បន្ទាប់​ពី​រួម​រស់​ជាមួយ​គ្នា​អស់​រយៈ​ពេល​ជា​ច្រើន​ឆ្នាំ​ច្រើន​ខែ​មក គូស្នេហ៍​ល្បីល្បាញ​ក្នុង​ពិភពលោក Angelina និង Brad Pitt បាន​សម្រេច​ចិត្ត​រៀប​ការ​នឹង​គ្នា​នៅ​ក្នុង​ប្រទេស​បារាំង​នៅ​ថ្ងៃ​ទី ១១ ខែ សីហា ឆ្នាំ ២០១២ ខាង​មុខ​នេះ។

គូ​ស្នេហ៍​មួយ​គូ​នេះ​គ្រោង​រៀប​ការ​នៅ​ថ្ងៃ​ទី​១១ ខែ សីហា​ដោយ​សារ​តែ​ថ្ងៃ​នោះ​គឺ​​ចំ​ នឹង​ថ្ងៃ​​ខួប​អាពាហ៍ពិពាហ៍ គម្រប់ ៥០ ឆ្នាំ( Golden wedding anniversary​​) របស់​ឪពុក​ម្ដាយ​ Brad Pitt លោក Bill និង Jane។

ប្រភព​បាន​ប្រាប់​ឲ្យ​ដឹង​ថា  Angelina គឺ​ជា​អ្នក​លើក​ឡើង​នូវ​គំនិត​ជួប​ជុំ​គ្រួសារ​ដ៏​អស្ចារ្យ​នេះ​ដោយ​នាង​ចង់ ​រៀប​ចំ​ថ្ងៃ​ពិសេស(ថ្ងៃ​រៀប​អាពាហ៍ពិពាហ៍) របស់​នាង​នៅ​ចំ​ថ្ងៃ​ខួប​អាពាហ៍ពិពាហ៍​របស់​ឪពុក​ម្តាយ​ក្មេក​របស់​នាង​តែ​ម្តង។ នៅ​ក្នុង​ពិធី​នោះ កូន​ៗ ​របស់​តារា​សម្ដែង​ទាំង​ពីរ​រួម​មាន Maddox អាយុ ១០ ឆ្នាំ  Pax ៨ ឆ្នាំ  Zahara ៧ ឆ្នាំ Shiloh ៦ ឆ្នាំ  និង កូន​ភ្លោះ Knox និង Vivienne អាយុ ៣ ឆ្នាំ នឹង​មាន​តួនាទី​ផ្សេង​ៗ​គ្នា​​ក្នុង​ពិធី​មង្គល​របស់​ឪពុក​ម្ដាយ​​របស់​ពួក​គេ។

ភ្ញៀវ​ប្រហែល​ពី ២០០ ទៅ ៣០០​នាក់​រួម​មាន​ George Clooney, Matt Damon, Johnny Depp និង Tom Cruise ប្រហែល​ជា​មាន​វត្តមាន​នៅ​ក្នុង​ពិធី​ដែល​ប្រារព្ធ​នៅ​ក្នុង​តំបន់ Chateau Miraval ជិត​ភូមិ Correns ភាគ​ខាង​ត្បូង​តំបន់​ផលិត​ស្រា​ Aix-en-Provence  ប្រទេស​បារាំង។

ពាក់​ព័ន្ធ​នឹង​ពិធី​រៀប​អាពាហ៍ពិពាហ៍​​នេះ​ ប្រភព​បាន​បញ្ជាក់​ថា  “កូន​ៗ​របស់ Angelina និង Brad Pitt បាន​សុំ​ឲ្យ​ឪពុក​ម្ដាយ​របស់​គេ​រៀប​ការ​ជា​មួយ​គ្នា​​យូរ​មក​ហើយ។ ដូច្នេះ វា​គឺ​ជា​មូល​ហេតុ​ចម្បង​ដែល​ធ្វើ​ឲ្យ Brad និង  Angelina ​យល់​ព្រម​​ភ្ជាប់​ចំណង​អាពាហ៍ពិពាហ៍​នឹង​គ្នា។

តារា​សម្ដែង​វ័យ ៣៦ ឆ្នាំ Angelina ធ្លាប់​រៀប​ការ ២ ដង​រួច​មក​ហើយ​ដោយ ស្វាមី​ដំបូង​របស់​នាង​គឺ​តារា​សម្ដែង Jonny Lee Miller( ១៩៩៦ ដល់ ១៩៩៩) និង ស្វាមី​ទី ២ គឺ  Billy Bob Thornton ពី​ឆ្នាំ ២០០០ ដល់​២០០៣៕

ប្រែ​សម្រួល៖ ថារី
ប្រភព & រូបភាព៖ emirates247