លោក Clive Palmer មហា​សេដ្ឋី​មាន​ប្រាក់​ពាន់​លាន​ដុល្លារ​របស់​អូស្ត្រាលី បាន​បង្ហាញ​ពី​ផែនការ​ផលិត​កប៉ាល់ Titanic II នា​សតវត្ស​ទី ២១ នេះដែល​គ្រោង​នឹង​សាង​សង់​នៅ​ប្រទេស​ចិន។

លោក Clive Palmer ប្រកាស​​ពី​គម្រោង​សាង​សង់​កប៉ាល់ Titanic II

មហា​សេដ្ឋី​រ៉ែ​ម្នាក់​នេះ បាន​ប្រគល់​គម្រោង​នេះ​ដល់​ក្រុមហ៊ុន​រដ្ឋ​ចិន CSC Jinling Shipyard ឲ្យ​សាង​សង់​កប៉ាល់ Titanic II ដោយ​មាន​មាន​ខ្នាត និង​ទំហំ​ប៉ុន​នឹង​កប៉ាល់​មុន​ដែរ ដែល​មាន ៩ ជាន់ និង ៨៤០ បន្ទប់។

ប៉ុន្តែ លោក Palmer បាន​បញ្ជាក់​ក្នុង​សេចក្ដី​ថ្លែងការណ៍​ថា “កប៉ាល់​នេះ​នឹង​បំពាក់​គ្រឿង​សង្ហារិម​ទំនើប​ជាង​មុន​បន្តិច និង​ប្រើ​បច្ចេកវិទ្យា​ប្រព័ន្ធ​ប្រាប់​ទិស ឬ​បង្ហាញ​ផ្លូវ​សតវត្ស​ទី ២១។

កប៉ាល់ Titanic ដើម

ការ​ប្រកាស​របស់​មហាសេដ្ឋី​ម្នាក់​នេះ ធ្វើ​ឡើង ប៉ុន្មាន​សប្ដាហ៍​ប៉ុណ្ណោះ​បន្ទាប់​ពី​ខួប ១០០ ឆ្នាំ​នៃ​ការ​លិច​កប៉ាល់ Titanic កាល​ពី​ថ្ងៃ​ទី ១៥ ខែ​មេសា ឆ្នាំ ១៩១២ បន្ទាប់​ពី​បុក​ផ្ទាំង​ទឹកកក ពេល​ធ្វើ​ដំណើរ​ជា​លើក​ដំបូង​ពី​ទីក្រុង Southampton ប្រទេស​អង់គ្លេស ទៅ​កាន់​ទីក្រុង New York។

កប៉ាល់​ថ្មី​នេះ នឹង​ឧទ្ទិស​កុសល​ដល់​បុគ្គលិក កម្មករ​ដែល​ធ្វើ​ការ និង​ស្លាប់​លើ​កប៉ាល់​មុន​ផង​ដែរ។

កប៉ាល់​ថ្មី​នេះ ក៏​នឹង​ចាប់​ផ្ដើម​ចេញ​ដំណើរ​ជា​លើក​ដំបូង​របស់​ខ្លួន​ពី​ប្រទេស​អង់គ្លេស ទៅ​កាន់​ទីក្រុង New York សហរដ្ឋ​អាមេរិក នៅ​ដំណាច់​ឆ្នាំ ២០១៦ ដោយ​មាន​កងនាវាចរណ៍​ចិន​អម​ដំណើរ​ផង​ដែរ។

ប្រែ​សម្រួល៖ សុផាត
ប្រភព៖ Channelnewsasia
រូបភាព៖ sknvibes.com, businessday.com.au