គេហទំព័រ bgr បាន​ឲ្យ​ដឹង​កាល​ពី​ពេល​ថ្មី​ៗ​នេះ​ថា​ពាក្យ​ចចាមអារ៉ាម​ជុំ​វិញ​សេវា cloud storage របស់​ក្រុមហ៊ុន Google ឥឡូវ​នេះ​បាន​លេច​ចេញ​ព័ត៌មាន​ខ្លះ​ៗ​ហើយ។ សេវា​ថ្មី​នេះ​នឹង​មាន​ឈ្មោះ​ថា Google Drive ហើយ​មាន​លក្ខណៈ​សម្បត្តិ​ប្រហាក់ប្រហែល​នឹង Dropbox ដែរ។

Google Driveអនុញ្ញាត​ឲ្យ​អ្នក​ប្រើប្រាស់​ទាំងអស់​ផ្ទុក​ឯកសារ​នៅ​លើ cloud server និង​អាច​ចូល​ទៅ​កាន់​ឯកសារ​ទាំង​នោះ​តាម​រយៈ​កុំព្យូទ័រ​និង​ទូរស័ព្ទ​ដៃ​បាន។ យោង​តាម​រូបភាព screenshot ដែល​បាន​លេច​ចេញ​តាម​រយៈ​គេហទំព័រ TalkAndroid បាន​បង្ហាញ​ឲ្យ​ដឹង​ថា Google Drive នឹង​ផ្ដល់​ជូន​ទំហំ​ផ្ទុក​ទិន្នន័យ​ដោយ​ឥត​គិត​ថ្លៃ 5GB ដូច​ទៅ​នឹង​ទំហំ iCloud របស់​ក្រុមហ៊ុន Apple ដែរ។

រូបភាព​ដែល​លេច​ចេញ​នោះ​បាន​បញ្ជាក់​បន្ថែម​ថា​អ្នក​ប្រើប្រាស់​អាច​ចូល​ទៅ​កាន់​ឯកសារ​​របស់​ខ្លួន​បាន​តាម​រយៈ កុំព្យូទ័រ ទូរស័ព្ទ tablet និង web browser ហើយ​ថែម​ទាំង​អនុញ្ញាត​ឲ្យ​អ្នក​ប្រើប្រាស់​កែ​ឯកសារ​បាន​នៅ​ត្រង់​ចំណុច​ណា​មួយ​បន្ទាប់​មក​ឯកសារ​ដែល​កែ​ហើយ​នោះ​នឹង​កែប្រែ​ដោយ​ស្វ័យ​ប្រវត្តិ​នៅ​គ្រប់​ចំណុច​នៅ​ក្នុង Google Drive។

មាន​ពាក្យ​ចចាមអារ៉ាម​មួយ​ចំនួន​បាន​លើក​ឡើង​ថា​សេវា Google Drive នេះ​គ្រោង​ដាក់​ឲ្យ​ប្រើ​ជា​ផ្លូវការ​នៅ​ថ្ងៃ​ទី១៦ ខែ​មេសា​ខាង​មុខ​នេះ​ហើយ។

សូម​បញ្ជាក់​ថា​បច្ចុប្បន្ន​នេះ Cloud Service កំពុង​ទទួល​បាន​ការ​ពេញ​និយម​ច្រើន​ ជាក់​ស្ដែង​ដូចជា Cloud drive របស់ Amazon, iCloud របស់ Apple និង AcerCloud របស់​ Acer៕

ប្រែ​សម្រួល៖ សេង សុភ័ក្ត
ប្រភព​និង​រូបភាព៖
bgr