ពេជ្រ សេរីរ័ត្ន ចេញទៅថតកម្មវិធីជាមួយកូរ៉េ! Trackback
នាង ពេជ្រ សិរីរត័្ន បានសុំច្បាប់សម្រាកពីទូរទស្សន៍បាយ័នតាំងពីថ្ងៃអាទិត្យចុងសប្ដាហ៍មុនដើម្បីចាកចេញទៅធ្វើការជាលក្ខណៈឯកជនផង អោយប៉ុស្តិ៍ដែលនាងបម្រើការផង ជាមួយក្រុមការងារកូរ៉េ។
លោក គង់ វិសាល អ្នកនាំពាក្យនិងជាគូស្នេហ៍ដ៏ផ្អែមល្ហែមរបស់សិល្បការិនីរូបនេះនិយាយថា ពេជ្រ សិរីរត័្ន បានសុំច្បាប់ចំនួនកន្លះខែ ដើម្បីចេញទៅថតកម្មវិធីមួយជាមួយកូរ៉េ ដែលខាងបាយ័នបានទាក់ទងតាំងពីប៉ុន្មានខែមុន។ លោកនិយាយថា នោះជាកម្មវិធីថ្មីរបស់បាយ័ន ដែលបានសហការជាមួយខាងទូរទស្សន៍ល្បីល្បាញមួយរបស់កូរ៉េ ដោយកម្មវិធីនោះនឹងអាចចាក់ផ្សាយនៅក្នុងប្រទេសកូរ៉ផង។
លោកបន្តថា វាជាកម្មវិធីទេសចរណ៍ ដែលខាងទូរទស្សន៍កូរ៉េ ចុះមកថតដល់ស្រុកខ្មែរ ដើម្បីយកទៅចាក់ផ្សាយនៅប្រទេសនោះ ហើយជ្រើសយកតារាខ្មែរគឺ ពេជ្រ សិរីរ័ត្ន អោយចូលរួមថតជាមួយ បន្ទាប់ពីទទួលកិច្ចសហការជាមួយបាយ័ន ប៉ុន្តែមិនមែនជាកម្មវីធីទេសចរណ៏សមញ្ញៗដូចដែលធ្លាប់មាននៅក្នុងស្រុកទេ គឺមានលក្ខណៈពិសេសជាង។ លោកគង់ វិសាល ថ្លែងជំនួសគូស្នេហ៍ ក្នុងពេលទូរស័ព្ទរបស់នាងពិបាកក្នុងការទំនាក់ទំនងថា «អារ័ត្ន នឹងបាត់មុខពីកម្មវិធីបន្តផ្ទាល់ទាំងអស់ពីរសប្ដាហ៍ ព្រោះនាងជាប់ការងារជាមួយ ក្រុមកូរ៉េនៅបាត់ដំបង សៀមរាប ភ្នំពេញ និងខេត្តច្រើនទៀត ប៉ុន្តែខ្ញុំមិនដឹងថា នាងទៅធ្វើអីខ្លះនៅឡើយទេ ដោយសារតែទូរស័ព្ទនាងពិបាកទាក់ទង»។
លោកគង់ វិសាលនិយាយថា ពេជ្រ សេរីរ័ត្ន មិនទាមទារតម្លៃខ្លួនខ្ពស់ទេ ប៉ុន្តែវាល្អសម្រាប់បទពិសោធន៍ និងកិត្តិនាម ។ អ្នកដឹកនាំកម្មវិធីដ៏ល្បីនេះនិយាយថា «ការងារហ្នឹងល្អទើបអារ័ត្ន ទទួលកុងត្រា ហើយពេលចប់ការងារកន្លះខែហ្នឹង នឹងមានកិច្ចកុងត្រាថតវគ្គផ្សេងៗច្រើនទៀត នៅពេលក្រោយ អញ្ចឹងហើយទើបនាងសប្បាយចិត្ត ព្រោះខាងកូរ៉េ គេត្រូវការកម្មវីធីបែបហ្នឹងច្រើនទៅបញ្ចាំងនៅប្រទេសគេដែរ»។ រយៈពេលនៃការបាត់មុខគូស្នេហ៍នេះ លោកបញ្ជាក់ថា មិនបារម្ភរឿងនាងបែកចិត្តទេ ព្រោះមានការយល់ចិត្តគ្នាច្បាស់។
អត្ថបទៈសុខឧត្តម
កែសំរួលៈម៉ីសនសុធារី
