រយៈ​ពេល​ប៉ុន្មាន​សប្ដាហ៍​ចុង​ក្រោយ​នេះ​តម្លៃ​ប្រេង​សាំង បាន​ឡើង​ថ្លៃ​ជាង​មុន​ ជា​ពិសេស​នេះ​ ម្សិល​មិញ​និង​ព្រឹក​នេះ​សាំង​ស៊ុបពែរ​នៅ​តាម​ស្ថានីយ​មួយ​ចំនួន​មាន​តម្លៃ​៥៨០០​រៀល​ហើយ​ ​តម្លៃ​នេះ​បាន​ធ្វើ​ឲ្យ​អ្នក​ប្រើប្រាស់​យានយន្ត​រអ៊ូរទាំ​ និង​ចង់​ឲ្យ​ប្រេង​សាំង​ចុះ​ថ្លៃ​។

តម្លៃ​ប្រេង​សាំង​នៅ​ស៊ូគីមិច

យុវជន ​ណេត ភារ៉ា និស្សិត​ឆ្នាំ​ទី​៣ ផ្នែក​គ្រប់គ្រង​សាកលវិទ្យាល័យ​ជាតិ​គ្រប់គ្រង​ បញ្ជាក់​ថា​ “វា​ថ្លៃ​ពេក​ណាស់​ហើយ​បង ​ព្រោះ​៥៨០០​រៀល​និង​៦០០០​រៀល​តម្លៃ​ខុស​តែ​២០០​រៀល​ប៉ុណ្ណោះ​ នេះ​​ជា​តម្លៃ​នឹកស្មាន​មិន​ដល់​ទាល់​តែ​សោះ​។ ភារ៉ា បាន​បន្ត​ថា “ខ្ញុំ​ជិះ​ម៉ូតូ​រាល់​ថ្ងៃ​ចាក់​អស់​សាំង​ ១លីត្រ​កន្លះ ចំណាយ​​ជិត​១​ម៉ឺន​រៀល​ ចំណែក​ម៉ាក់​ឲ្យ​តែ​១​ខែ​១០០​ដុល្លារ​ប៉ុណ្ណោះ ដូច្នេះ​គ្រាន់​តែ​ចាក់​សាំង​គឺ​អស់​ហើយ​ វា​ប៉ះពាល់​មែនទែន​សម្រាប់​ខ្ញុំ​ជា​និស្សិត​។​ យុវជន ណេត ភារ៉ា បាន​និយាយ​ដូច្នេះ​ថា​ បើ​តាម​​ភារ៉ា​​គិត​​ ​ការ​កើន​ឡើង​នេះ ​ប្រហែល​ជា​ឡើង​មក​ពី​ស្រុក​គេ​ហើយ ​គេ​ចង់​សំណូមពរ​តម្លៃ​សាំង​ត្រឹម​៤០០០​រៀល​បាន​ហើយ​ទើប​សមរម្យ​​។

ការ​លំបាក​ដែល​បាន​ជួប​ប្រទះ​ដោយ​សារ​សាំង​ឡើង​ថ្លៃ​ ដូចគ្នា​នឹង​ ភារ៉ា​ដែរ ​កញ្ញា​តេង លីលី និស្សិត​​ឆ្នាំ​ទី​១​ មក​ពី​សាកលវិទ្យាល័យ​វ៉ាន់ដា​ បាន​ឲ្យ​ដឹង​ថា ពេល​ឡើង​ថ្លៃ​បែប​នេះ ​វា​ជា​ការ​លំបាក​មែន ព្រោះ​កញ្ញា​ត្រូវ​​ត្បិតត្បៀត​ការ​ចំណាយ​លើ​ការ​ញ៉ាំ​អី​មក​បង្គ្រប់​ការ​ចាក់​សាំង​វិញ។ កញ្ញា​បាន​និយាយ​ដូច្នេះ​ថា “ម៉ាក់​ឲ្យ​១ម៉ឺន​ សម្រាប់​១​ថ្ងៃ គ្រាន់​តែ​ចាក់​សាំង​ ៥៨០០​រៀល​ សល់​ប៉ុន្មាន​ទើប​ញ៉ាំអី ហើយ​​ទំនិញ​​គ្រប់​មុខ​ក៏​ឡើង​ថ្លៃ​តាម​សាំង​ដែរ​ ដូច្នេះ​ត្រឹម​៤០០០​រៀល​ល្អ​បំផុត​ហើយ​”​។

មិន​ខុស​នឹង​អ្នក​ទាំង​ពី​រ​ខាង​លើ​ប៉ុន្មាន​ យុវជន​ មាស ម៉ូលី និស្សិត​ឆ្នាំ​ទី​៣ សាកលវិទ្យាល័យ​ស៊ីតិច ផ្នែក​រចនា បាន​និយាយ​ថា សព្វ​ថ្ងៃ​នេះ ​ប្អូន​ចាក់​សាំង​៤​លីត្រ សម្រាប់​១​សប្ដាហ៍​តែ​ម្ដង បើ​ចង់​លំហែ​ចុង​សប្ដាហ៍​ទើប​ចាក់​ថែម សម្រាប់​ការ​ឡើង​ថ្លៃ​ឥត​ឈប់​នេះ មាន​ថ្ងៃ​ខ្លះ ​ប្អូន​ចេញ​ពី​ផ្ទះ​ហើយ​តែ​ត្រូវ​ត្រលប់​ចូល​ផ្ទះ​វិញ​ ព្រោះ​ត្រូវ​យក​លុយ​ម៉ាក់​បន្ថែម​ទៀត​ទើប​អាច​ទៅ​រៀន​បាន​ ដោយ​សារ​ស្មាន​តម្លៃ​សាំង​ខុស​ពី​ផ្ទះ​មក​។ មូលី​ បាន​បន្ថែម​ដូច្នេះ​ថា​ “ទោះបី​ឡើង​បន្តិច​ម្ដង​ក៏​ដោយ វា​ពិត​ជា​ការ​លំបាក​ណាស់ ដូច្នេះ​សូម​ឲ្យ​តម្លៃ​សាំង​ធ្លាក់​ត្រឹម​ក្រោម​៤០០០​រៀល​ជា​ការ​ល្អ​”​។ បើ​សាំង​បន្ត​ឡើង​ថ្លៃ​ជាង​នេះ​ទៀត​ មូលី​បាន​និយាយ​ថា “​មាន​តែ​សម្រេច​ចិត្ត​ដើរ​តែ​ប៉ុណ្ណោះ​”។

លោក​ ប៉ាន់ ឃាង អាយុ​ជាង​៤០​ឆ្នាំ​អ្នក​រត់​ម៉ូតូ​ឌុប​ កំពុង​ចាក់​សាំង​ មាន​មុខ​របរ​រត់​ម៉ូតូ​ឌុប​​ជាង​ ២០​ឆ្នាំ​​​ហើយ​ បាន​និយាយ​ទាំង​អស់​សំណើច​​ថា​ គាត់​មិន​ដឹង​ថា ​សាំង​នឹង​ឡើង​ថ្លៃ​ប៉ុណ្ណា​ទៀត​​នោះ​ទេ ព្រោះ​តាំង​ពី​ឆ្នាំ​១៩៩១-៩២ ​សាំង​តម្លៃ​ត្រឹមតែ​១៥០០​រៀល​ប៉ុណ្ណោះ ​ក្នុង​១​លីត្រ​ តែ​ឥឡូវ​ខ្វះ​២០០​រៀល​ទៀត​ ៦០០០​ពាន់​ហើយ​ខុស​ទ្វេ​ជា​បួន​។ ប៉ុន្តែ​ លោក​អះអាង​ថា ​បើ​ឡើង​ថ្លៃ​ទៀត​ក៏​នៅ​បន្ត​ចាក់​សាំង​ដែរ ព្រោះ​មុខ​របរ​គាត់​ត្រូវ​តែ​ចាក់​ទើប​អាច​រក​ស៊ី​កើត​។ លោក​បាន​ត្អូញត្អែរ​ថា តម្លៃ​ឈ្នួល​រត់​​ ​ឡើង​មិន​ទាន់​ថ្លៃ​សាំង​នោះ​ទេ ហើយ​អ្នក​ជិះ​ក៏​ត​ថ្លៃ​ស្វិតស្វាញ​ដែរ​ ដូច្នេះ​ ចំណេញ​គ្រាន់​តែ​ហូប​បាយ​ប៉ុណ្ណោះ​។ អ្នក​រត់​ម៉ូតូ​ម្នាក់​នេះ​បាន​សំណូមពរ​ថា “សូម​ឲ្យ​តម្លៃ​ប្រេង​សាំង​ថោក​ជាង​នេះ ត្រឹម​៣​ពាន់​រៀល​សមរម្យ​ហើយ”​។

តម្លៃ​ប្រេង​សាំង​នៅ​​​ កាល់​តិច​

បើ​ក្រឡេក​មើល​ទី​ផ្សារ​អន្តរជាតិ​វិញ​ ប្រេង​ឆៅ​បាន​ឡើងថ្លៃ​ខ្ពស់​បំផុត​មិន​ធ្លាប់​មាន​បើ​ធៀប​នឹង​ថ្លៃ​ក្នុង​ រយៈពេល​៨​ខែ​មក​នេះ​​សម្រាប់​ទ្វីប​​អាស៊ី​ គិត​ត្រឹម​ដើម​សប្ដាហ៍​នេះ​​​ បន្ទាប់​ពី​អ៊ីរ៉ង់​​ប្រកាស​បញ្ឈប់​ការលក់​ប្រេង​ទៅឲ្យ​​​ប្រទេស​អង់គ្លេស​ និង​បារាំង ។ ប្រេង​ Brent North Sea​ នៅ​ក្រុង​ឡុង​ដ៍​ ​​សម្រាប់​ចែក​ចាយ​នៅ​ខែ​មេសា​ បាន​កើន​​ឡើង​​ពី១,៥២​ដុល្លារ​ទៅ​ដល់ ​១២១,១០​ដុល្លារ​ក្នុង​មួយ​បារ៉ែល​​ ​ខណៈដែល​ប្រេង​នៅ​ផ្សារ​ក្រុង​ញូវយ៉ក ​​ឡើងដល់​១០៤,៩៤​ដុល្លារ​ (១​បារ៉ែល​=១៥៩​លីត្រ)។

តម្លៃ​សាំង​ព្រឹក​ថ្ងៃ​ទី​២៣ ខែ​កុម្ភៈ​នេះ នៅ​តាម​ស្ថានីយ​ក្នុង​រាជធានី​ភ្នំពេញ​ ដូចជា​ Caltex Sokimex Tela សាំង​សូពែរ​ មាន​តម្លៃ​ ៥៨០០​រៀល សាំង​ធម្មតា​មាន​តម្លៃ​៥៥០០​រៀល ថោកជាង​គឺ សាំង​របស់​ក្រុមហ៊ុន​Total សាំង​ស៊ុប​ពែរ​តម្លៃ​៥៧៥០​រៀល សាំង​ធម្មតា​៥៤៥០​រៀល​៕

អត្ថបទ៖ កង ចាន់​បញ្ញា
រូបថត៖ លន ហ្សាឌីណា​ និង​  បញ្ញា