កាល​ពី​ជាង​មួយ​ខែ​មុន Sabay ធ្លាប់​ចុះ​ផ្សាយ​ពី​អ្នកស្រី Annette Larkins ដែល​មាន​អាយុ ៧០ ឆ្នាំ​ម្នាក់ តែ​មាន​សម្រស់​ក្មេង​ដូច​អាយុ ៤០ ឆ្នាំ​អីចឹង នៅ​រដ្ឋ Florida សហរដ្ឋ​អាមេរិក។ ប៉ុន្តែ ឥឡូវ​នេះ ស្ត្រី​ជន​ជាតិ​ជប៉ុន Masako Mizutani កំពុង​ធ្វើ​មហាជន​ជប៉ុន​មាន​មន្ទិល​សង្ស័យ និង​ភ្ញាក់​ផ្អើល​ជា​ខ្លាំង​ពី​សម្រស់​របស់​នាង។

អ្នកនាង Masako មាន​សម្រស់​ស្អាត​វ័យ​ក្មេង​ដូច​អាយុ ២០ ឆ្នាំ​អីចឹង តែ​តាម​ការ​ពិត​នាង​មាន​អាយុ ៤៣ ឆ្នាំ​ហើយ ព្រម​ទាំង​មាន​កូន​ពីរ​ទៀត​ផង ដែល​ក្នុង​នោះ​កូន​ស្រី​ច្បង​នាង​មាន​អាយុ ២០ ឆ្នាំ​ហើយ។ នាង​ត្រូវ​គេ​ឲ្យ​ឈ្មោះ​ថា ជា​”ស្ត្រី​មិន​ចេះ​ចាស់​របស់​ជប៉ុន”។

រូបអ្នកនាង Masako វ័យ ៤៣ ឆ្នាំ តាម​អ៊ីនធឺណិត

ជា​ពិសេស ពេល​នាង​បង្ហាញ​មុខ​តាម​កញ្ចក់​ទូរទស្សន៍ កាន់​តែ​ធ្វើ​ឲ្យ​មហាជន​មាន​មន្ទិល​សង្ស័យ​ជា​ខ្លាំង​រវាង​រូប​ថត​នាង​តាម​អ៊ីនធឺណិត និង​រូប​រាង​ពិត។ រូបរាង​ពិត​របស់​នាង មើល​ទៅ​ហាក់​ដូច​ជា​ចាស់​ជាង​រូប​ក្នុង​អ៊ីនធឺណិត​ដល់​ទៅ ១០ ឆ្នាំ​ឯណោះ។ អ្នក​ខ្លះ​សង្ស័យ​ថា នាង​ប្រើ​កម្មវិធី Photoshop ដើម្បី​កែកុន​រូប​ថត​នាង។ ទោះ​ជា​យ៉ាង​ណា​ក៏​ដោយ នាង​​នៅ​តែ​ក្មេង​ ​ស្រស់​ស្អាត​ដដែល​នៅ​លើ​កញ្ចក់​ទូរទស្សន៍។

រូបអ្នកនាង Masako វ័យ ៤៣ ឆ្នាំតាម​កញ្ចក់​ទូរទស្សន៍

ខណៈ​ដែល​បង្ហាញ​មុខ​តាម​កម្មវិធី​ទូរទស្សន៍​ជប៉ុន នាង​ត្រូវ​គេ​មើល​ឃើញ​ថា មាន​ស្បែក​ទន់​ស្អាត​រលោង​មិន​គួរ​ឲ្យ​ជឿ។ នាង​ក៏​បាន​បង្ហើប​ប្រាប់​អាថ៌កំបាំង​ខ្លះៗ​ពី​ការ​រក្សា​សុខភាព និង​សម្រស់​ផង​ដែរ ដែល​ក្នុង​នោះ​នាង​ត្រូវ​ចំណាយ​ពេល​រហូត​ដល់​ទៅ ៥ ម៉ោង​ក្នុង​មួយ​ថ្ងៃ ដើម្បី​ថែទាំ​ស្បែក​នាង។ វិធី​ថែរក្សា​សម្រស់​មាន​ដូច​ជា ញ៉ាំ​ទឹក​ឲ្យ​បាន​ច្រើន ដើម្បី​បញ្ចេញ​ជាតិ​ពុល​ក្នុង​ខ្លួន និង​ស្បែក បរិភោគ​អាហារ​ស្រស់ ប្រកប​ដោយ​សុខភាព និង​មាន​តុល្យភាព ប្រើ​ក្រែម​លាប​ស្បែក​មាន​វីតាមីន E ប្រើ​ក្រែម​ការពារ​កម្ដៅ​ថ្ងៃ ការ​សំអាត​ជាតិ​កខ្វក់​លើ​ស្បែក គេង​ឲ្យ​ច្រើន និង​មិន​ជក់​បារី។

សូម​មើល​រូបភាព​តាម​ទូរទស្សន៍៖

សូម​មើល​រូបភាព​តាម​អ៊ីនធឺណិត៖

តើ​ប្រិយ​មិត្ត​យល់​យ៉ាង​ណា​ដែរ? Photoshop មែន​ទេ?

ប្រែ​សម្រួល៖ សុផាត
ប្រភព៖ odditycentral
រូបភាព៖ odditycentral, rocketnews24.com