ឆោម ឆារី៖ ទស្សនៈមុនអេស៊ានហ្គេម Trackback
លោក ឆោម ឆារី គ្រូបង្វឹកដ៏ល្បីមួយរូបផ្នែកប្រដាល់សាកលប្រចាំព្រះរាជាណាចក្រកម្ពុជាបានបញ្ចេញទស្សនៈប្រាប់”សប្បាយ”ថា ”គ្រប់កីឡាទាំងអស់មិនថាតែប្រដាល់សាកលទេសុទ្ធតែផ្ដល់ផលល្អចំពោះសុខភាព ប្រាជ្ញា ស្មារតី កិត្តិយស និងកេរ្តិ៍ឈ្មោះជូនជាតិមាតុភូមិផងដែរ”។
លោក ឆោម ឆារី និយាយបែបនេះដោយសារតែមានកូនសិស្សប្រដាល់សាកលពីររូបរបស់លោកនឹងត្រូវធ្វើដំណើរទៅចូលរួមប្រកួតកីឡាអេស៊ានហ្គេមដែលនឹងប្រារព្ធធ្វើនៅប្រទេសចិននាខែវិច្ឆិកាខាងមុខនេះ។ គ្រូបង្វឹកនិងជាអាជ្ញាកណ្ដាលប្រចាំស្ថានីយទូរទស្សន៍នានាក្នុងប្រទេសរូបនេះក៏បានបញ្ជាក់ទៀតថា ការលេងកីឡា ឬហាត់កីឡាធ្វើអោយកាយសម្បទារឹងមាំ កាលណាកាយសម្បទារឹងមាំនាំអោយយើងមានប្រាជ្ញាស្មារតីល្អ។
មួយវិញទៀតលោកក៏បានបញ្ជាក់ផងដែរថា ការប្រកួតកីឡាពិតជាលើកកម្ពស់កីឡាករ លើកកម្ពស់កីឡាក្នុងស្រុក និងលើកកម្ពស់ប្រទេសជាតិផងដែរតាមរយៈការប្រកួតលើឆាកអន្តរជាតិដូចជាអេស៊ានហ្គេមលើកនេះ ពីព្រោះវាអាចធ្វើអោយភ្ញៀវទេសចរដែលមិនទាន់ស្គាល់ស្រុកខ្មែររឹតតែចង់មកលេង ចង់ដឹង ចង់ឃើញថែមទៀត។
សម្រាប់កីឡាករដែលចេញទៅប្រកួតគេនឹងទទួលបានប្រាក់លើកទឹកចិត្តផ្សេងៗនិងទទួលបានកេរ្តិ៍ឈ្មោះល្បីល្បាញផងដែរ ។ កីឡាករដែលនឹងត្រូវចេញទៅប្រកួតនៅចិនលើកនេះគឺ កីឡាករ ស្វាយ រិទ្ធី និង ផល សុផាត ហើយក៏ជាកីឡាករដែលលោកឆោម ឆារីមានទំនុកចិត្តខ្ពស់ដោយសារគេទាំងពីរមានបទពិសោធន៍ និងទទួលបានមេដាយសំរឹទ្ធនិងប្រាក់ក្នុងការប្រកួតស៊ីហ្គេមកន្លងមកនៅប្រទេសឡាវកាលឆ្នាំ២០០៩។
ចំពោះកីឡាករដែលមិនទាន់មានឱកាសទៅប្រកួតនៅក្រៅប្រទេសក៏មានទូរទស្សន៍ជាច្រើនអញ្ជើញអោយពូកគេឡើងសង្វៀនជារៀងរាល់ចុងសប្ដាហ៍ផងដែរដើម្បីជាថ្នូរលើកទឹកចិត្តនិងលើកកម្ពស់វិស័យកីឡាប្រដាល់នៅកម្ពុជាអោយរីកចំរើនកាន់តែឆាប់រហ័ស។
អេស៊ានហ្គេមដែលនឹងប្រារព្ធឡើងនៅទីក្រុងក្វាងចូវប្រទេសចិននាខែវិច្ឆិកានេះគឺជាលើកទី១៦ មានប្រទេសចូលរួមចំនួន៤៥ និងមាន៤២ប្រភេទកីឡា។ អំឡុងពេលការប្រកួតអេស៊ានហ្គេមនេះចាប់ពីថ្ងៃទី១២ខែវិច្ឆិការហូតដល់២៧ខែវិច្ឆកា២០១០៕
អត្ថបទៈ ឆន ទិត្យ
កែសម្រួលៈ ស្រ៊ុន ម៉េងគាង
