមានប្រាក់ចាយហ៊ឺហាទំាងមិនទទួលចេញច្រៀងនៅអាមេរិកក្នុងពេលដែលស្នាដៃក្នុងសិល្បៈក៏ធ្លាក់ចុះនោះតារារូបនេះឆ្លើយថា «គ្រាន់តែជីវភាពប៉ុណ្ណឹង គឺមិនពិបាកសម្រាប់ខ្ញុំទេ ព្រោះខ្ញុំអត់ទាន់មានប្រពន្ធកូនក្នុងបន្ទុកហើយខ្ញុំក៏មិនចង់ទៅច្រៀងនៅក្រៅប្រទេសពិសេសគឺអាមេរិកក្នុងរយៈពេលនេះដែរព្រោះយល់ថារកលុយមិនសូវបាន»។
អត្ថបទៈសុវណ្ណរដ្ឋ
កែសំរួលៈម៉ីសនសុធារី
