កីឡាករ​​វាយ​កូន​បាល់​កូន​កាត់​ ខ្មែរ- អាមេរិក​​ពីរ​រូប​មក​ដល់​កម្ពុជា​ហើយ​ ​កាល​ព្រឹក​ថ្ងៃ​ព្រហស្បតិ៍​ដើម្បី​ចូល​រួម​ជា​មួយ​ក្រុម​ជម្រើស​ជាតិ​​កម្ពុជា​ដែល​ស្ថិត​នៅ​​ក្រុម​​​​ IV អាស៊ី/អូសេអានី (Group IV Asia Ocean)​ ​ក្នុង​យុទ្ធនាការ​​ Davis Cup ​ចាប់​ពី​ថ្ងៃ​ទី​ ​១៦​ -២២​ ​ខែ​មេសា​ ខាង​មុខ​ នៅ​ទីក្រុង​ ដូហា​ ប្រទេស​ កាតារ។ ​នេះ​បើ​តាម​ការ​​ឲ្យ​ដឹង​របស់​លោក​ ទេព រិទ្ធីវិទ្ធ​​ ​អគ្គលេខាធិការ​​​សហព័ន្ធ​កីឡា​វាយ​កូន​បាល់​កម្ពុជា។ ​

លោកទេព រិទ្ធីវិទ្ធ (ស្ដាំ) និង ប៊ុន កេន្នី

កីឡាករ​កូន​កាត់​ទាំង​ពីរ​នោះ​គឺ​ Man Panhara(ម៉ម បញ្ញារ៉ា) និង​ Mam Vetu (ម៉ម​ វិទូ)។​ កីឡាករ​ទាំង​ពីរ​ នឹង​ហ្វឹកហាត់​ជា​មួយ​កីឡាករ​​លំដាប់​លេខ​១​កម្ពុជា​ ប៊ុន កេន្នី​ ​នៅ​​​ឯ​មជ្ឈមណ្ឌល​ហ្វឹកហ្វឺន​កីឡា​ជាតិ​ដែល​ដឹក​នាំ​ដោយ​លោក​ ជា ពៅ​ ​​​​ស្រប​ពេល​ដែល​គ្រូ​បង្វឹក​ជម្រើស​ជាតិ​ ​សញ្ជាតិ​ប៉ាណាម៉ា​ លោក​ Braen Aneirosជាប់​ភារកិច្ច​នៅ​ប្រទេស​ ជប៉ុន។

មុន​ឈាន​ដល់​ពាន​រង្វាន់​ខាង​លើ​ ​កីឡាករ​កូន​កាត់​បង​ប្អូន​បង្កើត​​ទាំង​ពីរ​​​​នឹង​ធ្វើ​ដំណើរ​ជា​មួយ​ ប៊ុន កេន្នី​ ទៅ​ប្រកួត​​កម្មវិធី​​អន្តរជាតិ​ ​ITF Futures ​នៅ​វៀតណាម​ ​នា​ដើម​ខែ​មេសា​ ដើម្បី​បង្កើន​​សមត្ថភាព​​​ មុន​ពេល​ក្រុម​ចេញ​ទៅ​​ទី​ក្រុង​ ដូហា​ ប្រទេស​ កាតារ​ នៅ​ថ្ងៃ​ទី​ ១៣​ មេសា។

ទន្ទឹម​នឹង​ការ​មក​ដល់​របស់​កីឡាករ​ទាំង​ពីរ​ លោក​ ទេព រិទ្ធីវិទ្ធ​ បាន​ប្រាប់​ថា “​ពូក​គេ​ជា​កីឡាករ​ដែល​លេង​ល្អ​នៅ​​​មហាវិទ្យាល័យ​របស់​​​ពួក​នៅ​អាមេរិក។ ​វា​​ជា​ការ​ជំរុញ​​ឲ្យ​កីឡា​វាយ​កូន​បាល់​របស់​យើង​កាន់​តែ​ប្រសើរ​ឡើង​ និង​ ​​​កសាង​ទំនុក​ចិត្ត​នៅ​ថ្ងៃ​ខាង​មុខ”។

នេះ​ជា​លើក​ទី១​ ដែល​សហព័ន្ធ​កីឡា​វាយ​កូន​បាល់​កម្ពុជា​​ខំ​ពុះពារ​ដើម្បី​ត្រួសត្រាយ​ផ្លូវ​បាន​ចូល​រួម​ក្នុង​ព្រឹត្តិការណ៍វ័យ​ចំណាស់​ជាង​គេ​ Davis Cup ដែល​មាន​សមាជិក​ជាង​ ១៧០​ ប្រទេស។ ​ទង់ជាតិ​កម្ពុជា​​នឹង​ត្រូវ​បាន​គេ​ស្គាល់​តាម​រយៈ​ការ​ខិតខំ​របស់​​សហព័ន្ធ​​កីឡា​វាយ​កូន​បាល់​ដែល​មាន​​ឯកឧត្ដម​ ចម ប្រសិទ្ធ ជា​ប្រធាន។ ​​​

Mam Panhara (រូបថត TFC)

ប្រទេស​កម្ពុជា​ស្ថិត​នៅ​ ក្រុម​ Asia Oceania group IV ​​ដែល​មាន​ប្រទេស​ ​បារ៉ែន  អ៊ីរ៉ាក់  ហ្សកដានី  មីយ៉ាន់ម៉ា សិង្ហបុរី  កាតារ  អារ៉ាប៊ីសាអ៊ូឌីត ទួរមេនីស្ថាន​ ​និង អារ៉ាប់រួម។ ទាំង​​១០​ក្រុម​នឹង​ត្រូវ​បែង​ចែក​ជា​ពីរ​​ពូល​ផ្សេងគ្នា(មួយ​ពូល​៥​ក្រុម)។

រូប​ថត​ និង​ សកម្មភាព​ហ្វឹកហាត់​នឹង​ត្រូវ​ផ្ដល់​ជូន​នៅ​អត្ថបទ​​បន្ទាប់។ កុំ​​ភ្លេច​ចូល​មក​កាន់​ Sabay ក្នុង​ដៃ​អ្នក​ក្នុង​ព្រឹត្តិការណ៍​​​​អន្តរជាតិ​បែប​នេះ។

​អត្ថបទ៖ ឆន ទិត្យ​